Aizawl | April 24, 2020: Sports & Youth Services Minister leh Aizawl East II Bialtu MLA Robert Romawia Royte chuan vawiin khan a bial chhung-a chhungkaw 200 tan Puanthui khawl a sem.
Sports minister Robert Romawia Royte chuan, COVID-19 hripui dona kawngah a bial chhung Local Task Force Chairman leh member-te chu sawrkar laipuiin a duanchhuah Lockdown thawhhnihna Guideline chu May ni 3 thleng khawng taka kalpui zel turin a fuih thar leh a.
COVID-19 hripui laka invenna tura sorkar laipuiin hmai tuamna (Face Masks) mipuiten vuah vek tura min beisei avangin Minister Pu Robert Romawia Royte chuan a bial mipuiten mahni chhungkua leh mi dangte hman tur Face Masks thuia an intodelh theih nan, chhungkaw 200 hnenah Puanthui Khawl 200 MLA Fund atanga a ruahman chu a sem a. Puanthui Khawl dawngtute chu an khawl dawn dah tha mai lova, tunlaia mipui mamawh Hmai tuamna tam tak an thuichhuah a beisei thu leh a hnu zelah pawh tangkai taka hman a phut tlat thu a sawi.
Minister Pu Robert Romawia Royte chuan COVID-19 hrileng laka Mizoram mipui kan him theih nan ramri hmun hrang hrangah Mizo thalai leh mi tlawmngai tam tak chhun zan zawma an duty laia mahni ina awmte kan inthlahdah a thiang lova, mitthi vuinaahte pawh sorkar thupek ding lai zawma social distancing ngai pawimawh turin Local Task Force Chairman leh kal khawmte a chah nawn leh a ni.
Minister chuan tunlai khawvelah IT hman uar a tul thu sawiin COVID-19 leh a kaihhnawih harsatna chungchangah online-a dil leh report theihin engkim Sorkarin a ruahman a, mipuiin hman tangkai lehzual i tum ang u, tiin a sawi bawk a ni.
Minister Programme hi AMC Ward No IX Councillor B Lalawmpuii'n kaihruaiin AMC Mayor PC Lalhmingthanga pawhin bial chhung mipuite an theih ang tawka fimkhur tur leh sorkar leh LTF te thu zawm turin a sawm bawk a ni.
Post a Comment
He post chungchanga i ngaihdan lo sawi ve rawh: