Aizawl | June 25, 2020: BJP Mizoram Pradesh chuan BJP State Office Atal Bhawan ah kum 1975 a Emergency puan a nih champha vawi 45-na an hmang a, India ram hmun hrang hrang ah he hun hi hman a ni.
He hun hi Lockdown 7.0 a nih avangin BJP Mizoram Pradesh hruaitu te chuan Social Distancing zawm chungin an hmang.
He National Emergency puan hi India history ah hun thim lai ber ni a sawi a ni a, he thil avang hian India hmangaihtute an rum a, Congress thiltih tawh ah chuan ngaihdam theih ngai tawh loh tur ani. Sorkar hnathawk leh Media mite an dikna chanvo rahbehsak niin, India Danpui tihbawrhban a ni a, MISA dan hmangin chhan awm lovin mi tam tak an man a, dân bawhchhiat leh palzutna in rampum a tuam a ni. Mizoramah ngei pawh Mizo zingah Emergency hunlai hian lungin tang engemawzat an awm a, a langsar deuh te chu- Brig T.Sailo, Pu R.Vanlawma, Pu C.Vulluaia, Pi Sanglianchhungi te an ni. Anni bakah hian MISA dan hmanga Jail tang Mizo zingah tam tak an awm a, heng mite hi BJP Mizoram Pradesh chuan an hrerengin an ngaihlu tih an sawi a.
Chutih rualin MISA vanga Jail tang la dam te hi zangnadawmna anmahni awmna State ten an pe a, Mizoram ah erawh pek an ni lova, hei hi Mizoram Sorkar hian a rang thei ang ber a ngaihtuahsak turin BJP chaun an phut nghal bawk.
He National Immergency hi Mizoram thlengin kan tuar a, thla 21 zet he Emergency puan avanga kan tawrhna te kan hriat a, hetiang ang thil duhawmlo hi a thlen leh tawh lohna turin vawiinah hian India mipuite chuan Pu Modi kaihhruai BJP Sorkar hi an thlang ta a ni. Ṭhangtharten he National Emergency 1975 hi kan hriat a, kan zir thar leh nan leh ram hmangaihna thinlung put thar leh nan he hun hi hman thin a ni a, chuvangin BJP Mizoram chuan India ram hruai tute ah hian tute nge ram hmangaih tak tak tih zirchiang a, kan history te hriat thar leh a tul an ti bawk a ni.
Post a Comment
He post chungchanga i ngaihdan lo sawi ve rawh: