COVID-19 Vangin ZOOM Siamtu Eric S Youn a hausa? Tiktok hmangtu an pung hluai

Aizawl | May 18, 2020: COVID-19 vangin ramtin leh mitin mai hian sumdawnna kan tlak hniam phah a, an bankrupt sup sup laiin ZOOM founder Eric S Youn erawhin pheihchham a man a ni ringawt!

COVID 19 vanga mipui inhlat a tul laiin meeting pawimawh leh rorel pawimawh tak tak thulh theih loh a awm a, chuti kar-ah chuan ZOOM hian video conference a tih theih avangin miin an hmang nasa em em a ni. Ni e, Mizoram-ah pawh class lak nan mai bakah fellowship neih nan-te pawh hman hial a ni a, Zirna in tam takin an zirlaite zirtirna pek nan an hmang nasa hle nia hriat a ni bawk.

Hetiang a lo nih takah chuan, kan ngaihtuah phak bakin ZOOM Video communication, Inc  dintu Eric S Youn erawhin lockdown karah a lo hausak phah a. Khawvel a buai laiin a tan vanneihna a inhawng a, Ar lungchhia, Sanghar lunglawm a chang zo a ni ber.

2020 kum tir atang khan 87% zetin Video conference hmanna hi a sang a, hmangtu 87% laiin an pun belh a ni. Hetiang a nih lai hian 2017 a 'We do not want to grow too fast," tia lo sawitu Eric S Youn hian a tum leh duh loh malsawmna a tawng a ni a tih loh theih lo.  A apps hmangtu an pung a ni mai lova, revenue a pung a, a tan khawvel thar a inhawng a ni hawt e.

ZOOM apps hi mi hriat leh hman hlawh ber a tling chho zel a, 2020 January khan Company share pawh U.S Dollar mtd 70 hnuai a ni a, March thla ral khan Dollar mtd 150 leh thla thum hnuah a let hnihin a pung chho a ni. 

Tunah hian ZOOM hian hnathawktu mi 2500 chuang neiin, company hlut zawng pawh 42 billion dollar a tling tawh a ni. A dintu Eric S. Youn hian share 22% a nei a, kum khat chhungin U.S. dollar 7.8 billion a la lut tawh a, a company din atanga kum 9 chhungin khawvel mi hausa ber 300 zingah a lang pha tawh a ni.

 

Tin, Hetih lai hian Tiktok pawhin hma a sawn nasa hle a, December 2019 ah apps download-tu 1.5 billion an nih laiin, COVID 19 vanga lockdown hnu-ah erawh 2 billion a kai nghal dawrh mai.

2016 kum tawp lama din Tiktok hi 2018 a Musical.ly nen zawmkhawm a nih hnu khan hma a sawn nasa hle a. Kumin chhung hian hma a sawn nasa zual hle a, an revenue pawh a nep lo hle a ni.

ZOOM leh Eric S Youn

Eric S. Youn hi China ram Tai’an khua Shandong Province-ah 1970  khan lo piangin, a pa chu Mining Engineer a ni. Kum 1987-ah College a kal tan a, a ngaihzawng hmu turin darker 10 rel chuan a ngai a.  Chutiang vang chu a ni mahna,  Hun tam tak khawhral lo a, duh hun huna inhmuh leh inbiak theihna tur Video Telephony Software siam chhuah a tum ta a ni. 

Shandong Science and Technology University atanga a graduate hnu Japan rama kum 4 hna a thawh lai, 1994 kuma Microsoft mihausa Bill Gates-a thusawi a ngaithla a, Technical Company-te fuankhawmna America ram Silicon Valley-a kal a chak ta em em a ni. U.S. Visa vawi 8 a dil hlawhchham hnu a vawi 9-na Visa a dil leh chu a hlawhtling ta a, 1997-a kum 27 a nih kumah U.S.A a lut thei ta a ni.

Silicon Valley-ah chuan a thiltum tihhlawhtlin tumin Webex company-ah Videoconferencing start-up ziahnaah software engineer-in a thawk a. 2007 kumah Cisco Webex company a lo ni leh ta a,  amah pawh a thawh that em vangin Vice president of engineer nihna a kai chho a ni.

Kum 2011 vel atang smart phone a rawn lar chho a, smart phone-a hman chi smart phone-friendly Video Conferencing App a buatsaih chu an hruaitute’n an hnawl sak avangin an company chhuah san a, company thar din ve a tum ta a. Dinhmun tha leh hlawh tha tak chhuahsan chu a nupui chuan a huphurh pui khawp mai a, mahse, nun thar hmachhawn turin huaisenna a nei a, a tihsual loh zia kan hmuchiang awm e.

Kum 2011, April ni 21 khan a duh angin ZOOM company chu a din ta a, 2013 kumah a video conferencing software chu market-ah a pho chhuak a. Mi lawm a hlawh hle a, May thlaah hmangtu mi maktaduai khat an tling a. Kum li liam hnu 2017 kumah ZOOM company chu US Dollar 1 billion man a rawn ni chho a, kum 2019 April khan Public company ni chho in kum tawp lam COVID-19 a awm tan khan hmangtu maktaduai 10 a tling pha a, 2020 March thlaah chuan hmangtu mi maktaduai 200 a tling chho leh a, company share hlutna pawh a sang tawh hle a ni.