Quarantine centre ah i lut a, i beisei ang i hmuh loh avanga vui rilru i pu anih chuan hei hi hre reng ang che..Cement concrete chhungah, internet signal leh power supply ṭha tawk nen, duh hun huna mu theiin ral i veng tih hi..I unauten tuipuan kaih hnuaiah, eng mumal awmlo, vangvat leh thlipui ruahpui tuarin vengtu hna an thawk ve tho tih hria la, in ralven buk inthlauh zia hi theihnghilh suh ang che.
Quarantine centre ah Sorkar ration i dawng a, i beisei aiin alo tui lutuklo anih pawhin vuilo hram ang che. I unaute pawh nangmah ang bawka ralveng in, ramriah mahni rawng in bawl chawpin, sa rim reng reng hre lovin, an hmuh theih ang hnim hnahnem lakhawmin eitur an buatsaih ve bawk tih theihnghilh suh.
Thikna rilru leh demna thinlung i pu em? Sorkar in a theihtawp a chhuah a, Kohhran in a hmun thianghlim te chu ami te ralven buk atan a hawng a, Ram mipui ten he ram himna turin an ro bawm an sawh keh mek e. I ralven buk a lo hrehawm deuh anih pawhin kan himna turin kan bei tlang a ni tih hre reng la, vui bik suh aw. Hnehtu kan nih ngei ngei a ngai e. Vui hun nilovin ṭanrual hun a ni e.
Nangin inchhungah ral i veng a, i venbuk kha chhuahsan phet tum bik suh aw. Ral a hnai e. Kan unauten ramriah ral an veng a, penkhat pawh tawlhlo turin thingserh an sat e. Nang leh kei pawhin kan ralven buk kan chhuahsan a rem bik lo ve.
Hnam huaisen Mizo kan ni lawm ni. Ramri a ni emaw, Quarantine centre a ni emaw, kan dawr leh hnathawhna hmun ṭheuh hi kan ralven buk chu a ni. Penkhat pawhin kan tawlh dawnlo. Dam leh tlang khatah, thih leh ruam khatah kan tih kha.. Nang i hmunah, Kei ka hmunah. Ka ram tan, Mizoram tan.
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: