INDIA PM & AUSTRALIA PM INBIA; THU AN THLUNG

Aizawl | June 4, 2020: Prime Minister Narendra Modi leh Australia  Prime Minister Scott Morrison te chu vawiin Ningani zing lam khan online hmangin an inbia (virtual summit) a ram pahnih te inkungkaihna leh thawh dunna chungchang boruak țha tak hnuaiah an sawi  dun a ni.


PM Morrison hi kumin January thla khan India ram tlawha rawn zin a tum kha Australia ram kang avangin a țhulh a, coronavirus pandemic vangin India rama a zin hun tur pawh a chiang thei rih lo.

He summit a an thu sawi tlangpui te chu:
# A hmasa beri COVID-19 avanga Australia mi nunna chan te leh keini India ram puma nunna chan te zawng zawng thinlung takin ka tuarpui tak zet a ni : PM Modi.
# Vawiina kan inbiakna leh inhmuhna hi India ram lo zin țhulh phahna atan hmang lo la. Țhian ang a ka ngen duh che chu in chhungkuain India ramah  he hri pui leng boruak a ziaawm hunah lo zin turin ka sawm che u a ni : PM Modi
#  India ram hi Australia nen a inlaichinna ti chak tur hian a inhawngin a inpeih reng a, chu chu zau leh chak zawka kalpui pawh a duh a ni. Ram pahnih te tan mai ni lo, Indo-Pacific region tan chu chu a pawimawh tak zet a ni : PM Modi
# Khawvel puma hri pui a len mek laia inremna thu Comprehensive Strategic Partnership kan thlung thei hi a pawimawh hle a ni. Hri puiin harsatna tam tak a ken tel ațanga tho chhuak tur hian khawvelin rilru fai leh ngaihtuahna dik hmanga thawhhona țha a mamawh a ni : PM Modi
#  Kan mite (Indian community)  Australia awm mekte  a bikin zirlaite hun khirh tak karah an chunga in țhatna avangin ka lawm tak zet a ni : PM Modi
#  India ramah ka lozin thei anih ngai chuan inkuah hmingthang tak 'Modi kuah' pawh nuam ka tih ngei ka ring : PM Morrison
# Samosa tui ka ti a,  Gujarati khichdi pawh ka ngaina hle : PM Morrison

AN INHMU FO TAWH
India-Australia inkar te, Modi leh Morrison hi vawi li tun kum khat leh a chanve kal ta chhung khan an lo inhmu tawh a, November 2018  a East Asia Summit, Singapore,  G20 in Osaka, June 2019,  G7 Summit, Biarritz, August 2019, East Asia Summit, Bangkok, November 2019 te a ni.

THAWH DUNNA BUL
India leh Australia thawh dunna hi India ram kum  2014 September thla a Australia Prime Minister Tony Abbott rawn tlawh țum leh  PM Modi-an  Australia November 2014-a a tlawh țum khan a hma mi aia tih chak a, a bul țhut  siam a ni.

Australia leh India ram te chu ram venhimna lama thawk dun turin  November 2014 during the visit of PM Modi-an Australia a tlawh țum khan thu thlun țan a ni a, hei hian heng  foreign, defence, security policy exchanges ah te ram pahnih inpuih tawnna kawnga bul țanna kawng a hawng a ni. Hemi hnu ațang hian a khat tawkin an inbe chhunzawm  ta zel a ni tih, Anurag Srivastava, Ministry of External Affairs (MEA) thu puangtu chuan a sawi.

MEA data in a tar lan danin kum  2018-19 chhunga ram pahnih te in sumdawnna chu $ 21 billion a tling. Australia hian India ramah  USD 10.74 billion investment a nei a, India pawhin Australia ah  USD 10.45 billion investment a nei bawk.

THAWH DUNNA CHU
Prime Minister pahnih te inbiaknaa pawimawh ber chu defence lama thawh dunna  "Comprehensive Strategic Partnership" thu thlung an nem nghet hi a ni.

Comprehensive Strategic Partnership in a ken pawimawh tak chu, ram pahnih te military base inhmanțawm theihna a ni tih Foreign Ministry chuan a sawi. Ram pahnih inkara sipai training neih pawlh te, indo nungchang zir dun (military exercise) te a huam bawk.

He inremna thu thlungin a ken tel  dang chu Australia leh India indo lawng, aircraft te chu a țul hun apiangah military base inhman pawlh theih a ni ang. Lawng leh aircraft jet te tui inthunțawm theih a ni bawk ang.

India hian PM Modi hnuaiah hetiang chiah inremna hi United States a neihpui tawh bawk. Hei hi sum leh pai, ralthuama China ram chak taka țhang mekin a zuam ngawt lohna tura thil țul tak a ni.

Australia hian China ram hi bungrua leh thil dang tam tak a thawn luhna lian ber a ni a, COVID-19 len hnu hian an inhmu thiam lo nasa hle a, Australia ram chu coronavirus lo chhuah dan chhui chian duhtu leh WHO nasa taka demtu a nih avangin China chuan Australia in China rama bungrua țhenkhat a thawn luh ațangin import duty nasa takin a tihsan phah tawh a, India ram nen inremna thu an thlung pawh a lawm kher lo ang.

India hian Japan leh US te nen tuipuia indo nunchan (naval exercise) Indian ocean kumina an zir hunah Australia hi tel ve ngei tura sawm a tum bawk.

Source :
Times of India
June 04, 2020 @ 14:51

ALJAZEERA
June 04, 2020

===04==06==20===
- Huna Kawlvawm

Post a Comment

0 Comments