AUGUST 2020 THLA THAR HNUAH SCHOOL HAWN A NI ANG: HRD minister Ramesh Pokhriyal

Aizawl | June 08, 2020: Human Resources Development (HRD) Minister, Ramesh Nishank Pokhriyal, June 3, 2020-a interview-naah  "school leh college te COVID-19 vanga March 16 ațanga khar tawh chu, Home Ministry ațanga phalna kan hmuh chuan, August 2020 thla thar hnuah lamah hawn a ni ang" a ti.  India ram puma zirlai  33 crore vel chuan shool hawn chungchang thu thar an ngaihven reng a, thu chiang, an rinhlehna ti bo thei tur thu chiang hriat an chak hle tawh a ni.
 

May thla tawp lama report dan kha chuan zirna School & College  hawn leh hun hi July thla a beisei niin zirlai 30% ang zela inkal chhawk tur anga tih tum a ni a, zirlai naupang zual pawl 8 hnuai lam te erawh chu hetih hunah pawh hian inlama la awm rih tura ngaih an ni thung.

He ruahmanna hmasa ang chuan Green & Orange zone a awm ten zirna in an hawng hmasa ang a, mihring inhlat chungchanga remruatna țha taka zawm chungin zirlai pawh inkal chhawk tur angin, zir hun chhung pawh țhuang hniha țhen a, kalpui tura ruahman a ni.

Mahse, India ramah Coronavirus hri leng chuan ziaawm lam aia zual lam a pan chhoh tak zel avangin ruahmanna hmasa anga kalpui chu a ngaihna awm dawnin a lang ta lo. Hetiang anih avang hian HRD Ministry chuan hemi chungchang ruahmanna Sorkar thu chhuak (official statement) kar khat chhunga tih chian a beisei a, tunah chuan ruahmanna chiang tak leh thu tlukna fumfe a la awm rih lo a ni.

HRD Minister chuan school hi August thla thar hnu lamah hawn a ni ang a ti.  Zirlaite leh zirtirtute bakah nu leh pate school hawn hun chungchangah hian taihai tak leh thu mumal hre thei loin an awm reng tawh a ni, HRD Minister Ramesh Nishank Pokhriyal chuan thu thar theh darhtute hrilhin,  school leh  college te hi August 2020 thla thar hnuah hawn a ni ang, August 15, 2020 hnu lam pawh a ni mai thei a ti.

"Exam result la puan hman loh tun session kal meka la awm te chu August 15 a puan hman vek tum kan tum a ni," HRD Minister chuan a ti.

Zawhna zawttu chuan, Minister a zawh zelnaah  school leh colleges te chu August thla tharah chuan hawn a ni tak meuh ang maw, tih a zawh chuan HRD Minister chuan aw zangkhai takin "teh reng mai" a ti.

Hetih mek lai hian CBSE Board exam tur la awm hi July 1 - 15 chhunga exam a ni ang a, ICSE/ISC exam tur la awm pawh July 1-12 chhunga buatsaih a ni bawk ang.



NEET leh  JEE entrance exam tur pawh July thla chhung hian buatsaih tum a ni a, NEET hi  July 26 ah ruahman a ni a, JEE chu  July 18 - 23 ah ruahman a ni bawk.

UGC, NCERT ten COVID-19 laka himna chungchanga inkaihhruaina (safety guidelines) an duan chu zirna in hawn leh hunah pawh zawm  ngei tur a ni ang.

 University Grants Commission (UGC) hian    college leh university te tan himna chungchanga inkaihhruaina duan chu a kutah a awm a, NCERT hian school lam tan a duang bawk a ni.

Ruahmanna siam tawh dan chu, hetiang hi a tlangpui a ni :
Coronavirus pandemic laka himna tur Inkaihhruaina hi zirlaite leh zirtirtute te tan a hrangin a awm ang.
Ruahmanna report in a sawi dan chuan zirtirtuten hmai an tuamin, kut kawr an bun bawk tur a ni a, thermal scanners  school ah a awm bawk tur a ni, zirlai pathum țhutna țhinah pahnih  an țhu tur a ni, zirlaite an inhlatna dan an zawm țha tawk em tih vilna turin CCTV a awm bawk tur a ni.

Heng bakah hian, himna chungchang Inkaihhruaina dan chu chhu chhuakin hmun remchang lai apiangah  tar bawk tur a ni. SDM leh DM ten an bial chhungah  Covid-19  chungchanga himna dan țul an tih chuan an siam thei bawk ang.

August, 2020 thla thar hnua zirna in hawn anih hunah heng ruahmanna awmsa te hi rin chhoh tur a ni ang nge, ruahmanna thar siam a ni ang tih chu sawi lawk hleih theih a la ni rih lo.

Source :
India Today Web Desk
IndiaToday.in
June 07, 2020
@ 17:16 IST

====08==06==20==
- Huna Kawlvawm

Post a Comment

0 Comments