Columnist, EXPLORE MIZORAM
India ramin Covid-19 pandemic outbreak a hmachhawn danah North East State te kan la che ṭha ang reng viau mai a. State rethei apiang kan la che ṭha emaw a tih theih..
India ram Covid-19 Dashboard in he thu ziah lai (Dt. 23rd May, 2020 @ 9:00 AM) thlenga a tarlan dan chuan:
Tripura hian Covid-19 kai mi 175 dapchhuak tawhin mi 152 te chu recover tawha ngaih an ni a, heng zinga mi 4 chu nimin lama recover niin tunah hian 23 an la enkawl mek a. Thihpui an la awm miah lo tun thleng hi chuan.. An enkawl dan hi a va zirchian chi hmel ve aw!? An data hi a dik chuan standing ovation pek tlâk hial khawpin inenkawlna lamah an che ṭha!
Assam hian 260 hmuchhuak tawhin chung zinga 49 te chu nimin lama hmuhchhuah an ni. Mi 55 in recover tawhin mi 198 an la enkawl mek a, mi 4 in nun an chan phah tawh thung.. An health minister Himanta update aiin pakhatin detect zat leh recover zat ah hian a tam..
Manipur hian 26 hmuchhuak tawhin nimin khan pakhat an hmuchhuak a, mi 2 in recover tawhin mi 24 an la enkawl mek a, anni lamah pawh vanneihthlak takin thihpui an la awm lo..
Khawvel pum Covid-19 dashboard https://www.worldometers.info/coronavirus/ in he thu ziah lai thlenga a tarlan dan chuan kan ṭhenawm ram te dinhmun chu hetiang hi a ni:
Bangladesh ah 30,205 hmuhchhuah tawh niin 432 in an thihpui tawh a. Mi 6,190 zetin recover tawhin 23,583 zet an la active mek!
Myanmar ah mi 199 detect tawh niin chung zinga mi 116 chu an recover tawh a. Mi 6 in nunna an chan phah tawh a, tunah active mek mi 77 an la awm bawk.
State tinin tangkhang kan nei a, kan ram mi state dang leh ram danga tangkhang kan neih laiin kan state a state/ram dang mi tangkhang te pawh kan nei hlawm a. Hei tak hi tuna kan mu tan lian ber pakhat a ni.
Ram rethei zawk aṭanga hmun danga tangkhang te hi a tlangpuiin khawpui lian zawk leh him lo zawka tangkhang an ni duh khawp mai a. An tangkhangna hmuna an awm reng a nih chuan an tan kaina chance a sang zel dawn a, kai ta ni se tam tak ei tur pawh nei tawh bar lo an nih vangin an chhungte pawh anmahni support tura neih nei bik lo a ni tih a hriat reng lai karah inenkawlna turin sum an nei lo dawn chiang sa a. An tangkhangna state tan lah enkawl lova dah chuan do rem a har dawn a, an state suma enkawl ngawt theih a nih dawn loh avangin hetianga tangkhang zinga a kai te chu an state diktak zawk sum an pawh hek zel a ngai lo thei dawn lova. Chuvang chuan sorkar sum a hek duai duai thei tih hriain hmun danga tangkhang te hi state tinin sum a hek loh zawkna tur a nih hriain an buaipui ta suau suau mek vek a ni ber.
Chutih mek laiin tangkhang te thiar tur hian railway lamin rel (rail) 230 an buatsaih laiin tuna ticket booking ti ngawt pawh 1.3 million a kai hem tawh mai si a, a khawi state mah hi an duh duh huna haw thei lo leh an hun a thlen hun nghaka la tawm zel tur a nih a hriat sa mai a. State pahnih - an tanna leh an awmna state - te lo inbe rem thlap tawh pawh ni se railway lam in ready hun kha nghah leh tho a ngaih avangin tu state tan mah duh ang anga chet zung zung theih a ni lo.. Thawhṭanni aṭanga thlawhna a service ṭan dawn avangin a zia sawt tura ngaiha ni a, chutih laiin Airport hawn ve lohna state a awm te pawh an awm nawk thei tho bawk. Chu mai a ni lova, thlawhna a haw an awm ṭhen nual chuan state khat aṭanga rail a chuang tur kha an tlahniam zel ang a, vawi khat tlanah state hrang hrang an chuang tam tawlh tawlh ang a, a him lo tulh tulh thei ve bawk a. Tin, state 3/4 hial inthurual a ngaih tawh chinah chuan Welfare/state lam tan pawh inbiakrem a harsa sawt ang a, mahni haw hun nghah chhung hi a rei phah sawt thei bawk!
Chutih mek laiin India ram khawpui lian hovah a kai hmuhchhuah zat hi a tlahniam hlei thei lo ni mai lovin san lam a pan zel hlawm a ang mah a. Nimin khan Delhi ah chuan ni khata an hmuhchhuah tam ber ṭum niin 660 a kai hem mai a, hei hi ni 5 chhung ni khata 500 aia tlem lo an hmuhchhuah zâwnna a ni tawh bawk!
Chuvangin khawi state pawh hian tangkhang kan hruai hawn te dinhmun hi a him lo telh telh dawn tih a chiang reng a. Kan fimkhur zual zel a ṭha khawp ang. Tuna Orange zone a awm te pawh an rawn haw theih meuh chuan Red Zone ah an lo kai vung thei tawh dawn tlat a ni an nghah chhung tur mitthla hian..
Nimin khan Assam pawhin Sarusajai Quarantine Facility aṭangin mi 26 zetah an hmuchhuak a, hei hi ṭumkhata Assam in an hmuhchhuah tam ber ṭum a ni a, chu pawh tangkhang an hruai haw te aṭangin a nih hmel! Manipur CM pawhin tangkhang rawn haw te hi Red Zone - Delhi, Maharashtra, Uttar Pradesh, Gujarat etc aṭanga rawn haw an nih deuh zel tawh avangin a luhaithlak thu a sawi ve thlawt!
Tangkhang te hi hruai haw ni lo se chuan a chung lama kan sawi tawh ang khi kan dinhmun a nih theih dawn avangin kan economy in a pha dawn lo chiang sa a. Chuvangin loh theih loha sorkar tan chuan sum tam tak seng pawha hruai hawn an ngai.. Lo tangkhang zel ni ta se ṭanpuina pek reng tur a nei dawn lo a, ṭawng thu chhe lovah an lo kai ta suau suau a nih phei chuan an inenkawlna tur sum a nei dawn hek lo.
Hruai haw an nih chuan khing khi pumpelh theih a nih mai bakah an tangkhangna lama an test miah loh tur kha a rawn haw a nih chuan screen niin qurantine a ni ang a, a dinhmun a zirin an test zui ang. Chuvangin an lo kai palh a nih pawhin enkawlna pek vat an ni ang a, a darh zel tur nasa takin kan veng tel dawn tihna a ni.
A ṭha zawng leh ṭha lo zawnga he rampum buaina kalmek - hruai haw hna - hian lukhawng a neih theih avangin a la rawn haw tur zawng zawng te pawh rawn fimkhur se, keini pawhin anni lo thinhrik mai lovin risk awm thei apiang te ngaihtuaha fimkhur zual tial tial hi i tum ṭheuh ang u.
Thinhrikna tel lova fimkhur hi a theih a nia!
(A hnuaia fakna hi lo hmet ve rawh.)
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: