INDIA-CHINA RAM SUMDAWNNA ȚHANG ZEL KARAH CHINA THIL SIAM HNAWL A HARSA ANG

Aizawl | June 18, 2020: India leh China ram pahnihte hi Galwan, Eastern Ladakh ah sipai inkhuainuaina avangin boruak a țang hle a, mahse sumdawnna kawngah indawr nasa leh inmamawh tawn an ni a, India-China insumdawn tawnna hi kum 2019-20 ah $87.07 billion lai a ni a, (India-US $ 87.95 billion dawttu a ni) inmamawh tawn an ni tlat a, ramri lam sipai inngur lam ni lo, sumdawnna lam hawi rih leh phawt ang u.


Zee Media Bureau in a zir chian dan chuan kum 2014 khan  Chinese company ten India rama investment an neih zat chu  Rs 12, 000 crore a ni a, tunah hian a let nga Rs 60,000 crore in a pung tawh a ni.

India leh China ram te hi ram riah sipaite May thla ațang khan an inhmu thiam lo țan a, June 15 zanah phei chuan an inkhuainuai nasa hle a, a tawn tawnin thi leh hliam engemaw zat an nei a ni. Nimin, Ningani (June 17) khan India ram External Affairs Minister S. Jaishankar leh Chinese Foreign Minister Mr Wang Yi te chu telephone in ramri buai chungchang an sawi dun a, țawngkam hriam leh chang tak takin an inbia a, hetiang hi ni mahse, ram ria buaina chin fel lam kawng chu an hawi thei a ni.

Hetiang hi ram pahnih foreign Minister te thu ni mahse a leh lam ve ve an lawm chuang lo. Sipai leh ralthuam hmanga inbeih zuina hi thleng lo mahse hemi aia ram chhung nghawng nasa thei zawk sumdawnna kawng hi nasa takin a nghawng ngei ang tih hi a lang chiang hle tawh a ni. Nimin ațang khan India ram khawpui lian hrang hrangah China thil siam duh lohzia lan tirna te, China huatna lam thil te lan tir a ni nghal a ni.


India leh China ram pahnih inkara sumdawnna hlut zawng hi  Rs 6 lakh crore lai a ni a, India ramin China rama a thil thawn luh hlutna hi Rs 1.17 lakh crore a ni a, China ațanga a thil lak luh hlut zawng chu Rs 4.9 lakh crore lai a ni thung, China rama thawn chhuah aiin a lak luh hi  a let li aiin a tam zawk a ni 


Kum  2014 khan India rama Chinese company te sum  invest chu Rs 12, 000 crore chauh ni kha, tunah hian Rs 60,000 crore lai anih tih official estimate chuan a sawi. Hemi bakah hian China hi India ram chhunga private sector tam takah ram danga a company kal tlangin (third country participation)  investment a ti nasa hle bawk a ni. Entirnan:Chinese mobile siamtu company hian Rs 3500 crore  India ramah  Singapore a a company kaltlangin a invest a ni. Hetiang chi hi India ram chhungah tam tak a awm a,  Chinese company ten investment India ram chhunga an neih hi  Rs 2 lakh crore lai tling tura chhut chhuah a ni. China hian Sorkar laipui hma lakna pawimawh tak *Indian Start-ups* ah hian sum hlawm lian tham takin tun kum hnih chhung hian Start-up company hrang hrangah investment an nei a ni.


Kum 2019 chhung ringawt pawh khan Indian Start-up a Chinese investment punna chu  94% lai a ni. Kum 2018  Rs 15,000 crore Chinese investment kha kum 2019 ah chuan Rs 29,000 crore lai a tling hman a tawh a, hei hian Chinese investment țhan chak zia a entir a ni. India rama company lian Start-up kalpuitu 30 zinga 18 te chuan  Chinese investment an hmu a ni. Hnial rual lohin, China ram hi India ram chhunga investment ti nasa a ni a, a bik takin  Start-up company te hian chu investment chu an hmu tam lehzual bawk. India company kawng hrang hranga sumdawng company 75 zet te chu :  e-commerce, financial technology, media, social media, aggregation services  logistics ah te Chinese major investment hi an hmu  a ni. 


Heng sumdawng : OLA, Hike, Big Basket, Byju, Delhivery, Dream 11, Hike, Oyo, Paytm, Snapdeal and Zomato te hi hriat hlawh, Chinese investor ten company pakhatah pawh Rs 4,000 crore thleng investment an neihna a ni. 


India ram smartphone sumdawnna hlut zawng  Rs 2 lakh crore ah  hian Chinese mobile phone brands, OPPO leh Xiaomi hian 72 % lai he sumdawnnaah hian ro an rel a. Heng bakah hian electronics sector –telecom equipment sumdawnna hlut zawng Rs 12,000 crore ah hian  Chinese siam hian 25% changa ngaih a ni. 


India ram chhung Television Market ah pawh hian Smart TV ah 42-45% leh Non-Smart TVs ah7-9% chang ang a ni. Hetiang tho hian in chhung bungraw hrang hrang (home appliances sector ) sumdawnna hlut zawng  Rs 50,000 crore ah pawh hian  Chinese siam hian  10-12% an chang bawk. 


Motor siamna hmanraw hrang hrang (Auto Components) sumdawnna hlut zawng Rs 43.1 lakh crore ah pawh hian  Chinese siam hjan 26% an chang bawk a ni . India ram chhunga  37,916 MW Solar Power market ah phei chuan China siam hian 90% lai a hauh phak hial a ni. Steel market  108.5 metric tonne kum khata hralh chhuahah pawh Chinese siam hian  18-20% market share a hauh phak a ni. Damdawi leh a siamna bawlhlo (Pharma/API) sumdawnna hlut zawng Rs 1.5 lakh crore ah pawh   60% lai China a innghat hi a ni bawk.


Heng thil hlawm lian bakah hian hmanrua leh mamawh thil te tham chi hrang tam tak Army canteen supply, army & civil zu man to ațanga torchlight, lighter leh tlereuh thlengin China siamah India ram hi a innghat a, ram chhunga thil siam chhuaktuten hetiang thil hi thawk lehkhatah an siam chhuak thei nghal kher lo ang. Chuvangin ram hruaitu pahnihte hian inmamawh tawn an ni tih hriain mipui thinrim thawi damna turin a lehlam ve ve pawh inhrosa tun tun țhin mahse, a phenah hian thil tam tak a awm ve bawk a ni.

India-China sumdawnna hi tun hnaiah nasa takin a țhang a, hetiang anih avang hian China ram thil siamte thawk leh khata hnawl leh duh loh nghal tawp ( boycott) hi India ram tan thil tih hleih theih loh leh harsa tak a ni ngei ang. Khawvel ram tam tak leh India ngei pawh lockdown thlahdulin thil siam chhuak turin țan a lak thar mek lai hian Chinese thil siamna hmanrua leh bawlhlo chi hrang hrang te hi a mamawh nghal a ni a, China tan pawh a thil siam leh hmanraw hralhna ram hi ram ri-ah sipai inkarah boruak sosang viau mahse, chuti taka  biak chhiat hi a rem chuang lo. 

Source :
ZEE RESEARCH GROUP 
ECONOMIC TIMES

=====18==06==20==
- Huna Kawlni Kawlvawm

Post a Comment

0 Comments