BRAZIL PRESIDENT JAIR BOLSONARO CHUAN COVID-19 A KAI TIH HRIAT A NI

Aizawl | Jul 08, 2020: Brazil ram  President Jair Bolsonaro chu hri pui  COVID-19 a kai tih hriat a ni. Latin America ram zinga ram lian leh sum leh pai dinhmun țha ber Brazil ram hi hri pui hian a tuam chhah hle a, khawvela hri kai tam leh hri vanga thi tam ber dawttu an ni mek bawk.

CNN Brasil  in  live interview a neihpuia an zawhna chu "Ka țha e, ngaihtuahawm ka ni lo" tih  hri a kai tih hriat anih hnua a chhan dan a ni. Malaria damdawi hydroxichloroquine a ei thu a sawi bawk a, HCQ hi he natna enkawlna atan hian a țha ngei a ni tih fiahna a awm lo a, Khawvela damdawi thiam tam takin nghawng țha lo tak a neih theih avangin hman loh an duh zawk a ni. 

Kum  65 a upa Brazil ram President hian an ram sum leh pai țhanna atan beihpui thlaka a zinnaah, Coronavirus pandemic chu hlauhawm lo leh țihbaiawm anih lohzia sawiin "tlang hri leng satliah mai a ni" tiin a sawi a, hetianga a ngaih avang hian amah pawhin damdawi lam thiam te thu rawn chu a pawi sà chhin eih lo a, mipui tam zingah pawh hmai tuamna hmang duh loin mi tam tak a chibai reng tho a ni. 

Hetiang anih mek lai hian, Nimin Thawhțanni khan You Tube a video pakhat dahah chuan President Bolsonaro  hian hmai kawr a vuah lai tih chhuah a ni a, amah thlawptute tam takin President chenna in kawtah amah hmuh tuma awm khawmte pawh a hnaih chilh lutuk duh ta hauh lo thung. Chung ho hnenah chuan doctor te leh mithiam te thu rawn anga midang hnaih chilh lutuk loh chu amahah he natna kai te awmdan ang a awm hnu hi chuan a zawm ve tak thu a hrilh hlawm a ni. Hri hi  kai mahse, harsatna a nei lo a, a chuap endiknaah pawh thil țha lo leh fel lo hmuh a ni lo bawk a, a chuap chu "a fai țha" tih hriat a ni. 

Brazil ram hi COVID-19 hri bupui leh kui țiahnaah hmunpui a ni mek a, hri kai leh thi tam lamah U.S. ram dawttu a ni a, hri vanga thi pawh mi 65,000 awm tawhin hri kai pawh nuai 16. 2 zet an awm tawh bawk a ni.

Hri pui len hlim khan ngaihdan maksak tak avang leh, a hnu lam thleng pawhin Brazil ram hian hri pui an hma chhawn leh dawnsawn dan chu a mumal loin a buțü phah hle a ni. State hrang hrang Governor te hma lak tum leh duh dan leh President ber ngaihdan leh duh dan a inhmu thei lo fo a, hei mai bakah hian a Health Minister nen pawh quarantine leh hri kai te enkawl zel dan kawngah pawh an inmil thei lo a. Brazil’ ram  Health Ministry  hi tunah hian  interim chief kutah a awm mek a, President Bolsonaro hian Health Minister hmasa chu a ban a, a hnu hnung zawk lah amahin a bang tawl bawk a ni. 

President Bolsonaro hi kar hmasa Ningani khan ram mipuite hnena thu chah a sawi laiin vawi sarih lai nasa fein a khuh chhuak hman a, thu a sawi zawha a țhut hnu pawh hian a bul hnaia țhu mi pawimawh parukte chu hmai kâwr tuam lo vek bawk an ni. Heta Official tel zingah hian  Regional Development Minister Rogerio Marinho leh  Chief Executive Officer, Bank Caixa Economica Federal, Pedro Guimaraes te pawh an tel a ni. A hnu pawh hian a Sorkara mi pawimawh dang leh mipui vantlang a fin leh nghal a, hemi hnu Inrinni chhun khan Brazil rama  U.S. ambassador nen chawchhun an kil dun leh bawk a ni.

Bolsonaro  hi tun hi  Covid-19 a kai chhawn theihna rem chang a neih vawikhatna a ni lo, kumin  March thla pawh khan, mi pawimawh engemaw zat US rama  tlawha zin hri kai te nen an khawsa ho a, mahse hri an hnen ațang hian enfiah a nih hnu pawhin kai chhawng lo niin amah a insawi a ni. 

 June 25 khan ,  Facebook hmanga  live a tih chhuaha hun a hman laiin  hri hi a kai tawh ni ngeia a inngaih thu a sawi. 

Bolsonaro hi khawvela ram hruaitu hri kai tawh dangte  Honduran President Juan Orlando Hernandez leh U.K. Prime Minister Boris Johnson te hnung a zuiin COVID-19 hri kai zingah a tel ve ta a ni. Hemi te pahnih hi chu damdawi ina enkawl an ni.

Brazil hi khawvela ram zau ber 5 na niin a ram hi India ram let hnih aia zau, let thum aia zim deuh a ni a, mihring pawh 210 million zet an awm. Kristian 88% vel an awm a, Roman Catholic 66% Protestant 22% an ni. An ram khawpui Brasilia a ni a, an țawng official chu Portuguese a ni. Mingo 47.73% Mixed 43.13% Black 7.61% an awm a ni. 

Source:

Hindustan Times

July 07, 2020

@ 22:33 IST

===08==07==20==

- Huna Kawlvawm