RAMCHHUNG AṬANGA RAMPAWN VEI AU THAWM!

- Kenny Muankima

Rampawna tangkhang mekte hmakhua ngaia sorkar a lo karpui ve takin tia ka au nasat luatah Sorkar dem ang lek leka min ngai tawk an awm ta nak nak a. Chutianga an ngaih theih khawpa ṭhahnem ngaia min lo hmu erawh a lawmawm ang reng.. ☺️

Pandemic Outbreak la hmachhawn ngai lo state kan ni a, a luhaithlak turzia leh kil tinah demna hlir an hlawh chhuah turzia hria a, khua leh tui ṭhain a tih awm tak, sorkar kawng kawhhmuh ve tuma lo au ve chhen ka nih erawh Sorkar hian a hriatthiam hun a thlen ka la ring cheu.. 🤗

Kan hnam hi kan tlem em em mai a, inlungrual lo tham pawh kan ni lo. Chutih rualin kan rethei em em mai piah lamah kan dinhmun pawh a la inthlau ve zing zeng leh ta nghal a, lungrualna nen lo chuan he pandemic hi kan hneh dawn lo tih hi ka chiang ngam sak. Chumi avanga humanist in a ngaihtuah awm thil te ngaihtuah a, lungrualna kawng dap si a, kan tana ṭha tur ka ngaih te au chhuahpui ṭhin ka ni a. Mahse, a chang hi chuan ka bei a dawng ve rum rum ṭhin.. 🤦



Covid-19 Test kan la nei tlem viau na a, kan neih chhun chhun te hi a dik a nih chuan kan state chhungah chuan he hripui hi kan dangchat thei mai dawna a lanna chin a awm a. Chutih rual chuan ṭhenawm state aṭanga hnamdang rawn luh dan en hi chuan kan la hmachhawn dawn chauh ni pawhin a ngaih theih lawi.. 🙄

Tun dinhmuna he pandemic outbreak a mutan lian ber chu rampawna tangkhang, a bik takin hnathawka awm te hi an ni a. Anni pawh hi keini ang bawka dinhmun inthlau tak tak an ni hlawm. Ṭhenkhat chu taima taka thawk te, ṭhenkhat lo zel thel kual leh heheu deuh te, ṭhenkhat mahni thawhchhuah mahnia hmang tawp leh chhungkaw chawm tura Zoram lama rawn thawn ṭhin te, ṭhenkhat sing 2/3 hlawh leh ṭhenkhat sang 6/7 hlawh te pawh an ni ang. Tunah pawh hian an thlaphan dan in ang lo tak a ni.. 😣

Mahse, a tam zawk ngaih danah chuan phaia hnathawk ve thei meuh meuh ngah nge saving an neih loh? An ban a nih te chuan an thawk ṭha lo a niang chu! tiin ngaihdan tumtlang deuh deuhin awmhmun aṭangin kan lo deng dawp dawp hi chu Mizo kan ni ve ta lo emaw tih mai a awl a, Kristian kan ni lo zawk emaw ni le tih rum rum a awl. 😔

Mizo kan nih a, Kristian kan nih chuan 'humanist' kan nih vek hi ka lo ring ṭhin a, mahse a lo ni lo nasa! 'Humourist' pawh kan lo ther fer fur a lo ni! 😏

Kan ṭawngkam khat hi tu emaw tan a dampui sawng sawng theih laiin, kan ṭawngkam khat vek hi tu emaw chuan a lo natpui ngawih ngawih thei a. Thu hian thil a ti thei em a, dam leh thih a hril thei tih hi chiang tlang vek ila a duhawm mang e.. 🤔

Thu dengkhawng tak tak kan chhahchhuah hma hian heng hi hre thei ila ka duh ṭhin mang e!

1. Ram pawna hna thawk te ṭheuh ṭheuh pawh hi an harsatna tawh a in ang lo nawk ang bawkin midang dinhmun hrethian pha lo tam tak an awm.

2. Chutiang bawkin mi dik lo leh he hun remchanga lak tum tlem a zawng pawh an awm.

3. Ram pawna hnathawh vanga sum hi save ngawt theih a ni bik lo a, chhungkaw dinhmun in an loh vang leh hlawh chhuah in an loh vangin a taima leh fel ṭheuh ṭheuh pawh an dinhmun hi inang lo tak tak an tam mai.

4. Ram pawna hnathawka chhuak tam zawk hi chu Mizoram sorkar ah hna kan indaih loh vang te, lehkha thiam tak ni lem lo chhawr duh tur Private Firm kan neih loh vang te, chhungkaw dinhmunin a zir loh vang te, loh theih lohna vang zawka ram pawn pan an ni zawk mah a. Theih ni se mahni khawtual ngeia hnathawh duh chu a tam zawk an ni ngei ang.

5. Ram pawn a nih vang hian hlawh a ṭha bik ngawt lova, qualification leh experience a zir zel a ni ber a. Sing kai lo hlawha rampawna hnathawk hi tam tak an awm, a tam zawk an ni mah ang.

6. A nihna takah chuan, a percentage in chhut ila, a hlawh tlem lamah hian chhungkaw tana ṭangkai zawk an tam zawk hialin a rinawm. An retheih em avanga, eng emaw zah tal lo thawhchhuah ve takin tia ram pawn lam hawi ta, an thawh chhuah aṭanga theih ang anga chhungte thawn ṭhin Mizo ṭhalai fel tak tak kan neih hi hmuh hmaih lo hram ang u.

7. Hlawh tlem si, inren em em chunga theih anga tam chhungte tawn tum ṭang ṭang te tan hian saving chu haraa fat tur a ni. Khawpui apiangah nun man hi a to zel bawk si a. Chutih rualin saving hi a thei tan chuan neih ngei ngei erawh a ṭha thlawt tih pawh an hre ve tho ang, an chhungkaw dinhmunin a zir loh vanga save thei chuang lo pawh an tam ang.

8. National Lockdown an han ṭan a, Firm tenau te chuan thawk lova hlawh pek reng ai chuan unpaid leave angin an kalpui a, ṭhenkhat phei chuan class 8-12 standard ho an ban duak bawk a. Chu mai a ni lo, firm tenau zingah an kal theih chin zawng pawh hlawh la pe thei lo leh la pe tla zo lo tam tak an awm bawk a.

9. Buai miah lo hi chu an awm kherin a rinawm loh, Pandemic Outbreak awmzia an hria a nih chuan. Heti chunga an thlaphang chhe te aih lo a nih chuan an hausa tawn taw a nih loh pawhin an khawthlir a tawi ve hle te pawh a ni mahna..

10. Chutih rualin tangkhang zingah hian Mizo damlo phai lam inentira chhuk thlaa tangkhang zui te, zin khawthawng laklawh haw kawnga tangkhang ta te pawh an awm nawk dawn a. An sum ken an indaih bik lo tawp ang, Zoram aṭanga support tu chhungkua an neih loh phei chuan..

11. Pandemic outbreak in a hrin tel chu inflation a ken tel bawk si avangin, saving nei tan pawh inkhawl sa hi hman zawh a har viau lo mai thei. Engtia rei nge kan la in lockdown dawn lah hriat loh..

12. Hripui lenlaia lockdown in a hrin tel chu mental health a khawih tel fo hi a ni a, hei hi kan hmachhawn vawikhatna a nih miau avangin kan hrethiam lem lo a. Mahse rampawna tangkhang te hi chuan an hrethiam tawh viau hlawm mai thei bawk a.

13. Thil hrang hrang vangin a hunah tak hmalak a nih loh chuan nunna hial chan theih a nihna hi a awm nawk bawk a.

Sawi sen chi a ni lo a, ziah kim sen rual a ni lo ang. Mahse hei erawh hre reng ila ka duh. Mi pangngai phak ve hram tuma hlauthâwng tak chunga huaisen taka rampawn lam pan ta te zingah hian keini aia chhel, keini aia fel, keini aia taima an tam ang. A ṭha lo zawk mi tlem te hi Social Media ah an lansarh hluai ṭhin avangin tehfung pakhatin i teh ngawt lo hram ila a va duhawm tehreng em.. An dinhmunah chuan ding ta la, tuna an chanchin i sawi ang chiah khan i chanchin sawiin an laka i rilru put ang chiah khan i lakah rilru lo pu ve ta ila, nuam i ti bik meuh ang maw!? 😏

Lockdown hi an pawtsei zel a, khutia an tawmsen reng a nih phei chuan nunna hial la chân phah theih a ni a, a state mai ni lo, a ram leh hnam ang mualphona leh luhai zual zelna pawh la thleng thei a ni a. Chu zawk chu bengsika kan ngaihtuah tlan a ngai a ni zawk lovem ni? 🙄

Mizoram hi tupa ta bik mah a ni lo, ZOFA te zawng zawng tan a ni a, ZOFA te ta a ni. Chuvangin inthlei lovin, inthliar lovin, Mizo Mizona hi lungrual taka humhim i tum zawk teh ang u.. 🤗

Post a Comment

0 Comments