SOCIAL MOBILITY

- Zohmingthanga Pachuau

Social mobility kan tih chuan vantlang nuna danglamna lo thleng, mipui mimir hmasawnna a ni emaw, a hmasawn lo zawnga tlakchhiatna lo thleng te pawh hi social mobility chuan a huam vek mai. Social stratification te pawh hi social mobility chuan a huam tel deuh tho a; mahse, sawi kawp erawh a rem chiah lo. 

Social mobility point pathum chauh hi i han sawifiah mai mai teh ang. 

1) Horizontal social mobility : Horizontal social mobility chu mi, a dinhmun (Status) inthlakthleng tak tak chuang si lova a din hmun (Post) inthlak kual chhen hi a ni mai a. Entirna tha deuh chu tunlai sawrkar hnathawk, an awm hmun (Post) sawn kual sawn kual ang chi hi Horizontal social mobility chu a ni mai àwm e. 

2) Vertical social mobility : Hei ve thung erawh hi chu dinhmun hniam atanga dinhmun sânga invawrh thut emaw, dinhmun sâng atanga dinhmun hniama tlak thlak thut ang chi hi a ni ve thung a. Entirna atân Ruling party block president atanga Opposition block president-a tla thla thut ang chi hi Vertical social mobility chu a ni ve leh ta a ni.

3) Intergenerational social mobility : Hei ve thung hi chu generation inthlak a ni ber mai. Hmanlaia kan pi leh pute nunphung leh eizawnna kalsan a, tunlai thangtharte'n eizawnna leh nunphung thar an zawh hi a ni mai àwm e. Entirna atan lo nei dinhmun (Agriculturist) atanga thil siamna hmuna hna thawh (Industrialist)-a dinhmun inthlak ang chi hi Intergenerational social mobility chu a ni. 

Hmasawnna (Development) a ni emaw, dinhmun inthlakthleng (Social mobility) kan tih reng reng hi, a tlangpui thuin mipui rilru sukthlek, mipuiin kan duh leh duh lohah hian a lo innghat thui hlê mai a. Kan rilru sukthlek (Value system) hian kan ram hmasawnna leh mihring hmasawnna hi kawng tam takin a lo hruai thei a ni. 

Mizoram chu State pachhia, State intodelh lo kan ni kan inti thin a. Chu chu eng nge a chhan tiin han inzawt ta i la, chhanna tam tak a awm thei ang. Intergenerational mobility kan tih ang deuh khan generation lo thar hian hmasawnna kawngah pawh a key min thlaksak ta nual a. Vawiinah chuan zirnaah kan thanharh a ngai hlê mai. Hei pawh hi mipui leh pawlin (NGO)-in kan duhna a sàn leh hniamah a innghat thui hlê a ni. Khawtlang boruak (Social environment) siamtute chu mipui kan ni a. Social media kan hman dan leh kan ni tin nun dan hian engtin nge kan ram a hruai a, eng nge min thlen dawn tih hi mipui kutah thui tak a innghat a ni. Sawrkar kuta engkim dah vek tum a, mahni lam indah àwl daih mai hi thil awm thei a ni a; hei hi hmasawnna tithuanawptu a ni. Chuti ang zelin ram rorelna leh thingtlang hmasawnna te pawh a mipui lam hian chu lam kawng chu kan vei em? Hmasawnna chu kan duh tak tak em tihah hian a innghat thui hlê a ni. Tin, tunlai hmasawnna nena inhne rem thei tawh lèm lo, leklam fo remchâng chiah tawh si lo kalsan kan hrehna te pawh hi kan ngaih hlut zawng (Value system) kan thlak hleih theih loh leh social mobility lo awmin hmasawnna a ken tel theih kan man fuh tawk loh vang a ni a; hêngte avang hian ram hmasawnna (Development) kan tih te pawh hi a than kan tithu ve thei a lo ni.