Aizawl | May 22, 2020: Prime Minister Narendra Modi chuan vawiin khan West Bengal leh Odisha state a cyclone Amphan in tun kara a nuai nasat na hmun te helicopter hmangin a tlawh.
Thlipui (cyclone) in nasa takin West Bengal a nuai a, hetiang hun harsaah hian Central Sorkar chu a hnungah a ding tlat a, a țul ang anga țanpui a inhuam reng a, Rs 1,000 crore țul leh mamawh hmasa zual (advance relief) atan Prime Minister Narendra Modi chuan vawiin Zirtawpni khan West Bengal pek a nih thu a puang.
West Bengal leh Odisha state cyclone Amphan in tun kar chhoa a nuai nasat lai leh chhiat tawh nasatna hmun te helicopter hmanga a thlir kual a, hei hi PM Modi-a thla thum dawn hnua hmun dang tlawha a chhuahna hmasa ber a ni.
PM Modi hi airport Governor Jagdeep Dhankar leh Chief Minister Mamata Banerjee ten an lo hmuak a, anni pahnih hian PM in thlipuiin a nuai nasatna lai helicopter ațanga a ennaah hian an țawiawm nghal bawk a ni. An thlir zawh hian Kolkata airport ațanga 50 km a hla Basirhat school tual zawlah an țum a ni.
PM Modi ho hian school ah hian review meeting an nei zui nghal a, Mamata Banerjee thlipui vanga chhiat tuarte chhawmdawlna tur central țanpuina tam zawk a dil nghal a, mi tam tak an in leh lo chante chhawmdawl nghal ngai an awm thu a sawi. Banerjee chuan mi 80 aia tlem lo cyclone avang hian an thi a, tam tak chu electric man an ni a ti.
Prime Minister thlen hma hian Mamata Banerjee chuan cyclone avanga chhiat tuar nasatna lai kawkin PM Modi chu he chhiatna rapthlak tak hi “national disaster” a puang tura a ngen tur thu reporter te hnenah a sawi.
Sorkar dan pangngaiah chuan chhiatna thleng fo țhin hi national disaster atan puan (notification) chhuah theihna dan a awm lo a, Central Sorkarin Disaster management rules tlawh chhana țanpuina a pek theih dan chhunga pawk deuh taka țanpui theih dan bak kawng dang a awm chuang lo a ni.
Mamata Banerjee hi hemi leh COVID-19 chungchangah hian, nimin khan a lo inhrosa tawh a, Central hian rang takin sum an rawn thawn tur a ni a ti. “ COVID-19 dona tur hian tun thleng hian Central ațangin cheng khat pawh kan la dawng lo," Chief Minister chuan reporter te a hrilh.
Nimin lama Press Conference a kohah CM hi a inhrosa chiam a, țanpuina hi ni 500 hnuah ni lo, rang takin kan dawng tur an ni tih thu a sawi bakah PM Modi chu cyclone-in thil a tih chhiat te a hmuna en turin a ngen bawk a nih kha.
He sawmna hi Prime Minister Office chuan chhanna a thawn hranpa lo a, mahse hemi hnu deuh hian PM Modi hian twitter kal tlangin West Bengal leh Odisha a tum thu a ti chhuak a ni.
- Huna Kawlvawm
Post a Comment
He post chungchanga i ngaihdan lo sawi ve rawh: