COVID 19: THLA KHAT CHHUNGIN INDIA RAM A HRI KAI MI NUAI 8 CHUANG AN TLING THEI

Aizawl | June 16, 2020: University of Michigan a scientist rualten India ram coronavirus pandemic darh chak dan chungchang an zir chiannain a tar lan dan chuan thla khat  chhung, July 15 velah chuan India ram a hri kai hmuh chhuah chu mi 8,00,000 aia tam a ni thei tih an hrilhlawkna ( forecast) chuan a tar lang. Hei hi lockdown rei tak chhung kal pui anih hnua June thla ațanga thlah dul anih vanga ngaih a ni.

Bhramar Mukherjee, professor of biostatistics, University of Michigan, India ram  hri kai dan zir chiangtute zinga mi chuan, "hri pui vanglai thlen hun tur hi sawi lawk a harsa, hun rei deuh zawk, thla hnih thum hnu pawh a la ni thei" a ti.

India ram hi hri lakah hma takin ram pum inkharkhip March thla tawp lam khan țan a ni. Hnial rual lohin ram puma hri țaidarh huk tur chu a chelh tlai a, hei vang hian Central leh State Sorkar tam tak an lo inbuatsaih theih phah a, hri kai thihpui pawh ram dang aiin nasa takin an tlem phah a ngaih a ni. Inkharkhip kalpui hma ni lo ta se, tun aia dinhmun chhe zawk feah India chu ding thei a nih thu an sawi bawk.

India ram hian inkharkhip rei tak a kalpui avangin ram sum leh pai dinhmunin nasa takin a tuar a, kum 40 chhunga dinhmun chhiat ber țum a thleng ta hial a, mihring nuai tam takin hna an chan a, thil siam chhuahna zawng zawng pawh an chawl țhup a, chuvangin lockdown kalpui zel hi ram chhung sum leh pai dinhmunin rem a ti thei tawh lo a ni. Hri hi hmun tinah darh mahse, hri awm chunga khawsak dan zir chu ram mipuiten an zir a țul ta a ni.

June thla ațanga inkharkhipna hlih a ni a, khawpuia hnathawk te hemi hma ațang tawh hian an awmna lam panin mi nuai tam tak an haw darh a, heng mihring chetvelna avang hian hri kai thar an pun phah hle a, ni khatah mi 10,000 chuang hri vei hmuh hmuh a ni chho ta a. Hetiang hi ni mahse lockdown puan thar leh chu India ram chaknain a tlin tawh si lo a, "Virus awm chunga khawsak zir" chu ram mipuiten an zir lo thei lo a ni.

Lockdown kalpui zel man hi Sorkar tan a man a to lutuk avangin tih zui zel theih a ni tawh lo. S. Korea, Germany te tih dan anga hri kai enfiah hna chak taka kalpui leh a vei te khawi lo nihna leh an sulhnu chhui zui hna chak taka kalpui a, nunna chan tam lo tura chak taka hma lak chu kalpui a ni ang. Hri kai lo tura mitin fimkhur a, midang hlata khawsak tlat kawng chu India ram hian a zawh chho mek a ni.

Ramanan Laxminarayan, Centre for Disease Dynamics and Economics and Policy, New Delhi & Washington chuan "India ram hian inkharkhip kalpui zel hi a tlin tawh lo a, nunphung thar, hri  awm chunga fimkhur taka nun zir a țul a ni, invenna hmuh chhuah emaw tam hneh (herd immunity) emaw hma chu he nun hi thlak theih a ni lo ang" a ti.

A invenna hmuh chhuah hian hun engtia rei nge a la duh dawn tih sawi theih a ni lo a, tam hneh -- herd immunity thleng turin ram mipui 60% vel hri kai dam leh an awm a țul a, a pahnih hian thil khirhkhan tak chu a ni.

Ram dang ngaihtuah chuan pandemic vanga thi hi India ramah a tlem hle a, 2.9% vel chauh a ni a, Sorkarin inkharkhip a kalpui hma vang leh inbuatsaih that vang a ni.

Mumbai michhe veng Dharavi mihring inhlata awm ngaihna awm lo leh Kerala state te hian hri darh chak tur nasa takin an thunun a, ina khung hran leh sulhnu chhui țhat an kalpui nasat vang a ni a, ram pum huapa hman vek  theih  ziazang a ni si lo.

Chuvangin, ram sum leh pai dinhmun tlak hniam zel a remchang tawh si lo a, fimkhur taka hri pui kara nun leh midang hlat tak chunga kut fai mai ni lo, thinlung fai taka nuna, dam khawchhuah tum leh khawsak zir chhoh zel hi kan tih makmawh a ni dawn lo'm  ni?

Source

Times of India
June 16, 2020
@ 13:24 IST

=====16===06==20==
- Huna Kawlni Kawlvawm