Mizo hi unau vek em ni in nih?'

Hyderabad-a vanduaina tawka boral ta R Zonunsiama ruangin Aizawl a thleng a, ambulance khalhtute pahnih zawhna chu 'Mizo hi unau vek em ni in nih?' tih a ni.

 Ambulance khalhtu Jagan U Veeraiah leh M Jangaiah Goud M Narsimha te chuan Mizoin an lo hmuah dan leh dawnsawn dan te an hmuhin mak an ti a, 'Mizo hi unau vek em ni in hi?' tih chu kawng tluana an zawhna a ni.

 R Zonunsiama thiante pathum, Johny Lalhmangaihzuala, Lalhunmawii leh Lalfakmawii te'n Aizawl an panpui a, Johny-a chuan driver pahnihte hian Hyderabad atang khan mak an ti tawh tih a sawi.

 Hyderabad Mizo Association-in pa chan changa an buaipui dan te an hmuhin, a tu hi nge a nu leh pa tih te an zawt a, an chhungte an ni lo tih an hriatin mak an ti tawh a ni awm e.

 Birpara-ah North Bengal Mizo Welfare Association-in lo hmuakin tawngtaina hun an hmanpui a, eitur te an lo pe bawk. Birpara-ah hian mak an ti a, an chhungte pawh ni lovin chutia an lo hmuak chu mak an ti. An kal zel a, Borapani-ah te, Silchar Mission Compound-ah te Mizoin an lo hmuak leh. Vairengte-ah R Zonunsiama te veng Bethlehem veng khawtlang hruaitute leh Central YMA hruaitute'n an lo hmuak a, Kolasib-ah te, Silchar tlang dung khuaah an lo hmuak bawk. Khaw thenkhatah chuan hun lo hmanpui lovin kawng sir atangin kut an lo beng bawk.

Kawng lakah lo hmuah an ni.

 Anmahni lo hmuaktute'n thilpek an lo pe te, eitur an lo hlui te chu mak an ti a, an chuanpuite an zawt nawn leh thin.

 "Mak an ti a, ropui an ti a. 'Mizo hi unau vek em ni in nih?' min ti a, an chhungte ni lovin an lo hmuak hi mak an ti a. Pawisa leh thil dang an dawng te hi mak an ti a, ropui an ti," Johny-a chuan a ti.

 "Min zawt leh thin a, kan chhang thiam vak lo a, 'Mizo unau, Mizoram unau vek kan nih hi,' tiin kan chhang thin," a ti bawk.

 "Mak an ti bawk a, 'Mizo hi unau vek in ni em ni?' tiin min zawt reng mai a. Hetiang hi an lo ngaihtuah ngai loh thil a nih thu an sawi," Johny-a chuan a ti.

 Thawhlehni tlai dar 5 vel khan Aizawl an thleng a, R Zonunsiama ruang phurtu leh a hawpuitute hi Beraw Tlangah khung hran nghal an ni. Driver pahnihte hi chuan Nilaini-a kir leh an tum.

- The Aizawl  Post | May 6, 2020