MIZO TLANGVAL KA HMU ZO LO

- Dr. Hrekima Chhakchhuak

Kanhmun khuaa ramri inkalpawhna Langkaih lei kan thlen chuan ni a tla dawn ruai tawh a. Kanhmun VCP leh YMA President chauhin min lo dawnsawn lai chuan khua a thim chhelh tawh a. An Village Task Force-te hnena zirtirna pe tura kal kan nih miau avangin, "Khawnge an awm hlawm?" ka ti a.

"Tunah chuan tlangval 130 rual chu tlaivara ramri veng turin lui dungah an insem darh leh vek tawh alawm," a ti a nih chu! Khaw chhungah Mizo tlangval hmuh tur an awm lo!

Khawthlang ramri hnaia awm khua, Zawlnuam-a veng hrang hrang 3 (Vengpui, Bawrai, Thuampui) te, Zawlpui te, Bungthuam te, Luimawi te, Thinghlun leh Kanhmun khuaa mizo țhlalai rual ten Langkaih kamah buk sualin, chhun zan zawmin ramri an veng a nih chu! Natna țihbaiawm tak rawn pu lut thei tura ramri kan ru an awm an remti lo tlat. Khaw chhungah Mizo tlangval ka zuk hmu zo lo, ramriah an rammu vek!

Nizana thlipui a tleh hum hum a, ruahpui-van-awn a sur laite khan engtin tak chuan awm dawn ni maw aw! Mizoram him nana achhun azan sawi loa beitu zawng zawngte zahna chibai ka buk a che u.

Khawlum leh thosi karah, thlipui leh ruahpui hnuaia miin kan himna tura theihtawp an chhuah lai hian muang lei ațanga lo phunchiar ve ngawt ka tum ta lo. Țul lovah chhuak miah loin lo tawm-im ve mai ila, ka dam nan ka kut lo sil zing hle mai ila, mi dang him nan inhnaih tuau tuau lovin, chil chhak phurh phurh lovin, pawn chhuah dawn apiangin hmai Io tuam ve mai teh ang u. 

Khawchhunga hmuh tur awm lo khawpa Mizo tlangval ten min venhim tuma an nunna an thap laia kan lo tih ve tur hi a awlsam a nia!

(Țau thla ni 16 leh 17, 2020 hian khawthlangah zirtirna pein, khaw 14 zet kan tlawh a. IMA leh RIPANS leh Dr. Atei te thilpek kan sem zel bawk).

[A ziaktu zah tak chungin kan senglut a ni e. - Editor]