Nula pheikhawk chhe siam Ramdinpuii

Sawrkar hna tha deuh thawh te chu kan duh vek alawm, mahse, Sawrkar hna in a daih seng si lova, mahni tuina lam hriat a chutah chuan rinawm tak leh taima taka thawh mai tur a ni.

B Lalramdinpuii hi B.Laltanpuia (L) leh K. Lalhunthari te fa pathum zinga upa ber a ni a, Electric Veng Lunglei ah kan khawsa mek. Kum 2017 khan a pain a lo boralsan tawh.

Nu leh Pa thawh chhuah sa ringawt ringa awm tawp chi a ni lova, mahni tal intodelh hram dan a ngaihtuah thin a, makeup lam hi a tuipui a, a hranpa a zirna pawh nei chuang lovin, a ma inzir chawpin 'Mo' te a chei ve thin.

Ramdinpuii hi Pheikhawk lawm leh ngaina tak a ni a, a phei khawk hlui deuh tawh te cheimawi a chei thar lehin mawi hnai takin a chhuah leh mai thin . Pheikhawk chhe siam kan han tih ang lawng hi chu a ni lova, a siamdan hi a danglam deuh a, Pheikhawk hlui a renovate ti ila, a dik ber ang. Pheikhawk la tha vek si, a rawng da vek tawh leh khawi emaw lai lo pawp/hmuar/rehtheilo kai te, a bikin hmeichhe high heels khawk rรขng ang chi te, leh pheikhawk rawng danga thlak a han custom tihdanglam ang te, Inneih Pheikhawk tur dangdai special deuh hlek a cheimawi ang chi te hi a khawih thin tlangpui te chu an ni.




A post shared by Ramdini Jazz (@ramdiniramdini16) on

Ramdinpuii hian Pheikhawk siam leh cheina hmanrua tha zawk a awm ngeia a rin avangin Google/ YouTube lamah te a zawng a, phone thar leina tura a pawisa neih chu, pheikhawk siamna hmanrua leina a tana hmangin a vawikhatna a tan a chah ve ta a ni.


 

Hmanrua pangngai tak a hman chhoh hnu hian hlut a hlawh ta hle a, Mizo celebs ho Vanlalsailova, Nunui Rualheng thlengin an pheikhawk hi an siam tir a, an vawrh lar chho zel a, thawh sen loh khawp hna a hmu chho ta thuai a ni. Mahni maia han siam zawh sen a nih tak loh avangin, a mah puitu tur hlawhfa a la a, heti chung hian a cheimawi tak hi chu a kuthnu ngei a nise a duh a, a mah vekin a khawih ta tho a ni.

Ramdinpuii hian, “A chang chuan mi pheikhawk bรขl han khawih reng chu nin deuh chang te pawh ka nei ve thin a, amaherawhchu ka pheikhawk siamsak tawh te hi an lungawiin, ka siam zawha an lo lam hian an pheikhawk rawn dah nilo ang maia ngaiin an lo hai vel ta thin a, min ti lawmin min ti phur hle thin. Min duhsaktute zarah Kumin February thla khan Doodarshan Kendra DDK te pawhin ka hnathawh dante hriain min rawn kawm ve a, ka lawm hle a ni.







Mi thenkhat chuanin nula a pumpa pheikhawk siam han nih ringawt mai chu a zialo em mai te pawh an ti a, a ni viau mai; mahse ka tuina a ni miau va., zahthlak em emah pawh kei chuan ka ngai lova, la in zir belh sauh sauh a chhunzawm zel ka tum, a ti.

Hriat a hlawh chho zel a, hmun hrang hrang atanga siam tur a an thawn ho la siamloh tamtak ala kawl a, Mizoram mai nilo State pawn atangte pawhin pheikhawk siam a, cheimawi tur hi a dawng tawh.
Zirna hranpa nei lova Youtube vel atanga in zir chawp a nih avang hian tuna Lockdown kal mek pawh a tan chuan inzirna leh pheikhawk siam nan te ka hmang tangkai hle.


 

Zan rei lama hnathawh a duh zawk a, a chhan chu, mi reh laiin a in sawr bing theih zawka a hriat vang a ni.

A hnathawh kawngah hian, a chhungten an tuipui em em a,a bik takin ka Pu hian a phak tawkah puiin a khawhpui a, pheikhawk siamtir tura lokal customer lo dawnsawn te thlengin a hrilh thin.
Zan lama a thawh thin avangin chhunah a mu tlangpui a, a chhungte hian an hriatthiam em em a, a lawm hle a ni.


 

Thalai puite hnena chah: -
Keimahah hian ka thalai puite tan zir tur tha a tam lo hle ang tih ka ring a, amaherawhchu, ka thil lo tawn tawh leh ka experience atangin tlem han sawi ila, a hmasa berah chuan tih hram hram peihna (teirei peihna) hi a pawimawh ka ti khawp mai. Thil tam tak ka lo ti kual ve duah tawh a, han beidawn changte pawh ka ngah ve thin. Mahse, Pathian zarah ka lo tih ve hram hram thinna khan tun dinhmun hi min hruai thleng ve niin ka hria. Mahse, tunah hian ka hlawhtling ta viau e ka tihna lampang erawh a ni lo.
Hmeichhia a pumpa Nula lehnghal ina pheikhawk chhia han siam tawp mai chu mi thenkhat hi chuan min nuihsawh chang pawh ka tawk thin. Mahse, han hnual phah nan leh beidawng a tawpsan phah nana hman ka tum ngailo. Heta ka hmuhfiah tak chu kan tuina,kan thiamna leh eizawnna te hi miin min nuihzat in fiamthu thawh nan te a min hman avang khan beidawng a hnual mai lovin,tumruhna leh hmalam pan zel duh nana hmang tangkai zawk turin ka thalaipuite hi ka fuih ve duh.
 
Sawrkar hna tha deuh thawh te chu kan duh vek alawm, mahse,Sawrkar hna in a daih seng si lova, mahni tuina lam hriat a chutah chuan rinawm tak leh taima taka thawh mai tur a ni.
Mizoram thalaite zingah nu leh pa te thawhchhuah sa ring ringawt lova mahni intodelh tum tamtak an awm tain ka hria a, a lawmawm kalo ti ve em em a. Ngaihsan tur dik ngaisang ila, kan inchawhphur (motivate) tawn a, phurna chuan a tha lama hmasawnna a ken fo avangin miin thil tha a tih hian in ngaisang tawn thiam bawk ila hma kan sawn phah thin.
Kan hnathawh a sang emaw a te a hniam emaw pawh nise rinawm tak leh taima taka kan thawh theih kha a pawimawh lai ber chu. A ninawm tih chang kan neih pawhin beidawng lova beih tang tang hi hlawhtlinna chu alo ni nge nge thin.
A tawp berah chuan engpawh thawk dawnin ti dawn la, rinawm/taima/huaisen taka thawk tawp ngam/ti tawp ngam nun nei neih a pawimawh.


 

- Lunglei Times


(The Lunglei Times in an kawmna, Lunglei Times editor phalna lakchhawn a ni.)



(A hnuaia fakna hi lo hmet ve rawh.)

Post a Comment

5 Comments

  1. Atha hle mai, ka ngaihsan zawng tak.. ๐Ÿ‘๐Ÿ‘

    ReplyDelete
  2. A chhuanawm kava ti tak em a rilru paw a puitling hle in ka hria

    ReplyDelete
  3. Mi chhuanawm tak a ni. Tlin lo chung leh tling lo chunga sawrkar hna beisei thin te tan chona a pe nasa hle. Ka thalaipui, ka nulat pui ka chhuang tak zet che.

    ReplyDelete
  4. Ropui hle mai a ngaihnawm bawk si EXPLORE MIXORAM in chhuanawm bawk e tiang tihna chang in hria A

    ReplyDelete
  5. Ropui hle mai a ngaihnawm bawk si EXPLORE MIXORAM in chhuanawm bawk e tiang tihna chang in hria A

    ReplyDelete

He post chungchanga i ngaihdan lo sawi ve rawh: