Deputy CM in Pelican Crossing System mipui hman theih turin hawng

Aizawl | July 17, 2020: Deputy Chief Minister Tawnluia, Urban, Development & Urban Alleviation Department enkawltu Minister ni bawk chuan mipui ke a kalte leh lirthei khalhtuten him leh mumal taka kawng an hman theihna tur chu vawiin khan a hawng.

He thil, Aizawl Smart City Ltd. hmalaknaa Aizawl khawpui hmun 10 laiah traffic light hmanga kawng kanna Pelican Crossing System bun fel chu mipui hman theih turin Treasury Square a Crossing System chu hmet engin Deputy CM chuan mipui hnenah a hlan.



Pu Tawnluia chuan Aizawl Smart City Ltd. pianchhuah dan te leh tobul te tarlangin Smart City in a tum ber chu mitin huap innghahna tlak khawpui siam a ni a ti a. Smart City hnuaia hmalakna hrang buaipuitu ber chu UD & PA Department nih mahse Department hrang hrang nen thawk ho tlanga hma lak hoa a a ngaih tur thusawiin Department hrang hrang te tawimawn an hmu that chu lawmawm tiin Smart City hnuaia hnate hi thawh zawh an nih hnuah a Department concerned hrang hrang te hnenah hlan chhawn zel a ni dawn tih a sawi bawk.



Deputy Chief Minister chuan Smart City hnuai ah Project 78 hlawmkhawm niin Project 33 hi State Sawrkar hmalakna, State matching share atana telh a ni thu te, DPR 27 siam zawh tawh a ni a thu te, Project 10 chu tender tawh a ni thu te pawh a tarlang a. Aizawl Smart City Project tihhlawhtlinna atan Central Sawrkarin cheng vaibelchhe 128 a rawn release tawh thu te chung atanga Cheng Vaibelchhe 68 phei chu tun hnai lawkah a rawn release thu te pawh tarlangin Covid-19 avanga harsatna awm mek chungin, chak zawka hna thawk turin theihtawp an chhuah mek tih a sawi.

Pelican Crossing System hi Aizawl khawpui chhunga mipuiten him zawka kawng kan kan theih nan siam a ni a. Kawngpui lun leh mihring tamna lai zel hmun sawmah dah a ni. Traffic Police te’n an control anga, mihring leh lirthei chetvel dan vawng tu tur a ni.

Mipui leh motor khalhtu te tan signal en tur a awm hrang a, mipui ke a kal te tana signal en tur Pelican board-ah mihring lem a sen laiin motor khalh mek tu tana en ve tur traffic signal chu a hring ang a, motor a tlan mek tihna ani a, kawng la kan loh tur a ni. Traffic Police in mipuite kawng kan tul a tih hunah Pelican Board ami chu a hmet ang a, Pelican board ami mihring lem chu a lo hring in traffic signal chu a lo sen ve thung ang a, mipui tan kawng a kan theih tihna a ni ang. Automatic leh Manual a operate theih a ni a. Traffic police lam duh dan in tunah chuan manual a operate tura siam (set) a ni a, duh hunah automatic a siam (set) mai theih a ni.

Pelican Crossing System hi bun hna hi M/S Innovations Delhi thawkin cheng Rs. 22,17,810 in he hna hi an thawk a ni.


Minister of State for Sports & Youth Affairs Pu Robert Romawia Royte, Aizawl, MLA – Pu Ramthanmawia, Pu C. Lalmuanpuia, Dr. Vanlaltanpuia, Dr. ZR Thiamsanga, Dr. K Pachhunga, Pu H. Biakzaua, Pu Zothantluanga te, Aizawl Municipal Corporation Mayor Pu PC. Lalhmingthanga leh Deputy Mayor Pu Lalringliana te pawhin he hun hi hmanpuiin Deputy Chief Minister Pu Tawnluia hi an tawiawm a ni.

Post a Comment

0 Comments