Aizawl | May 27, 2020: BSEB( Bihar Board ) chuan 10th result 2020 chu nimin May 26, 2020 khan online hmangin an puang a, lo neitu rethei tak fapa, online hmanna tur smartphone/laptop an chhungkaw zinga nei lo, Himanshu Raj chu pakhatna a ni.
Bihar Board hian Matric Result 2020 hi online onlinebseb.in leh biharboardonline.com hmangin an ti chhuak a.
Himanshu Raj, Bihar Rohtas khua ami chu pakhatna a ni. Mark 500 ațangin 481 a hmu a ni. Kum 15 upa hian Bihar chhunga Matric exam ve dang zirlai 14.94 lakh te khum vekin pakhatna dinhmun a hauh ta a ni.
Nimin lama Bihar Board in result a tih chhuah taka pass percentage 80.59% a ni a, pakhatna dinhmun hauhtu Himanshu hi a pa loneitu niin nitin lo lamah a feh țhin a, a fapa hi zanah lehkha a zirtir țhin a, a nu pawh in nghah paha a țul apiang thawk a ni.
"IIT (Indian Institute of Technology ) ah engineering zir chhoh ka tum a, class 11&12 ah science ka zir ang a,
JEE exam (entrance exam for engineering) tling turin kumin ațangin ka in buatsaih nghal ang, software engineer nih ka tum" a ti. Electronic lam a tui thu leh computer hriat chian leh zual a duh bakah hna a thawh dan te thiam a duh thu telephone a Indian Express in a biaknaah a sawi.
Himanshu hian mark 96.20% a hmu a, inthlahdah hauh loa a zirna chu a hlawhtlinna chhan niin a sawi. "Zirlai tam ber hian exam hma thla tlemte ațangin an zir chauh țhin a, reilote chhung an zir a, an chawl leh țhin. Thiam tak tak tur chuan nitin thiam duhna tak tak nen nasa taka zir a ngai. Kei pawh ni khatah darkar 12 tal ka zir țhin. Ka pa hian zanah min zirtir țhin a, kan zirtirtute pawhin school ban hnuah ka hriatthiam lohte min zirtir bawk țhin" a ti .
Coronavirus pandemic avangin school khar a ni a, an zirlai tam tak WhatsApp or digital modes, hmangin zirtirtuten an thawn țhin a, mahse an chhungkaw zingah smartphone or laptop nei an awm loh avangin online education zawm chu a tan a harsa khawp mai.
“Smartphone kan nei lo a, kan in bula ka nu (paternal uncle’s wife) chiah hian a nei a, ka unaute, keimah, ka u hmeichhia leh ka pa unau fa te zawng hian chu chu lockdown chhunga zirlai an rawn thawn te lo enna atan kan inhman chhawk țhin a, hun bi kan nei hrang vek a, buaithlak chang a tam duh hle a ni. Lockdown vang hian kan sum dinhmun a chhiat phah hle a, kapa hian kan țhenawm hnai class 7 - 10 zirlaite hi kan inah man chawiin lehkha a zirtir țhin a, an lokal theih tak si loh avangin kapain sum a hmuh theih tur a hmu ta lo a, kan harsat phah hle a ni".
Pakhatna a ni tih an hriatin an lawmin an hlim hle a, a țhiante, chhungte tam takin an lawmpuina thu phone in an hrilh a, a farnu pawh hi nikumah matric ah 88% a lo hmu tawh bawk.
Kumin Bihar Board class 10 result nimina puan takah hian top 10 ah 41 lai awmin Himanshu Raj hi pakhatna a ni.
Bihar thingtlang kil khawr tak ațangin School satliah ve tak ațanga zirna lama inelna sang taka pakhatna dinhmun a ni thei hi a chhuanawmin Bihar state mai ni lo India ram chhung thingtlang school naran taka zirlaite kaiharhtu ni se, khawpui school țha ațang kher lo pawhin pakhatna a nih theih a ni tih hrilhtu lo ni teh se.
Source :
The Indian Express
May 25, 2020
@ 8:42 PM IST
===27==05==20==
- Huna Kawlvawm
Post a Comment
He post chungchanga i ngaihdan lo sawi ve rawh: