Columnist, Explore Mizoram
Tun ang hun harsa leh khirhkhan takah chuan, miin a thlamuanna leh a hahdamna lam ram a pan a, a thleng thei a nih chuan lo lawmpui em em mai kha kan zaa tih tlan theih awmchhun a ni a. Thinlunga hausa te tan erawh a ṭul dan ang zela thlamuan leh chhawmdawl dan kawng te pawh a awm mahna.
Covid-19 rawn hluar hma hian ram pawna awm zingah awm ṭha duh vak lo leh Welfare lam pawh zai lem lo te pawh an lo awm a ni thei a. Mi ṭhenkhat inla changkang leh inla tunlai em ema khawvel lo chen deuh te pawh an awm a ni thei e. Mahse, chung mi te chu percentage a lâk chuan an tlem zawk dawn fe tih a chiang reng mai..
Tih tak emah chuan Zoram chhungah hian chutiang mi chu an tam daih zawk ang.. Mahse rampawna awm te hian a rampum huap angin mi an rawn hmer ngai lem lo. A ram chhunga cheng te zawk hian a ni mi pahnih khat vanga mi za chuang chuang lo hmer leh ṭhin chu ni!
Capt. L.Z. Sailo te khan engtin keini hi min ngai ang maw? Insuihkhawm a hriat dan te, a pawimawhna a chianzia te kha keini hi chuan a bu ṭhelhin kan ṭhelh ta em ni chu aw ka ti ṭhin!
Mizo kamchhuak pakhat lâr tak chu "Mo ṭha chuan chhungkua a huikhawm a, mo ṭha lo erawh chuan chhungkua a hnawtṭiau" tih hi a ni a. Mizoram chhungah hian mo ṭha lo kan tam hmel hian ka hre ṭhin! A ṭha tam zawk karah hian..
A thuhrimin tun anga khawvel pum a mangan lai leh a buai nuaih nuaih lai hi chu inzilhna hun ni pawhin a lang lem lo, infuiha, inchophur tawna, inthlamuan tawn hun zawk a nih hmel. He hri leng hi han kiang se, a zilh ngai leh fuih ngai te tan hun a la awm em em ang..
Zawhna inkarkik tak tak hmang hian a tawp khar mai teh ang a thui uchuak lohna atan:
"Mi ṭhenkhat harsa fal deuh te leh hlemhle deuh ten sorkar an lo beisei na deuh a ni thei a, chuvanga rampawna tangkhang zawng zawng te hi dem chi a ni dawn em ni? Ṭhenkhatin Mizo an lo changkan san hial tawh ṭhin pawh a ni thei a, mahse an thlamuanna tak tak chu a hnamah, a ramah tih hriaa fapa tlanbo chan chang tura an rawn kir tawh a hnu an lo daipelh tawhna te sawi chhuahsak nitin an ngai chuang em ni? Social Media a inchirhtheh tawnna hian rah ṭha a chhuah tawh ngai em ni? Ṭha leh ṭha inlâwn tawn lohin thil ṭha zawk a chhuak thei dawn em ni? Kan ṭhahnemngaihnain inlungrualna a vawchhia a nih te chuan kan INSUIHKHAWM thei dawn chuang em ni? Insuihkhawm ṭha lo ram leh hnam an ding chhuak tawh ngai em ni?'
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: