BRINKMANSHIP STRATEGY- KAN HMANG THIAM VE ANG EM?

-Zohmingthanga Pachuau

Columnist, Explore Mizoram

Brinkmanship tih tawngkam chher chhuaktu chu Adlai Stevenson a ni a. Philosophy a sawiselna (Criticism)-a a ziah a ni a. Cold war laia US president, Eisenhower administration hnuaia Secretary of State John Foster Dulles hunlâia interview a neihnaa a sawi a ni a. He article hi Life Magazine-ah chhuah a ni.

A awmzia chu hun harsa leh khirh, hun ralmuang lo tak- ram leh ram inepna karah chan tha zawk chan inbeiseia risk làa (Willing to risk) hamthatna zawnna (Persuit of an advantage) tihna a ni mai àwm e.

International politics-ah hê tawngkam hi a mikhual lo hlê a. A bîk takin Cold War hunlâi- US leh Soviet Union inepna boruakah khan nuclear weapon hman mai duhnain bipolar politics kha a lian a nih kha. Khatih hunlâi khan US khan hê policy/ military strategy hmang hian USSR kha a rùm-thaih a; chumi avang chuan nuclear war êm thleng lovin boruak a dài thei ta a nih kha. Cuban missile crisis-ah pawh khan 'Brinkmanship' strategy hi hman a ni. Khatia indo tak tak si lova boruak a inmung ut ut mai kha ram pahnih tân khan a tha lo ve ve a, a expensive bawk a ni. An boruak a alh hman têp a, ram pakhat zawkin a kaw tàwpa ram pakhat zawk a nawr tawm tâwkna khan ram pahnih in-withdraw-na a thlen thei ta hram a nih kha.

John Foster Dulles-a'n Brinkmanship chu, "The ability to get to the verge without getting into the war is the necessary art."

Ram leh ram inhmuh thiam lohna avanga boruak lum inep ut ut mai kar a, chan tha zawk chuha a ko tlâng hmawra rawn pèn chhuahna avanga indo êm chhuak lova- ram pahnih inepna lo tàwp thei ta chu thil tih mâkmawh a ni a ti.

Kan ramri chungchang (Issue)-ah hian hê strategy hi play i la tih hi Pu C. Chawngkunga thusawi ka ngaihthlak atangin ngaihtuahna min neihtir ta tlat mai a. Kan ramri chungchang chu kan hriat angin hun rei tak Assam nen kan inep ut ut reng mai a. Assam lam chan a tha chho hret hret em ni chu aw tih theih turin a hmawr, a ko tlâng (Verge)-ah an rawn tawlh hret hret bawk a. Hmanlâi anga indo, silai hmeh puah mai mai a harsa tulh tulh ta bawk nèn. A pèn chhuak hmasa, a ko tlâng rap hmasa ta na ná na chu kan Pathian thuin, "I rah chin apiang i ram a ni zèl ang" a tih ang deuhin an rah chinah Status qou kan siam (Maintain) ta ringawt mai zèl chu a nih hi. Kan rama miin sakhaw chhinchhiahna lung an rawn phun emaw, an rawn sak tawh chuan invuak chhiatsak hi a har lutuk tawh. Chumi strategy têa chu Assam khuan an rawn play ngar ngar ni hian ka hre thin.

In hmun inchuh mai maiah pawh hian han ngaihtuah teh. A thenawm nêktu chan hi a tha zel mai chu a nih hi. A lehlamah a thenawmpa ram a nêk avangin dàn angin miin court-ah a kal thlap thlap ngai tawh lèm lo. A in ban a phun tawh ngat phei chuan vuak thiahsak a har viau tawh thin. Chumi advantage-a latu vanneihna ni tà chu- mi ramri a nèk emaw, a ko tlâng a va rah avang khan boruak chu lum ve deuh mah se, buaina lian tham chhuak lovin a ram chu a nei hlen ta thin a, chu chû brinkmanship approach chu a ni.