Champhai DIPRO hovin MJA leh Miss Mizoram ten ramri vengtute tlawh

Champhai | May 13, 2020: Champhai DIPRO Dr Lallawmkima, MJA Champhai, Miss Mizoram 2020 Zirsangpuii leh Miss Mizoram 2020 pathumna Lalmuansangi te chuan vawiin khan Champhai District chhung India leh Myanmar ramri dep Tiau lui kama duty Police, VLTF leh YMA te a hmunah kala tlawhin an hmalak dan tlangpui leh ruahmanna-te a hmun-ah an hmuhpui a. Ram leh hnam himna tura an hnathawh fakawm ti a lawmthu hrilhin, an thlawpzia an lantir a. VLTF te hnenah tanpuina sumfai an hlan bawk a ni.

Champhai DIPRO Dr Lallawmkima, chuan Covid-19 hripui leng laka fihlim tuma thahnemngai taka ramri venga rammute Sawrkarin fakawm a tih thu leh an mamawh angte a tul ang zela a buaipui sak thin thu a sawi a. MJA Champhai District Member-te, Miss Mizoram leh 2nd Runner up ten ramri a duty post te tlawha an thlawpzia an lantir chu thil finthlak leh entawntlak tak anih thu a sawi a. Ramri zawng zawng tlawh vek sen ni lo mahse theihtawp chhuaha ramri venga rammute an hriatreng thu leh an tana an tawngtai sak reng thu a sawi bawk.

MJA Champhai District President Lalhmingmawia Pachuau chuan ramri hrula hnam pasaltha engmah phut let leh thilpek beisei lova ram leh hnam himna ngaipawimawha duty mekte chhuanawm a tih thu a sawi a. Mizo hnam tlawmngaihna ti par vula chhawmnungtu an ni tiin, ramri dep khuaten an ram chhunga duty te an thlawp thinna chu fawkawm a tih thu a sawi a. Sum leh paia intanpui vek sen nilo mahse an hnathawhte Chanchinbumi ten an thlawpa an ngaihven reng thu a sawi a ni.

Miss Mizoram 2020 Zirsangpuii chuan, hnam chhan nana thawkchuakte a hranpaa tanpui theitu ni lo mahse an thil tihte a hmun ngeia kalchilha thlawpzia lantir tha ti a kal an nih thu a sawi a. Hun tha chhawpchhuah saktu MJA te chungah lawmthu a sawi a, ramri vengtu hnam pasaltha te ram leh hnam himna tura theihtawp chhuah zel turin a sawm a ni.

Miss Mizoram 2020 pathumna Lalmuansangi chuan, lu chhum ban chhum huama thawkte ngaihsanna chang hriat a hun hle thusawiin, kan ram tana thawkchhuakte hian inpekna thuk tak an nei a, mipuiten thinlung taka kan thlawp zel angai ani, a ti bawk.

VLTF leh ramria rammu mekte chuan Tiau kam khuate leh ramri hrula Duty-te ngaipawimawha lokal DIPRO kaihhruai MJA Member, Miss Mizoram leh 2nd Runner-up te chungah lawmthu an sawi a. Ram leh hnam himna tura theihtawp an chhuah zel dawn thu sawiin, mipuite thlamuang taka awm turin an chah a ni.

Vawiin hian DIPRO, Chanchinbumite leh Miss Mizoram te hian Bulfekzawl Tiaua Haubawnga Kai, Hnahthial Kai leh Zokhawthar Tiau hrula YMA leh Police duty post hrang hrangte bakah ramri dep khua VLTF te a theih chen chen an tlawh a ni.

Vawiin fehchhuahnaah hian DIPRO Champhai, Miss Mizoram leh 2nd Runner-up te bakah hian MJA Member 11, Champhai atangin pawl member 9 leh Khawzawl atangin pawl member 2 te an tel thei a ni.

- DIPR

Muansangi thlalak hrang hrang HETAH hian a awm e.

Muansangi chanchin chhiar duh tan HETAH hian dah a ni.

Muansangi chungchang post dang HETAH hian a awm e.