ZORO Thalaiin Mizo tlangvalte chunga thil thleng dem

Aizawl | April 20, 2020: Zo Re-Unification Organisation (ZORO) Thalai Headquarters chuan thuchhuah siamin, April 18, 2020 (Inrinni) a New Kawnpui a Covid-19 avanga 5th IR Batallion aṭanga duty Mizo tlangval pahnih C Lalhruaitluanga S/o Lalnunsanga, Republic Vengthlang leh Zairemmawia S/o R Vanlalsawma, Hlimen  te, Takam misual ten rawng taka sawisain dimna tel miah lova kut an thlak chu hriatthiam har an tih thu an sawi.



ZORO Ṭhalai chuan, Heng kan unau pawisawi lo kut thlaktute hi an phu tawk hremna pek an nih theih nan Sorkarin a hmalakna kal mekah tha thlah lova, misualte hi man an nih hma chu zawng ngawrh sauh sauh turin ZoRO Thalai Headquarters chuan a phut tlat a ni.

ZORO Thalai chuan he thil thlenga pawikhawihtute hi hrem lovin an chhuak ang tih hi a hlau a, an pawikhawih rah hi tel ngei se ZORO Thalai chuan an duh tih an thuchhuah-ah hian an tarlang.

ZORO Thalai chuan, Kan ram chhungah ngei, mikhual chamrei huangtauin a ram neitu zawk zahna leh dimna nei miah lova rawng taka kut an thlak ngam zialo an tih thu sawiin, Hetiang thil a thlen nawn tawh lohna turin heng mikhual chamrei te hi an nihna hrilh hre tur leh an chanvo hrilh hre turin ZoRO Thalai Headquarters chuan hma lak an tum niin an thuchhuah chuan a tarlang.

Post a Comment

0 Comments