Aizawl | June 19, 2020: India leh China sipai te June 15-a an inpheksual chiam țum khan China chuan India sipai 10 an manin an lo hreng bet reng a lo ni a. Heng sipai an hrente chhuah tur hian tunkar Thawhlehni ațanga nimin Ningani inkara sipai hotute inbiakna vawi thum neih hnuin nimin Ningani zan khan China hian India sipai 10 te hi a chhuah ta a ni. Indian & Chinese sipaite inbiakna hi Major General level inbiakna a ni a, inbiakna hmun hi Galwan Valley Patrol Point 14 ah a ni. India lam hi Maj Gen Abhijit Bapat, commander of Karu-based headquarters 3 Infantry Division, in a ho a ni.
Associated Press in a report danin sipai hotu pahnihte inbiakna hi sipaite inkara buaina dang chhuak thei lakah khauh taka vil a ni.
June 15 sipaite intih buainaah khan China hian India sipai 20 an thah thu hi media hrang hrangah puan a ni a, mahse China sipaiten India sipai 10 lai an man a, an hren thu hi report a awm lo a, an chhuah thu hriat hian a ti fiah ta chiah a ni. Sipai 10 man zingah hian officer pawh pahnih an tel nia hriat a ni. Heng China sipaiin India sipai an hren behte hi Ningani zan khan an chhuah ta a ni.
Indonaah hi zawng *thu dik hi hneh hmasak ber a ni țhin* an lo ti reng a ni.
He thu hi official a puan engmah a awm lo. Indian Army leh External Affairs Ministry chuan nimin Ningani chawhnu lam thleng khan " Indian sipai țhenkhat an awmna chin hriat loh” an awm loh thu an la sawi a ni.
Heng sipai 10 te hi an hriselna endik tura thawn an ni bakah official ten thil awmdan uluk takin an zawt chiang bawk nia hriat a ni.
June 15 zana darkar 7 emaw vel lai ram pahnih sipaite inbeih țuma, China in India sipai 10 an man hi kum 1962 hnua man lehna hmasa ber a ni. He inbeihnaah hian India leh China sipai 500 vel zet an inhnamhnawih nia hriat a ni a, kum 1975 hnua China sipai kut tuara India sipai thih lehna hmasa ber a ni bawk.
Report țhenkhat chuan Thawhțan zan thil thlen hnu khan India sipaite hi kim lo leh chin hriat loha bo an awm thu an sawi a, mahse Indian Army te hian Ningani pawh khan an mi leh sa te tumah chin hriat loh an awm loh thu an la sawi fan a ni.
June 15 zana tharum thawh hnua India sipaite dinhmun chungchang, External Affairs Ministry thu puangtu Anurag Srivastava, nimin Ningani chawhnu tlai tawh takah khan thu thar thehdarhtute thil awm dan sipai chin hriat loha awm chungchang zawhna a chhan dan chuan: “Sipai lamin he thil ka sawi hma hian vawiin chawhnu khan India sipai chin hriat loh tumah an awm lo, tih an sawi tawh" a ti.
China lam hian an sipaite hliam emaw thi emaw engmah an sawi lo a. Hetih lai hian India hian a sipai zingah hliam 76 Iai an awm thung . Army official te erawh chuan Chinese army 43 thi emaw hliam na tak tuar emaw an awm tih thu, an sawi a. Chinese sipaite radio thu thawn an man ațang intelligence report dang ațangin a hriat theih thu an sawi a ni. Chinese army thi zingah hian Colonel rank pawh tel nia hriat a ni a, mahse hei hi finfiahna a awm thei lo.
THU CHIANG HRIAT A HARSA
June 15, 2020 zana India leh Chinese army te Galwan Valley patrol Point No 14 hmuna inpheksualnaah khan India sipai leh China sipaite hi eng zat chiah nge an nih hriat a harsa hle a, report pakhat ah chuan India sipai Col. Babu ho kha 50 vel an ni a, Chinese Army kha 250 chuang an ni tih a ni a. Report dang lehah chuan sipai belh khawm 500 chuang an nih thu sawi a awm bawk. Zan dar 7:00 vel ațanga innuai țanin darkar 7 chhung vel a rei an inbeih chhung hi nia sawi a ni.
[ Hindustan Times June 18, 2020 ]
Source :
Hindustan Times
June 19, 2020
@ 13:36 IST
====19===06==20=
- Huna Kawlvawm
Post a Comment
He post chungchanga i ngaihdan lo sawi ve rawh: