July 18, 2020 Inrinni :
July 17, 2020 thleng khan India ram chhungah Covid-19 hri dona kawnga a hma tawnga thawktu healthcare worker 15,000 chuang te chu covid-19 hri an kai tawh tih hriat a ni. Heng zingah hian doctor te, nurse te leh healthcare staff te chu hna an thawhna hmunah hri pui coronavirus hi an kai a ni. IMA (Indian Medical Association) chuan fimkhur a ngaih hle thu a sawi.
India ram chhunga hri dona atan an nunna thapa a hma tawnga thawktu damdawi lam thiam coronavirus kai mi 15,200 an awm tih India Today chuan Sorkar data la puan chhuah loh mi dang hnen ațangin a hria a ni.
Sorkar data hian a tar lan dan chuan damdawi lama thawk hri dotuten hri an kai chhan hi hna an thawh laia hri laka mahni invenna hmanrua PPE tlak chham vang te, hmai khuhna (protective gear) awm loh vang te a ni.
National Covid Registry in tun hnai maia data a tih chhuah Dr Rajan Sharma, Head of Indian Medical Association in a tlang zarhah khan a tar lan a ni. He data hian a sawi dan chuan, Coronavirus hri hi doctor 1,302 in an kai tawh a, chung zinga 93 te chu virus vang hian an thi tawh a n . IMA chuan ram chhunga hriselna lama thawktu zawng zawngte chu fimkhur reng tur te, mahni inveng țha tlat tur leh engtik lai pawha an guard ti hniam lo turin a chah a ni. (boxer hian inhnek laia guard a dah hniam chuan dumde leng chuai khawpin kuttum a dawng nge nge țhin).
Dr Rajeev Jayadevan, Kochi chapter of IMA chuan tun hnai tho khan ama lo chhinchhiah dan a tar lang a, hemi ang chuan July 9, 2020 thleng khan Coronavirus pandemic vanga doctor thi zat chu 108 an tling tawh niin a sawi. A chhinchhiah dan chuan hri do, a hma tawnga awm thi tawh zat hi 138 an tling tawh a, chung zinga 108 te chu doctor thiamna hrang hrang nei an nih thu a tar lang.
A PENSION ȚEP ASIN !
Telengana state Hyderabad khawpuia Govt General and Chest Hospital, Erragada a Nursing Superintendent Victoria Jayamani chu a pension na tur ni 19 chauh a awm tawh tihah COVID-19 vang hian June 27 khan a thi. A hrisel lohna avangin ni 20 chhung medical leave a la a, lak chhunzawm zel a duh laiin mihring indaih lohna avangin June 16 ah a leave ațang chuan a hna a zawm a, June 19 ah COVID-19 a kai tih hmuh chhuah a ni a, hrisel lo sa, zun thlum nei a ni a, Hospital ah theih tawp chhuaha enkawl ni mahse, hri a kai ațanga ni 9 naah a thi ta a ni.
(The NEWS Minute)
Source :
IndiaToday
July 18, 2020
@ 16:26 IST
The NEWS Minute
June 27, 2020
====18==07==20=
Huna Kawlvawm
Post a Comment
He post chungchanga i ngaihdan lo sawi ve rawh: