Pradhan Mantri Garib Kalyan Anna Yojana hi November thla tawp thleng a pawhsei a ni ang - PM

Aizawl | June 30, 2020:.Prime Minister Pu Narendra Modi chuan vawiin khan ram mipui tana thuchah sawiin  Pradhan Mantri Garib Kalyan Anna Yojana chu November thla tawp thleng a kalpui chhunzawm anih tur thu a puang a ni.

Mi retheite tana chhawmdawlna 

Prime Minister chuan inkharkhip chhung a  mamawhtute hnena eitur sem chu ramin a ngai pawimawh hle tih sawiin Inkharkhip puan anih veleh khan Sorkar chuan PM Garin Kalyan Yojana a ruahman nghal a. Hemi hnuaiah hian miretheite tan cheng vaibelchhe nuai 1.75 package siam a ni tih a sawi.

Thla thum kalta chhung khan Jan Dhan account nei chhungkaw khawsak harsa vaibelchhe 20 dawn laite hnenah cheng vaibelchhe 31,000 sem a ni a. Loneitu vaibelchhe 9 chuangte bank account ah cheng vaibelchhe 18,000 thun a ni a, PM Garib Kalyan Rojgar Abhiyaan atan cheng vaibelchhe 50,000 sen a ni a, hemi hmang hian hnathawh tur a awm chho tan mek tih Prime Minister chuan a sawi.

November thla thleng a PM Garib Kalyan Anna Yojana pawh sei

Prime Minister chuan mi vaibelchhe 80 chuang hnena a thlawn a thla thum chhung ration sem chu thuthlukna hautak tak anih thusawiin  chhungkaw member tin hnenah a thlawn a buhfai/wheat kg 5 leh pulse kg 1 thla tina sem chu khawvelin mak tia an thlir thu a sawi a. A thlawn a ration pekte hi ram lian tam tak a mihring cheng zat ai pawhin an tam zawk a ni a ti.

Prime Minister chuan agriculture sector a hnathawh runpui tan hun fur a lo thleng leh ta a, Guru Purnima, Rakshabandhan, Shri Krishna Janmashtami, Ganesg Chaturthi, Onam, Dussehra, Deepawali, Chhath Puja te tiamin festival/Kut indawt chhovin a lo thleng dawn a. Hemi ngaihtuah chung leh hetiang hunpui laia sum leh pai mamawhna sang thin leh insenso tur tam thin hre reng chungin Sorkar chuan PM GaribKalyan Anna Yojana  chu July thla atang a November thla tawp - Deepawali leh Chhath Puja thleng a pawhsei turin thuthlukna a siam thu a sawi a. Thla nga lo awmtur chhung hian mi vaibelchhe 80  chuang chuan thla tin a thlawnin buhfai/wheat kg 5 an dawng dawn a. Chhungkaw member tin hnen a buhfai/wheat kg 5 bakah hian chhungkaw tin hnenah channa kg 1 thla tin a thlawn a pek a ni dawn a ni.

Prime Minister chuan scheme pawhsei leh atan hian cheng vaibelchhe 90,000 chuang hman a ngaih tur thusawiin thla thum kalta chhung a senso tawh nen a belhkhawm chuan cheng vaibelchhe nuai 1.5 dawn lai he scheme atan hian kan hmang dawn a ni a ti a. He scheme hi loneitute thawhrimna leh rinawm taka chhiah petute avanga kalpui theih anih thusawiin hetiang a sorkarin a thlawn a buhfai/wheat a sem theih chhan chu anmahni vang hi a ni a ti.

Prime Minister chuan rampumah 'one nation, one ration card' a taka kalpui chhoh tan mek anih thusawiin he hmalakna hi mirethei state dang a hnathawh tur zawng a pem chhuah ngaite tan a hlu hle dawn a ni a ti.

Unlock 2 chhunga fimkhur taka nun hman

Prime Minister chuan coronavirus dona kal mekin Unlock 2 lam a hawi tak thusawi langin hemi hun hi boruak inthlak vanga harsatna hrang hrang nen a in nang ching mek a ni a ti a. Boruak inthlak danglam lai anih avangin mi tinte chu an hriselna uluk turin a chah a. Inkharkhip ang chi, a hun taka thuthlukna mumal leh awmze nei siam anih thin avangin mi nuai tam takte nunna chhanhim a nih thusawiin khawvel ramdangte nena khaikhin pawhin kan rama he hri thihpui hi an tlem a ni a ti a. Amaherawh chu Unlock 1 chhung khan fimkhur lo leh ngaihsam taka khawsa an pung nia sawiin a hma kha chuan mask hman chungchangah te, second 20 chhung uluk taka nikhat chhung a vawi engemawzat kutsul te leh 'do gazdoori' maintain te kha kan ngai pawimawh tlang hle a ni a ti a. Tunah hian a hma ai mah a kan fimkhur leh zual a ngai a ni tiin fimkhur lo an pung mek hi ngaimawh awm a tih thu a sawi a ni.

Prime Minister chuan inkharkhip lai ang thovin inkhuahkhirhnate chu  zawm a pawimawh thusawiin a bik takin containment zone chhungahte dan zawm a pawimawh a ni a ti a. Dan leh inkaihhruaina zawmna chang hrelote zirtirtu leh hrilh hretu ni turin mipuite chu a sawm a. Entirna atana ram pakhat Prime Minister vantlang hmun a mask a vuah loh vang a Rs.13000 an chawi tir thu sawilangin hetiang chiah hian India rama tualchhung a thuneitute chuan khauh taka dan an lek kawh a pawimawh a ni tiin  Prime Minister pawh tiamin, tumah dan chung a leng an awm lo a ni a ti. 

Hma thlir

Prime Minister chuan hun lo kal turah Sorkar chuan miretheite leh mamawhtute dinhmun chawikang turin hma a la chhunzawm dawn tih sawiin economy lama hmalakna pawh hnathawhna hmun a fimkhur taka invenna siam chungin hawn zau belh zel a ni dawn a ti a.  Atmanirbhar Bharat leh tualchhung siamchhuah ngaihhlut kawngah nasa leh zual zawk a hmalak a tul thu a sawi bakah mipuite chu fimkhur chhunzawm zel a,  mask/hmaituamna vuah taima tur leh 'do gaz doori' maintain chhunzawm zel turin a chah a ni.

Thla tinin mi vaibelchhe 80 chuang hnenah wheat/buhfai kg 5 a thlawn a pek an ni ang a Chhungkaw member zawng zawng ang a pek a ni dawn a. Chhungkaw pakhat tan channa 1 kg nen a thlawn a sem a ni ang.

PM chuan rimtaka thawk loneitute leh rinawm taka chhiahpetute avang a he scheme hi kalpui theih a ni a ti.

Coronavirus dona kal mekah Unlock 2 lam kan thlir tak thusawiin PM chuan Inkharkhip chhung ang tho a inkaihhruaina leh inkhuahkhirhnate tih takzet a zawm turin mi zawng zawng a sawm a ni.

- PIB Aizawl