PM in Special economic package cheng vaibelchhe nuai 20 keng a puang; May 18 hmain Lockdown 4.0 kalphung tichiang dawn

PM chuan ram intodelh a India siam turin mipuite a sawm a; Atmanirbhar Bharat innghahna ban pawimawh tak tak pangnga a tarlang.

Kan ram  intodelhna atan sector hrang hrangah huaisen taka reform kan kalpui a ngai a ni: PM

Tun hi tualchhung a kan thil siamchhuahte ti lar a, khawvel huap a kan phochhuah hun a ni: PM

Aizawl | May 13, 2020: Prime Minister Pu Narendra Modi chuan niza khan ram mipuite hmaah thu a sawi a. Hripui leng mek vanga thite hriatreng an nih thusawiin Prime Minister chuan COVID-19 vanga harsatna kan hmachhawn ang  reng hi  kan la tawng ngai lova, mahse he indonaah hian keimahni kan invenhim mai bakah hmasawnna kawng zawh a hma lam kan pan a ngai a ni a ti.

Ram intodelh India

COVID awm hma leh COVID hnu lama khawvel kal phung sawiin Prime Minister chuan kum zabi 21 a India ram suangtuahna tihlawhtling tur chuan kan ram hi a intodelh a ngai a ni a ti a. Harsatna kara vanneihna kawng in hawng awm thei tarlangin entirna atan PPE kit leh N-95 mask a hmang a, tun hma lama India in a la siam ngailoh anni nachungin tunah hian India chuan nitin heng hmanrua hi nuai 2 a siam chhuak ziah thei tawh a.

Khawvel  zau zawk thlirin intodelh kan tih hian  kawhhmuh dang a neih tawh thusawiin Prime Minister chuan intodelh kan tih hi mahni tang hmahai nen thildanglam daih annih thu a sawifiah a. India-in kan ngaihdanah chuan khawvel hi chhungkaw pakhat kan ni a, India-in hma a sawn a pekchhuah a neih chuan khawvel pawhin hma a sawn phah dawn a.  Khawvel mihringte hmasawnna atan India hian tihve theih tam tak a neih ringin khawvel hian a lakah rinna a nghat thui hle a ni a ti.

India ram intodelhna tana innghahna ban pangnga

Lirnghingin Kutch a nuai chhiat dan sawiin Prime Minister chuan tuhruhna leh chhelna avangin an tho chhuak leh a ni a ti a. Hetiang chiah hian kan ram hi intodelh a siam turin tumruhna kan mamawh a ni a ti.

Ram intodelh India chu ban pangngaah a innghat ang a, chungte chu - Economy, bithliah awmlova hmasawnna a zuang zawng a thlentu tur; Infrastructure, India hmel lanna thlentu tur;  System, kum zabi 21na technology hmang tangkai zawng a kalphung neih; Vibrant Demography, India ram intodelh a siam tura kan thahrui lakna tur; leh Demand, kan mamawhna leh supply chain te a theih anga nasa a tih chak. Mamawh phuhru  thei tura supply chain a stakeholder-te tihchak a pawimawh thu pawh a sawi a ni.

Atmanirbhar Bharat Abhiyaan

Prime Minister chuan special economic package puangin Atmanirbhar Bharat atana thawkchhuak turin ram puite a sawm a. COVID vanga harsatna tawh do let tura sorkarin ruahmanna a lo siam tawh leh RBI in thuthlukna a siam belh bawm he package hian cheng vaibelchhe nuai 20 a keng a. Hei hi India ram GDP 10% hu a ni a. He package hian ‘Atmanirbhar Bharat’ tihlawhtling tura mamawhte a phuhru thei dawn a ni a ti.

Prime Minister chuan he package hian ram, hnathawktu, thil siam hralh leh lei, dan leh hrai te pawh a huam tel dawn a.  Cottage industry, MSME-te, labourer-te, middle class, industry-te leh a dangte tiamin mamawh leh tul angin chhawmdawlna pek a ni ang a.  Finance Minister in naktuk atanga tanin package sem chhuah dan tur kimchang zawk hi a puang dawn a ni a ti.

Kum ruk kalta atang a JAM trinity leh reform dangte’n a tha zawng a nghawng an lo nei tawh dan sawiin Prime Minister chuan nakin zel a COVID ang chi harsatna te’n nghawng thalo an neih nasat lohna atan ram intodelhna turin kawng hrang hrangah huaisen taka reform/kalphung thlakdanglam a ngai a ni a ti a. Heng reform-te hian agriculture a supply chain reform, chhiah lakdan kalhmang, dan leh hrai chiang leh hman awlsam zawk, thawktu leh financial system changtlung zawkte a huam a. Heng reform-te hian sumdawnna a sawh nghet ang a, investment a hip ang a, Make in India pawh a tichangtlung dawn a ni.

Prime Minister chuan intodelhna hian khawvel supply chain a intlansiakna atan kan ram hi a tha zawngin a buatsaih dawn a. He intlansiaknaah hian kan ram hian hnehna a chan a pawimawh hle dawn a ni a ti a.  Hemi hrereng chung hian package hi buatsaih a ni a. Sector hrang hrang atan theihna a tihpun dawn mai bakah quality tha zawk a awm theih phah dawn a ni.

Ram tana an tangkaina tarlangin Prime Minister chuan mi retheite, labourer-te  leh a dangte chhawmdawlna atan package chu hman anih tur thu pawh a sawi a.

He harsatna kan tawh mek hian ramchhung leh tualchhung a siam chhuahte, tualchhung sumdawnna te leh tualchhung supply chain te pawimawhna min hmuh thiam tir a ni a ti a.  Inkharkhip chhung hian kan mamawhte hi tualchhung a siam chhuahte’n min phuhruk sak a.  Tun hi tualchhung a kan thil siamchhuahte  ti lar a, khawvel huap a kan phochhuah hun a ni a ti.

COVID hrileng kara nun hman

Prime Minister chuan mithiamte leh scientist tam takin hun rei tak chhung virus hian min chamchilh dawn a ni an tih thu a sawi a. Mahse, he hripui leng hi kan inhren beh tir reng tur a nilo a ti a.  Ram mipuite chu  mask vuah a, ‘do gaz doori’/midang nena inhlat a hun hmang chung a an thil tum leh tihtur tul thawk turin a fuih a ni.

Inkharkhip tum li-na chungchangah, hun hmalama kan tih tawh dan nen chuan a danglam vek tawh dawn a ni a ti a. State atanga rawtna an dawn khawm behchhanin kalphung tur duan thar a ni dawn a, hemi chungchang a hriattirna hi May ni 18 hma a tih chhuah a ni ang a ti.

- PIB