Mizo Covid 19 vei mi pahnih hmu belh; Mizo pathum tling tawh

Aizawl | April 14, 2020: Mizoram pawn khawpui pahnih-ah Mizo COVID 19 vei mi pahnih nimin khan hmuhchhuah a ni a. Heti hian Covid 19 positive Mizo pathum an awm tawh a ni.

Pakhat hi Mumbai-ah enkawl mek niin hmeichhia, pasal fanau nei kohhran rawngbawltu a ni a, Pakhat erawh Shillong-ah enkawl mek niin a ni hi Mipa Doctor nupui fanau nei a ni thung.

Mumbai a mi hi a natna dang vanga inenkawl tura kal niin Mizoram House, Mumbai-ah an khawsa mek a. Mumbai-a Mizoram House a awm mek leh thawktute pawh test tura ruahmanna kalpui mek niin thudawnna chuan a sawi.


Mumbai Mizoram House-a cancer damlo inenkawl mek Mizo hmeichhia hi  Pathianni khan TATA Hospital, Mumbai-ah a cancer natna vanga zai tura an buatsaih laiin a khawsik chu rinhlelh thilah Covid-19 a vei nge vei lo endik a ni a, nimin khan Covid-19 a vei tih hmuh chhuah a ni.

Tunah hian Mumbai-a Covid-19  damlo enkawlna damdawi-inah enkawl mek a ni. Amah hi kumin February 8 khan Mumbai-a TATA Hospital-ah inentir turin an kal a, tun thlengin an la awm ta reng a ni.

Mumbai Mizoram House-a cheng zawng zawngte chu vawiiin hian damdawi lama thawktuten an endik vek dâwn niin thudawnna chuan a sawi

Hetih lai hian Meghalaya a  a hmasa ber turin nimin khan Covid-19 kai hmuh chhuah thar a ni a; UNI chuan amah hi medical doctor niin Mizo a ni tiin a tarlang

Shillong a mi hi a thawhna hospital chu COVID 19 enkawlna leh quarantine na hmun atan hman nghal a ni a, vawiin leh tun hnaia he damdawiin pante pawh chhui mek an ni.

Heng COVID 19 positive te hian tun hnai-ah Mizoram an rawn lut lo nia hriat a ni a, Mipui tan chi-aina tur a awm lo.

Mizoram-ah Zoram Medical College (ZMC) ah Mizoram chhunga Covid 19 vei hmasa ber chu enkawl mek a ni a. A ni March 24 khan a positive tih hriat a ni a, He thu hi March 25 khan Health minister Dr R Lalthangliana'n thutharthehdarhtute kawminna sawi.

March 24 zan aṭanga enkawl tawh chu April 13 thlengin enkawl dam a la ni lova, Mizoram-ah COVID 19 vei an pun belh palha Damdawiin thawktute buai tur zia leh senso hautak tur zia a hriat theih awm e.

ZMC chu Covid 19 enkawlna atan ruahman a ni a, ZMC ah vek hian Covid 19 testing lab bun a ni tawh bawk.

Shillong-a Covid-19 positive hmuh a nih vang hian Shillong District Magistrate chuan darkar 48 awh tur curfew a puang nghal a, March ni 22, 2020 hnu lama Nongrim Hills vênga Bethany Hospital tlawhtu zawng zawng chu a rang thei ang bera number 108 be nghal turin emaw, http://megahlayaonline.gov.in/covid/login.htm ah in register turin a hriattir bawk a ni.

Meghalaya sorkar chuan positive case dawngsawng tur hian a lo inpuahchah lâwk tawh avangin hian mipuite chiai lo turin a chah nghal a, state chhunga cheng zawng zawngin hmaituamna leh kut tihfai uar thar tur leh khuh leh hahchhiau dân inkaihhruaina chhuah tawhte zâwm tur leh midangte nena inhlat turin a chah bawk a ni.



(A hnuaia fakna hi lo hmet ve rawh.)

Post a Comment

0 Comments