Lunglei-ah RT-PCR khawl a hnawng; Lunglei damdawiin lab a dah hnu-ah DC hulhliap-ah dah let leh

Lunglei  | June 26, 2020: Thorang bialtu MLA Zodintluanga'n a lo a intiam tawh angiin vawiin chawhnu Dar 1 khan  Lunglei Bawrhsap hnenah hripui test na RT -PCR a hlan. Hlan a nih hnu hian RT-PCR khawl hi Lunglei Civil Hospital ah phurh thlen nghal niin, Civil Hospital thawktuten uload in, Laboratory ah an dahlut nghal a ni.

June ni 13, 2020 (Inrinni) a Thorang Bialtu MLA Pu Zodintluanga hova Lunglei Bawrhsap, SP, CMO leh Medical Superintendent te inkawm khawmin, Lunglei leh Mizoram chhim mipuite mamawh hmanhmawhthlak nia an hriattlan avanga leisak a intiam angin Pu Zodintluanga, MLA chuan vawiin chawhnu Dar 1 khan Lunglei Bawrhsap Chamber ah RT - PCR khawl thar chu District Bawrhsap, CMO leh Medical Superintendent te hnenah a hlan.

Zonet JB in thu a dawn danin, Pu Zodintluanga hian a intiam angin vawiin chawhnu Dar 1 khan  Bawrhsap chamberah a hlan a. Hlan a nih hnu hian RT-PCR khawl hi Lunglei Civil Hospital ah phurh thlen nghal niin, Civil Hospital thawktuten uload in, Laboratory ah an dahlut nghal a ni.

 

Hetianga Lunglei Civil Hospital Laboratory a RT- PCR Machine dah a nih hnu rei lote ah hian RT-PCR Machine chu Civil Hospital Ambulance ah hlangin phurhchhuah leh nghal a ni a. DC Office panpui niin, DC, Addl. DC CMO, Medical Superintendent, Medical Officer pakhat leh SDC ten khawl chungchang ngaihtuahin thutkhawm hmanhmawh an nei nghal a.

He thutkhawm hmanhmawh hi Zanin dar 6:10 vel khan zovin, RT - PCR khawl chu Civil Hospital Ambulance atanga hlang thlain, DC Office hulhliap (Lobby) ah dah a ni ta a ni.

Engvang chiahin nge RT- PCR Khawl hi Lunglei Civil Hospital atanga phurh chhuah leh a nih hriat a la ni rih lova. Mi thenkhat atanga thu lengvelah chuan, Medical Department lam thuneitute hian thuneitu sang zawk atangin phone call an dawng nia sawi a awm a. Hetianga RT - PCR machine, Civil Hospital Laboratory a dah luh tawh la chhuaka, dawngsawng lo tura thupetu an awm niawma sawi hi hriat chian a ni rih lo.

Zonet JB Chuan Health and Family Welfare Department Secretary Pu H Lalengmawia IAS chu be pawpin, thil awmzia a zawt fiah a. Pu H Lalengmawia chuan Officiala engmah a hriat loh thu leh, Dawngsawng lo tura Lunglei Civil Hospital thuneitute hriattir an nih leh nih loh a hriat loh thu a sawi a. Health Dept. secy hian, _"Hetiang thil ropui lutuk leh lian lutuk dawngsawng tura thuneitu lian te pawmpuina lak hmasak zet loh chu dikin an hre lo ang a, chuvangin an phur chhuak leh pawh a ni maithei a sin"_ tiin a rin dan Zonet JB a hrilh a.

Health Secretary hian, "DC kutah hlan a nih chuan, DC chuan chief Secretary te pawh a hriattir ngei turah ngai ila, DLTF kuta hlan a nih chuan Medical lam issue a ni lo thei ang a" tiin Zonet JB zawhna a chhang bawk.

Hetianga thil a kal tak a vang hian tun dinhmunah RT - PCR khawl, Lunglei Civil Hospital tana pek chu Lunglei DC Office hulhliapah hlan thlak a nih thu Zonet JB chuan a dawng.

*ZONET JB NEWS*

26th June 2020

Zirtawpni

6:15 pm