Fisheries minister in Sangha chi tihkeuna a tlawh

Kolasib | July 18, 2020: Vawiin chawhma khan Pu K Lalrinliana, Minister of State for Fisheries Department chuan ‘Little Galilee’, Zero Point, Bairabi road a Carp Hatchery Unit (Sangha tui awp keuna) a sangha chi tihkeu hmasak ber a en a, ram pawn atanga sangha chi lakluh ngai lova, sangha chi leh a chaw a kan ram kan intodelh theih nana hmalakna pawimawh tak a nih thu a sawi.

Minister Pu K Lalrinliana chuan, Covid-19 avangin bungraw hrang hrang ram pawn atanga lak luh a harsat thu sawiin chung zingah chuan sangha chi lak luh kawngah pawh harsatna a awm thu a sawi a. Hemi avang hian sangha chi leh a chaw a kan intodelh theih nan sawrkarin hma a lak  mek thu a sawi. ”Little Galilee a Crap Hatchery Unit pawh sangha chi a kan intodelh theih nan kan chhawr tangkai chho tan dawn niin a lang a, a hmasa ber atan sangha chi nuai 10 bawr vel tihkeu a ni a, heng sangha chi te hi thla 3 hnuah chuan hralh chhuah theih tur a beisei a ni,” a ti a, Fisheries Department kaltlanga Blue Revolution hnuaia Carp Hatchery unit tangkai tak a hmangtu, Little Galilee neitute taimakna leh inpekna chu fakawm a tih thu sawiin Mizorama Sangha chi a kan intodelh theihna kawng sialtu pawimawh tak a nih ngei a beisei thu a sawi bawk a ni.

 

Minister chuan Sangha chi a kan intodelh theih nana Fisheries Department hmalakna sawiin, “Little Galilee Hatchery Unit bakah hian Lengpui, Tam dil leh Zobawkah sangha chi tihkeuna hmun ruahman a ni”, a ti a”, Heng hmun atangte hian hlawhtling takin sangha chi kan tikeu thei a nih chuan intodelhna kawnga hmasawnna ropui tak a ni dawn a ni,” a ti bawk. Pu K Lalrinliana chuan sawrkai laipui ruahmanna thar, Pradhan Mantri Matsya Sampada Yojana (PMMSY) chu sangha hmanga eizawngtute dawmkan nan leh sangha a kan intodelh theih nan Mizoramah pawh tangkai tak a hman a nih thuai beisei a nih thu a sawi.

Minister hi Pi Lalparmawii, DFDO in a tawiawm a, Little Galilee neitu Pu Lalthanliana leh a enkawltute nen hmalak chhunzawm dan tur sawihona hun neih niin, Mizorama tihpun turin sangha chi tha, Central Institute Of Freshwater Aquaculture (CIFA) atanga chah thlen dan tur te rel a ni.

Little Galilee, Zero point, Bairabi road a Carp hatchery (Sangha tui awp keuna) hi April 2019 khan Blue Revolution hnuaia bul tan a ni a. July thla tir khan Katla, Rohu leh Grass carp sangha chi hi, a vawi khatna atan nuai 10 vel tihkeu niin, September thla ah hralh chhuah theih tur a beisei a ni a, kumin vek hian sangha chi tikeu leh hman tur a hmalak mek a ni.

- DIPR