ZAIMITE HUANG: R Hmaa’n engnge a tih tak?

A zaithiam avanga Zoram dung leh vanga hriat hlawh Upa R Lalrinliana leh MS Dawngzeli te fapa R Lalhmangaiha hi, tunah hian a nupui fanaute nen Ramthar veng Lungleiah an khawsa mek.



Kum 2008-ah LDF Cable in Youth Idol thlanna a buatsaihah Top 10-ah a lang a, Lunglei District aiawhin kum 2009 a Red Ribbon Youth Icon LPS Cable buatsaihah a tel a, hetah hian Red Ribbon Youth Icon a thlan a ni.



Naupangte a nih lai atanga zai ngaina tak a ni a, a unaute nena an zai a Pa in Tape record -a record sakin an phur em em a, hei hian zai lam a ngaihvenna a ti nasa zual zel a, Thalai Kristian Pawl (TKP)-ah telin programme hrang hrangah a unaupa Hriata nen duet-in an zai thin.




Hetih hunlai hian Lalhmaa hi a zah zum em avangin a mahin a zai ngam thin lova, TKP bakah YMA programme-ah te zai zelin, mipui hmaa programme hrang hranga an din zin tak hnuah malzai tak takin a zai chho thei ta a ni. Ramthar Unit TKP in solo competition a buatsaihah a tel a, pakhatna a thlan a ni a, hei hi a mah chuan a zai chhoh zelnaah a bul \anna dik takah a ngai a, khatih laia TKP hruaitute chungah khan lawmthu a sawi a, ‘Anmahni avangin vawiin hi ka thleng a ni. Min duhsakna avangin programme hrang hrangah min zai tir thin’ a ti.


Heta tang hian zau zawkin zai lamah in hmangin kan tarlan tak ang khan LDF Youth Idol-ah telin, Lunglei District aiawh tura thlan zingah a tel a, Mizoram pum intihsiakah a ber nihna a chang chho ta a ni.


 

Lalhmaa chuan, ‘Pathian khawngaihna azar ah Lunglei Dist aiawh tura Pathum thlan zingah ka tel ve hlauh mai a. Tichuan Aizawl-ah Dist inelna kan tan chho ta a, Pathian khawngaihna a zarah leh Lunglei mipui te min duhsakna a zarah Red Ribbon YOUTH ICON nihna din hmun kalo chelh ve thei ta a ni. Gospel hla sa a Red ribbon youth icon ka lo ni ve ta hi ka lawmna ti zual tu a ni a. Pathianin Talent min pe a, a tana ka hlan let ve hi ka tihtur a ni tih hi ka chiang hle bawk a ni.’ a ti. 


 
Hlasak chungchangah Laihmaa hian Gospel leh Lenglawng a sa ber thin a, a ma zai ngaihthlak hi a zak deuh tlat thin a, ‘ Insit a na duh khawp mai, ka zai play tura min tih te hian ka ngam lo thin ka zak tlat thin a, induh khawp lohna ana duh em a ni’ a ti. Radio ah Kum 2008 atang khan Artist a ni \an a, a hla thenkhatte chu a lo record ve tawh. Tun thlengin, zai lamah hian buai tak chungin a la inhmang thova, MZI Hqrs Lungleiah Secretary a ni mek.


 

Eizawnna kawngah chuan 2015 khan CSS Hindi Teacher ah a lut ve a, Contract a tawp tak avangin Eizawnna dang a ngaihtuah a, hemi chung changah hian Lalhmaa chuan, ‘Mite angin sum leh pai din hmun tha neih ve siloh nen Mahni a in hai kaw chawpin ka car ka hralh ta tawp mai a,ka chhungte min puihna te nen Motor silna ka siam ve ta rawi a ni.

Keimahin kum khat chuang chu ka sil chho a; a chang chuan ka motor sil lai kawngkal ten min lo hmu a, mak an tih hmel thin khawp mai a, Ka sil chhoh tan tirh lai phei kha chuan mahni in khawngaihna leh zah chang te hi alo awm hma duh khawp mai a. Hun alo kal zel a ka tui chho tial tial a nuam kati chho ta em em mai a. Zahna lo awm ve tawh thin zawng zawng kha abo ta vek maia a chhan bera ka ngaih chu hna a kan tui chilh chhoh tak tak hian kan hlima, kan phur bawk a ni. Eng hna pawh thawk ila a thawk tu ten kan dah hlut thiam a, kan tih zahawm thiam hian hna ropui alo ani zel mai hi alo ni, a ti.


Lalhmaa hian a thalaipuite hnenah hetiang hian thu a chah: - ‘Hna thawh hi i zak lo ang u. Kan hmaah engpawh thawh tur awm se i thawk hmiah hmiah ang u.Chhungte chawm hlawm ringawt nih i tum lo ang u.Tin, sorkar hna hian min daih dawn lo va, chuvang chuan mahni kut ke a din hram hram i tum zawk ang u. Midangte rilru hnehna tha ber chu Taimakna leh chhelna ani a,Mi taima lo tan din chhuahna a awmlo chuvangin hna thawh i uar sauh sauh ang u, a ti.



Lunglei Times


(The Lunglei Times in an kawmna, Lunglei Times editor phalna lakchhawn a ni.)




(A hnuaia fakna hi lo hmet ve rawh.)

Post a Comment

0 Comments