State dang mi tangkhang ten Governor puihna ngen

Aizawl | May 26, 2020: Mizoram a state dang mi tangkhang Zirtirtu leh zirlai te chuan Governor PS Sreedharan Pillai hmuin hmalak sak turin an ngen.

Governor P.S. Sreedharan Pillai chuan Mizorama tangkhang mek state pawn lama haw thla tur te chu a tul anga hma a lak sak tur thu a lo hrilh a. Airport thenkhat te an la inhawn fel theih loh avanga ni reilote chhung chu nghah rih pawh a tul a rin thu a sawi a. Governor chuan COVID-19 hripui leng avangin mi te ber atanga a milian ber pawhin harsatna kan tawh vek thu leh he harsatna hi kan zavaia tangtlanga paltlang kan tum a ngai a ni a ti. Mizoram Raj Bhavan chu hmundanga mi te ang lovin, Raj Bhavan thar, a mamawhtu apiang, milian leh te ber tan pawh a inhawng a ni a ti a. Mizoram atanga hmundang pan duh tanpui ngai emaw pawn lam atanga Mizorama rawn haw duh te tan pawh Raj Bhavan, Mizoram chu Phone hmanga biak theih reng a ni a ti.



Vawiina Governor hnena an harsatna thlentu, Mizorama tangkhang mek te hi Arunachal Pradesh, Uttar Pradesh, Haryana, Rajasthan leh Kerala a haw tur te an ni a. An haw na tur Thlawhna te cancelled leh postpone te a ni a. An zinga thenkhat pawisa nei tlem tawh, Hotel-a thlenna tur atana senso nei tawh lo mi pali te phei chu Governor hian Raj Bhavan-ah nimin lam atang khan a lo mikhual tawh a ni. Vawiin khan Governor chuan Mizorama tangkhang mek, tanpuina diltute hi Chawchhun a lo buatsaih sak a. COVID-19 hrileng avanga la haw thei lo, IIMC Hostel, Ramrikawna awm mek zirlai tangkhangte tan Governor ruahmannain Raj Bhavan staff te chuan karkhat chhung, nitin nikhatah chaw vawikhat an zu pe thla thin bawk a ni.

Post a Comment

0 Comments