A JOURNEY TO MIZORAM FROM ANDHRA PRADESH

(Kan zinkawng leh kan lawmna te)

Keini  Andhra Pradesh-a tangkhangte pawn tluang tak leh dam takin Mizoram kan lut ta, kan va lawm em!



Kan zinkawng thui tak, Dt 26 May 2020 aṭanga inṭan  a ṭhenin ni 5 lai mai chhunzan chawl lova kan zawh kha kan hruaitute, Visakhapatnam Mizo Association hruaitute awm lo se kan zawhin Mizoram hi kan thleng awm si lo va, VMA Hruaitute u, in laka  lawmthu sawi hi kan va ba nasa em! Lockdown tirh aṭangin in thlazar hnuai kan rawn bel a, nangni'n sawrkar mi pawimawh biak tur leh in tihtheih zawng zawng hmaih lovin min tihsakin min buaipui a, chhunzan chawl lova min buaipuina avanga him leh dam taka mizoram kan thlen theih avang hian kan thinlungah theihnghilh in ni tawh dawn lo a nih hi. Chutih laiin Gabriel PC Lalliansanga S/o Pc Lallawmsanga IPS DGP retd,  Tamil Nadu khawpui Chennai aṭanga  keini Andhra Pradesh Mizote daih daih min ngaihsaka min buaipui duh hi engtia lawmthu sawi tur nge kan hre lo, min buaipui duh miah lovin min ngaihsak duh lo pawh ni la, vuina tur kan neih dawn loh tehlul nen kan tan ngaihtuahna i sen zozai leh kan haw theih nana hma min laksak te, a thlawna Train kan chuan theih chhan leh kan zinkawng tluana hnianghnar taka eiin kan dawn chhante kha nangmah i ni tih kan hria a, Andhra Sawrkara Nodal Officer biaa chhun leh zan sawi lova ngaihtuahna leh hun i sen zozai kan hriat hian lawmthu kan hrilh seng dawn lo che a nih hi,  mahse; khawvel inhruaihaw/Inthawnchhuah runpui  i hriatchhuah apiangin Andhra Pradesh mizote hi i lakah kan lawm a ni tih min lo hriatsak ṭhin rawh aw.



Vawi 3 haw tumin kan inpeih a, hmun hrang hrang aṭangin 'In lo haw ve dawn em?' tih zawhna kan dawn pawh ninawm a kai ṭan a, 'Keini hi kan haw ve thei dawn lo a nih hi, kan tlem si a, ngaihsak kan hlawh ve lo a ni ang' tia beidawng taka kan awm laiin Andhra Pradesh aṭanga Mizoram hawna tur Train kan neih thu Gabriela of Chennai leh kan hruaitute hnen aṭangin kan dawng a, a thu kha a va mawi em! "In chuan man pek a ngai lo ve, eiin pawh Andhra Sawrkarin a free vek dawn che u" tih thu kan han dawng zet kha chu he hripui huatthlala covid 19 kara rimawi ber kan ti lo thei lo. Vawi 3 haw tuma kan pack tawh kan thawmhnawte check nawnin kan han insiam leh a,  huphurh leh phur inkawpin  kawnga kan hun tawn tur zeldin pah zelin khami ni kha kan hmang a, hruaitute u, kan lawm e aw.  Nangni awm lo u la, Andhra Pradesh khawlum hnuaiah khan kekawr bul nen thlan luang zawih zawihin kan la mu awm si a. 


Zinkawng zawh tura zankhua maia in mimal motor leh VMA sum senga min thiar chhuak te, mutchhuak sawi miah lova varṭian aṭanga min han thiarkhawm te, screening kan neih chhung zawng min telpui hnua kan rilṭam hlaua ei tur min han pai lehzel te kha  engtia lawmthu sawi tur nge kan hre lo, KZP kan pe che u. Pathianin a let tam takin rul che u se la kan ti. Ih e, Covid hrileng tlansan turin Mizoramah haw chakin viau mah ila, Visakhapatnam khawpui kan chhuahsan tur min vai liam lai khan kan ngai che u a, hrehawm kan va ti si em! Lo dam zel rawh u aw. 

Vijayawada Train station-a kan hun hman dan leh kan  inthiar dan erawh sawisen a ni lo, zinkawng tluanin hruaitute'n min ngaihven a, chhuna duty nei pawn zanah tlaivarin kan chanchin in ngaichang a, mut hun nei miah lova min buaipui tur khan VMA tan emaw, in mimal tan emaw thil ṭha pakhat mah kan ka ti ve si lo, a mak kan ti a, hruaitu ṭha neih nawmzia kan hriat phah, Mizo nih hlutna kan hriatchian phah a, tlawmngaihna, hmangaihna leh duhsakna in naute min dawntir zozai  kha rulhlet che u kan va duh em! Train-ah eiin hnianghnar takin kan dawng a, ei sen loh leh in sen loh Station-a min petute kha lawmthu hrilh chiam kan chak a, mahse, Gabriela leh kan VMA hruaitute hmalakna a ni tih kan hria a, in naute hi kan va tlaiin kan va puar em! Rilṭam reng reng kan hre hman lo, Chhangthawp leh Cake mawlh mai kha  thingtlang dawrte siamna tham lawih asin, tuithianghlim in sen loh kan dawn te kha Odisha phaizawl  khawlum kan tlan lai te khan a va hlu em! Rilṭam tuihal tuar hman lova Andhra Pradesh-Guwahati kan tlan chhunga kan awm chhan kha Pathianin keini min ngaihsaktu leh hmangaihtu hruaitu ṭha min pek vang a ni a, Pathian hnenah lawmthu kan sawi e. 

Guwahati khawpui kan lo lut a, Train-a kan ṭhutpui kan ṭhian duhtak te nen inṭhen darha district wise-a bus pek kan ni a, Andhra Pradesh-ah mah lung a len tawh naklaiin bus hranah kan chuan a lo ngai a, khatih lai khan a ruktein hrehawm kan tih vek ka ring a, mahse, ṭawngṭaina nen bul kan ṭan angin zinkawng hruaitu Pathian kan zingah telin Assam-Mizoram thlengin hrehawm lutuk tuar lovin kan awm a nih kha, hruaitute'n in awm hmunah min ṭawngṭaisak reng avang te khan Pathian malsawmnain Mizoram kan luhtirh aṭangin district tinah min hmuak a, chaw pangngai ei chaka kan awm laia Elizabeth Hotel-in  a rem lo chung rem min ruatsaka ruahmana min lo siamsak te, Vairengte duty ten remchang min lo zawnpui te, mahni sum senga ei tura kan inngai laia   Mizoram vawksa ngei mai kan han eia VMA  lamin kan ei man zawng zawng min peksak vek te kha a ropui kan ti a, vannei kan inti. 

Vairengte kan rawn pel a, Siaha bus-a chuangte kha  a ṭhenin Guwahati aṭang tawhin ekchhuak kan lo ṭhut bet a, kan lo insum ṭang ṭang tih te kan han hria a,  khawchhunga inthiar leh mi toilet hman kan tan a rem loh avanga buaithlak kha a tam em em a, mangan tawpah U Muankima of Khuangpuilam (Kolasib) hnenah min pui theitu tur kan han zawt a,  Kolasib DO number min lo pe a, zah pawh dawn lovin hmeichheho tan ekin min lo arrange sak theih leh theih loh ka han zawt tawp a, ani'n min ngaihpawimawhsakin lamlian paltlang khua Thingdawl leh khawdang task force duty te min lo biak kualsak a, vanneihthlak takin Khamrang Task Force duty te'n ekin ṭha tak leh duh tawka kan insil daihna tur tui duhthusama tam an khawdaiah min lo siamsak a, Covid 19 vanga khawvel buai nuaih nuaih karah ek runpui te kan nei a, Kolasib lam leh Khamrang Task Group te, in chungah kan lawm a, Ek chhuak chunga zinkawng hrehawm paltlang tur kha nuamsa takin kan zinkawng kan chhunzawm theih phah a, Pathianin kan chunga in ṭhatna kha rul let mawlh che u se tih hi kan ṭawngṭaina a ni  a, chu mai a ni lo, kan tlangvalte zial leh kuhva chak, kan driver te thil lei tum, khawtina mi dawr kawta thil lei tuma ding kha kan harsatna min hriatsakin zial leh kuhva min pai  lehzel a, pawisa pek che u kan tum lahin in duh si lo, 'Kan lawm e aw' tih khan kan lawmna a hrilhfiah zo lo ve. 

Aizawl kan lo lut a, kawngsir aṭanga min lo bye bye tute kan han tawng a, Mizote khawpui Aizawl kan lo lut zet kha chu thla a va muang em! Mualpui lamah kan han thleng khawm a, Guwahati aṭanga kan rawn chhohna Bus Driver leh kan Motor te kha  Siaha thlen nan a tlak meuh lova kan hriat avangin thlak kan han dil a, Siaha BDO leh Aizawla Duty te'n hma min lakpui a, City bus ṭha tak min pe a, Driver lah chu a felin a motor-a chuan a hahdamthlak em em lehnghal a. A hming leh Phone number kan lo nei hauh lo lehnghal,  Aizawl City Bus MZO1B6978  driver kha lawmthu min lo hrilhsak teh u aw. Assam aṭanga kan rawn chhohna bus driver fuh lo lak aṭangin him takin kan tumram min thlen a, kan lawm eeeee. 

Ni 29 May zinglam dar 3 velah Aizawl chhuahsanin Siaha lam kan pan a, kan chhuah hmain Duty te'n Lunglei SDC Hlimpuia min phone sakin  a tuk ni 30 May (Inrinni) tukṭhuan min lo peihsak thlap a, rilṭam hauh lovin mizoram chhunga kan zinkawng kan chhunzawm thei te kha kan lawm a, kha tukṭhuan Pukpui duty te'n  min pek, Buh, Alu, Dal leh Hmarcha hring tuizia mawlh kha kan sawi bang lo a nih hi. 

Kan zinkawng a thui si, Covid 19 thehdarh a hlauhawm avangin sawrkarin inkaihhruaina dan a siam zawng zawng kan zawm a ngai a, khawchhunga dawrah thil kan lei a rem meuh si lo, Andhra lama kan VMA Secretary Tlangval Ramtea'n Lawngtlai SDC  min lo biaksak a, tichuan, Lawngtlai lamin Thingkah YLA hruaitute  hnenah kan harsatna lo thlenin Thingkah YLA President Pu K Vanlalawmpuia'n Thingkah khawdaiah kan mamawhte nen min nghah reng thu min rawn hrilh a, kan Driver leh  tlangvalte tan Cigarette tam tawk  bakah kan vaia changkim tur Kuhva leh Frooti tam tawk  bakah Energy drink bur 2 min pe a, pawisa pek kan tum lahin an la duh hauh lo lehnghal 'In zinkawng a thuiin in chau dawn si a, in tana kan theih tawk a nih kha' tiin min vai liam a, kha'ng zozai min pek kha in pawisa a va hek nasa dawn em! Thingkah YLA te, in chungah nasa takin kan lawm e. 


Ni 30 May, Zan dar 7:30 veleh Siaha ITI-ah Screening leh   Rapid Test nei turin kan lut a, zinkawng bul min ṭanpuia min hruaitu Pathianin thil ropui min tihsak leh a, Andhra Pradesh aṭanga Siaha district lo haw zawng zawng mi 33 te kan negative vek tih kan hriat bakah Andhra Pradesh aṭanga mizoram District danga lo haw zingah tumah  Rapid test paltlang zo lo kan awm lo tih kan hria a, Pathian chu fakin awm rawh se. 

Hei, ABC Home, Meisatla-ah ni 14 chhung khunghran kan ni dawn a, Siaha lam Medical Team/Front Liner te leh min buaipuitute zawng zawng chungah lawmthu kan sawi a, Mizoram mipuite, state dang aṭanga kan lo haw hma pawhin he natna hi Mizoramin a vei hlauin kan fimkhurin sawrkarin guide line a siam zawng zawng kan theihtawpin kan lo zawm ve a, in himna leh Mizo mipuite himna hi kan duh ber a, Mizoram chhungah pawh thuawih taka protocols zawm kan tum a ni tih min hriatsak u la kan va duh em! 

A tawp berah chuan VMA hruaitute kha KZP kan pe che nawn leh che u a, Gabriel of Chennai kha Supper Salute  aw. Guwahati-a Train Station-a min lo hmuaktute kan theihnghilh phal lo che u a, keimahni vanga in buaizia kha kan hria, kan lawm e.  Tin,  Mizoram chhunga District hrang hranga min duhsaktu duty te kha damna leh hriselna kan duhsak che u a, zinkawng tluana min ngaihsaka kan chanchin min zawttute kan ṭhiante leh ṭhian tia kan sawi phak ngai loh tur te kha in ṭawngṭaina zarah  dam takin zinkawng kan zawh zo a, kan lawm e. Heng zawng zawngah hian Pathian ropui ber rawh se. 

OmOmi
ABC Home
Siaha


(Haw runpui zinkawng chanchin thuziak dang dah zel kan va duh tak em. +919402125273 )

Post a Comment

0 Comments