Kolasib district chhunga Lockdown inkaihhruaina

Aizawl | June 10, 2020: Lockdown chhunga Covid-19 vei awm lohna hmun a mipuite ei leh bar zawnna (Economic Acitivity), tha taka kalpui chunga mipui ten social & physical distancing uluk taka kan kalpui theihna turte; Covid-19 kai awmna hmunte fel fai taka ven chungchang-ah Kolasib DC chuan inkaihhruaina a chhuah. 

He order hi sorkar lehkha siam aiawh tur ni lovin, Kolasib District chhung bik a kalpui dan tur inkawhhmuhna atan chauh hman tur a ni ang.

Lockdown hian District khawpui- Kolasib leh Deputy Commissioner-in Containment Area a apuan te bak a huam lo ang. Tun dinhmunah Containment Area pakua; 1. Tourist Lodge, Vengthar, Kolasib 2. RSTC, Saidan, Kolasib,  3. DIET, Saidan, Kolasib,  4. Govt. Kolasib College, Venglai, Kolasib,  5. St. Maria Goretti’s School, Venglai, Kolasib,  6. SIRD Hostel, Vengthar, Kolasib,  7. Polytechnic, Thingdawl,  8. School of Nursing, Thingdawl  leh 9. Tourist Lodge (Highway Restaurant), Thingdawl te a awm.

Chawhmeh Bazar: Chawhmeh Bazar hi sorkar guideline en milin, khaw tin/veng tin VLTF emaw Joint VLTF ten anmahni bial chhungah ruahmanna an siam ang.

Bungraw hlan thlak: Phai lam leh hmun dang atanga bungraw lak luh reng reng te chu a bialtu VLTF te remruatna leh hriatpuinain, zan dar 6:00 atanga zan dar 10:00 chhungin hlan thlak thin tur a ni. Hemi hun chhung ni lo, hun dang leh mahni duh thua VLTF hriatpuina lova bungraw hlangthla man an nih chuan dan angin VLTF ten an chawitir thin ang.

Mipui-vantlang tu mah, thu neitu ten phalna an pek tih loh leh official (VLTF telin) duty-te lo chu, zan dar 7:30- zing dar 4:30 inkarah pawn chhuah, len, thil tihkhawm phal a ni lo. (Hei hi a hrana order chhuah a ni ang.)

Tul bik thil a kal chhuah/ zin chhuah ngaite tan Zonal Magistrate ten anmahni bial chhung bik a mite tan permit an pe chhuak thin ang. Local level a permit pek ngai thilah leh permit pek dan turah Zonal Magistrate ten an bial VLTF te rem an ruatpui anga, Kolasib khawpui chhung bikah chuan VLTF ten permit an pe thei ang.

Sawrkar order-in a ziah angin bungraw phurte hi permit ngai lo an ni a. Mihring phur; mimal motor leh public service te chu tlan phal a ni lo. Tul bik thil a District Magistrate leh Zonal Magistrate ten permit an pek emaw sawrkarin a tula ahman te tih lo chu tlan phal a ni lo.

Hnathawka chhuah ngai leh feh tur dik takte chu dan loh tur a ni a. Amaherawhchu, Magistrate/ VLTF ten a tul angin permit an pe thin ang.

Awm khawm phal loh: He Lock Down chhung hian khawi hmunah mah mi panga aia tam awm khawm phal a ni lo. Hei hi District Police te leh VLTF ten a tul angin an kengkawh ang. Hei hian sawrkarin phalna a pek te leh relaxation a pek te chu a huam lovang.

Dawr hawn dan tur: Mipui ni tin mamawh, damdawi dawr leh hnathawhna bungrua zawrhnate chu ni tin hawn theih a ni a. Heng baka dawr dangte erawh chu bialtu VLTF/Joint VLTF ten a tul angin dawr hawn dan tur ruahmanna an kalpui thei ang. Dawr hawn dan tur leh hawng tur chin ruahmanna siamin, Chung ruahmanna ang chuan dawr dangte hi hawn thin tur a ni a. Damdawi lam zawrhna dawr tih loh dawr dangte chu tlai lam dar 5:00 ah khar vek tur a ni.

Quarantine: Mizoram pawn atanga lo lutte chu Sawrkarin Quarantine Centre a siamah ni 14 chhung an awm ngei ngei tur a ni. Hemi bak ni 7 chhung hi anmahni veng chhungah, VLTF ten Community Quarantine Centre siama enkawl duh an awm chuan phalsak theih an ni ang. Community Quarantine Centre, VLTF ten an siam anih chuan sawrkar dan anga Community Quarantine Centre atana pawmsak phawt tur a ni. Ni 14 chhung Sawrkar Quarantine Centre-a hun hmang zo tawh, a bak ni 7 Community Quarantine Centre-a enkawl inhuamte chuan ziakin DC hnenah thlen tur a ni a. Hetiang ti thei lote erawh Sawrkar Quarantine Centre-ah enkawl chhunzawm zelin ni 21 chhung dah tur a ni ang.

Lockdown laia VLTF te tih tura beisei te:

a. Feh chungchang: Feh tur zawng zawng te VLTF ten permit an pe ang a. Magistrate/VLTF ten permit an pek loh fehte chu dan angin an hrem thin ang.

b. Dawr hawn: Ni tin mamawh leh damdawi lam bakah hnathawhna tur dawr te hi nitin hawn tur a ni a. Hemi baka dawr dangte hawn dan tur chungchangah a bialtu VLTF/Joint VLTF ten anmahni khaw milin ruahmanna an siam ang.

c. Mipui zirtir: Social distancing te, kut sil fai te, thianghlim tur te, mask vuah te leh vantlang tana puipunna siam loh te, thenawm khawveng a len tam loh leh tul bik thil ni lovah chhuak lo tura vantlang mipuite-ah zirtirna nei thin tura beisei an ni a. Hemi zirtirna hi aurinna hmanga puang thin tura beisei an ni bawk.

d. Patrolling: VLTF/Joint VLTF te hi a tul angin zan lamah an bial chhunga patrolling nei thin tur a beisei an ni.

e. Joint VLTF Mobile Team: Joint VLTF Mobile Team siamin, anni hian Kolasib khawpui chhungah dan bawhchhia emaw inkaihhruaina zawm lo emaw an awm em tih an endik thin ang. A tul anga mipui zirtir turin motor leh aurinna hmanga Kolasib khawpui chhung fang thin tur a beisei an ni bawk. Motor leh aurinna chu DC Office-in a tul dan a zirin a ngaihtuahsak ang.

- DIPR