Aizawl | June 23, 2020: State Bank of India, Economic Wing chuan COVID-19 avang hian India ram sum leh pai țhanna nasa takin a hnuk hniam dawn a, mimal sum lak luh chawh rual (per capita income) chu tangka kum 2019-20 chhung hian Rs. 1.52 lakh ațangin, 2020-21 chhung hian Rs. 1.43 lakh ah a tla hniam dawn tih a tar lang. A hniamna hi 5.4% a ni. He report in a tar lan hi GDP tlak hniamna tura a ngaih 3.8% aiin a sang zawk a ni.
Khawvel puma ram chhung sum leh pai dinhmun hmasawnna leh tlak hniam dan zir chiang a, teh dan thiam rating agency pathum:Fitch, S&P leh Moody’s te chuan India dinhmun tlak hniam tur thu an lo sawi lawk vek tawh bawk a ni.
STATE/UT TUAR NASA TUR TE
Delhi (-)15.4,Chandigarh (-) 13.9, Gujarat (-) 11.6 te tuar nasa pathum te an nih tur thu report chuan a tar lang. A tuar nep tur te chu Arunachal Pradesh, Goa, Manipur an ni a, mi pakhat sum lak luh zat chawh rual chu tangka kum hman mek chhunga tla hniam nep turin report chuan a tar lang.
“He thil zir chianna hian a tar lan chu Per Capita Income (PCI) hi India ram pum huapin FY21 (Financial Year 2020-21) chhung hian 5.4% in a tla hniam ang a, chu chu mi pakhat sum thawh chhuah chawh rual Rs. 1.43 lakh a ni ang. PCI tlak hniamna hi GDP tlak hniamna tura chhut chhuah 3.8% aiin a hniam zawk a ni. Khawvel pum anga chhut chhuahnaah pawh kum 2020 chhung hian GDP chu 6.2% a hniam tura ngaih a ni a, hei hi 5.2% aiin a nasa zawk a ni, " Dr. Soumya Kanti Ghosh, Group Chief Economic Adviser , State Bank of India, chuan report ah a ziak a ni.
India ram state zinga hausa (an state per capita chu India ram chawh rual aia tam zawkte) hi a tuar nasa an ni dawn tih report hian a tar lang bawk. Entirnan, All India hniamna hi 5.3% anih laiin Delhi 15.4% leh Chandigarh 13.9% te chu a let thum dawn laiin an hniamna hi a tam a ni.
Heng state te sum hmuhna tur hi nasa takin tla hniam dawnin lang mahse, State țhenkhat leh North East state ho tla hniam nasa lutuk tura ngaih loh tam tak te hian an phak dawn chuang lo tih report hian a tar lang bawk a ni.
“States leh Union Territory 9 te tlak hniamna tur hi 10% aia tam a awm a, hei hian nasa takin ram pum a hnuk hniam dawn a ni. Heng state/UT 9 zinga 8 (A&N Islands tel loin) te thawh chhuah hian India ram pum thawh chhuah GDP 47% a tum phak a ni. State tam tak te hniamna tur hi 5% aiin a tam zawk a ni.
Heng state/UT tla hniam nasa tur te hi COVID-19 hri kai tamna leh lockdown reina leh hri-in a luh khung nasatna rawng sen kual khung chhunga district ngah te an ni a, inkharkhip an tawh nasat avangin, sum thawh chhuahna dawr lian leh te zawng zawng hawn țhat hleih theih a nih loh avangin sumdawng te sum lak luh nasa takin a tla hniam a, chu mai bakah dawr luah man, electric bill etc te pek tho a ngaih avangin a hloh zawngin a nghawng lo thei lo a ni. Inkharkhip hlih anih hnua dawr hawn anih leh hnu pawh hian dawrtu hi 70-80% laia an la tlak hniam tho avangin sumdawngte hlawh tur kiamna hi nasa tak a ni", Ghosh chuan a ti.
STATE/UT PCI HNIAM DAN TUR
A hnuaia tar lan te hi State & UT te mimal sum thawh chhuah PCI (Per Capita Income) tlak hniam dan tur Economic Research, SBI report in a tar lan an ni a, a hniam tih chhinchhiahna (_) awm sa vek anga ngaih tur a ni e.
1. Delhi 15.4%
2. Chandigarh 13.9%
3. Gujarat 11.6%
4. Tamil Nadu 11.4%
5. Telengana 11.1%
6. W. Bengal 11.1%
7. A & N Islands 10.6%
8. Maharashtra 10.3%
9. Haryana 9.8%
10. J & K 9.6%
11. Rajasthan 9.2%
12. Bihar 8.7%
13. Punjab 8.4%
14. Kerala 8.2%
15. Andra Pradesh 8.1%
16. Karnataka 7.8%
17. Uttar Pradesh 7.5%
18. Uttarakhand 5.7%
19. Jharkhand 5.4%
20. Pudducherry 4.8%
21. Himachal P. 3.7%
22. Odisha 3.7%
23. Tripura 3.6%
24. Meghalaya 3.6%
25. Mizoram 2.4%
26. Assam 2.3%
27. Chhattisgarh 2.1%
28. Manipur 0.6%
29. Goa 0.6%
30. Arunachal P 0.3%
All India 5.4%
National GDP 3.8%
[ SBI Research ]
State Bank of India (SBI) hian tun tangka kum 2020-21 chhunga India ram GDP hi 6.8% a tla hniam turin a chhut lawk (projected) a ni. Tangka kum thar lo awm tur 2021-22 lamah erawh chuan nasa taka V ang maia țhang chho thei turin a ngai thung a, a chhan pawh India ram sum leh pai bul țhut a ngheh tawk vang niin report chuan a sawi.
SK Ghosh chuan, "Bul țhut ngheh țhat avang hian FY24 thleng tal chu țhanna hi a țha chho hle ang a, kawng dik a zawh chuan India ram chanchina țhanna țha chhinchhiah tlak dinhmunah a lut chho thei a, hri pui len hma țhanna tluk emaw, a aia sang zawk fea țhang thei turin kawng hi a inhawng a, chumi atan hun țha hi a inher chhuah theihna sang tak a awm a ni," a ti.
Hetiang thleng thei tur hian ram chhung policy siamtute chu huaisen taka hma la turin Ghosh hian a ngenin thu rawn a pe bawk a ni.
Source :
SBI Research: SBI Projections
Business Standard
June 23 2020
@ 12:18 IST
=====23==06==20=
- Huna Kawlvawm
Post a Comment
He post chungchanga i ngaihdan lo sawi ve rawh: