Naktuk atangin Hmarchhak state a tangkhangte hruaihaw dawn;

Aizawl | April 29, 2020: Exodus lawng hmanga Juda-ho hruai haw an nih ang khan Mizoram mipui hmun danga tangkhangte pawh Mizoram-ah hruai haw an ni dawn ta.

Chief Minister Zoramthanga chuan Mizoram mi Tripura, Meghalaya, Assam leh Manipur-a tangkhangte hruai haw an ni dawn, a ti.

Ruahman lawk ang chuan, Heng state pali a tangkhangte hi April 30 atanga May 2 inkarah lakluh tum an ni a. Assam-ah mi 154, Manipur-ah mi 318, Meghalaya-ah mi 201 leh Tripura-ah mi 20, an vaiin mi 693 te lakluh tum a ni.

He thu hi nimin khan Mizoram mipui hriat tur thuchah a sawi laiin a sawi chhuak a, State thenawm a tangkhang te engtinnge Mizoramah hruai haw an nih theih ang tih sawrkarin a ngaihtuah a. Thlawhna leh rela lak ngai hmun hla zawka awmte chu a la harsa a, motor-a in phurh phak chin hi chu lak luh a tha e tiin April ni 13-ah Council of Ministers in a ngaihtuah a. Amaherawhchu, April ni 15 ah India sawrkarin lockdown kaihhruaina a tihchhuahah State hrang hrang inkara mipui inkal pawh a khap bur avangin he hmalakna hi a thuanawp ta a. Sawrkar laipui dawr chhunzawm niin Home Ministry chuan “phalna kan pe dawn lo a, an awmna state te nen remruatna in siam theih chuan in inphurh hawn pawh kan hnial chuanglo” an tih avangin Mizoram sawrkar chuan hma a la nghal a. Heng state palia tangkhang mi engemawzatte lakchhuah an nih theih nan an tangkhanna state sawrkar dawr niin rem an tih hnuah lakluh an nih theih nan sawrkarin ruahmanna a siam ta a ni, Chief Minister chuan a ti.

CM chuan,  “Mahni motor-a kal tang ta te chu an motor theuha an lo hawn kan remti dawn a. A lo lut zawng zawngte hi an in lam pan lovin quarantine facility ah ni 14 an awm vek a ngai dawn a. Motor neilote hawna tur motor ngaihtuah dan tur chu Assam leh Meghalaya ah Mizoram House DRC te, Tripura leh Manipur-ah pawh kan mite aiawh remchang hmangin motor neilote lo haw dan tur remruat turin kan ti a. Hawnna man peksak kan ngailo ve ti thei ten mahni chuan man an pek theih chuan kan lawm khawp ang. Hawn man nei tawh lo mangang zual te chu an hawn man kan pek sak lo thei lo ang a, chungte chu kan pek sak ang” a ti.

Mahni khaw hnai vai quarantine facility ah lo haw te hi dah an ni ang a. Quarantine-na hmun hi an hawna tur District Headquarters ah theuh ruahman a ni.