Mamit DLTF leh YMA ten ramri venhimna chungchang sawiho; Silai keng love duty turin ngen

  • Police Hqrs atangin Armed Police Force 70 hmuh belh dawn
  • Mamit Sub. Hqrs YMA hmalaknain Langkaih Group YMA leh Taitesena Group YMA duty


Aizawl | April 14, 2020: Mamit District Level Task Force On Covid-19 chairman leh Mamit DC Dr Lalrozama IAS kiahhruainain vawiin khan DC Conference Hall, Mamit-ah DLTF leh Sub. Hqrs YMA hruaitute'n Covid-19 hrileng mek avanga Mamit District ramri venhimna chungchang sawiho.

Mamit DC chuan Mamit District chu State dangin a hual, ramri uluk taka ven ngai an nih thu a sawi a. Kan ramri-te uluk taka kan venhim loh chuan hrileng mek lak ata kan him dawn loh thu sawiin Covid-19 rawn lut tur venghim tura hah taka duty-te chungah lawmthu a sawi.

Sub. Hqrs YMA hmalakna-a Langkaih Group YMA leh Taitesena Group YMA hnuaia khaw hrang hrang tlawmngai pawl leh Police, tuna ramri venga duty-te dinhmun leh harsatna tarlan a ni a. Police Force indaih lohna a nasat thu tarlan niin Police Hqrs atanga Armed Police Force 70 hmuh belh tur chungchang leh a sem darh dan turte bakah heng Police Force-te hi a tul anga siksawi theih anih tur thu Meeting-ah hian tarlan a ni.



Meeting-ah hian ramri veng tura tlawmngaia thawkchhuakte zingah silai thawhchhuahpui an awm tih report dawn chungchang sawiho a ni a. Meeting chuan Civil mi leh sa Duty thenkhatin silai an keng chu pawi a tiin silai keng lova Duty turin YMA hruaitute chu a ngen a ni.

Vawiin Meeting-ah hian Mamit District ramri Bazirungpa khua-ah tangseh vei an awm nual ni-a hriat anih thu tarlan a ni a. Bialtu Medical Officer-te chu a tul anga hmala tura tih an ni.

Meeting-ah hian Damdawi leh ruihhlo ngaite’n ram danga ruih tur zawnga an kalna-ah hri an kai palh thei a, hriat loh kara nasa taka punlun thei a nih avangin ruihlo ngaite quarantine dan tur ngaihtuah nise tih a ni a. Naktuk hian ramri a awm khuate, VLTF Chairman theuhte chu DLTF leh Sub.Hqrs YMA hruaitute nen Meeting neih nise tih a ni bawk.

Vawiin inkawmhona-ah hian DLTF Members-te leh Sub. Hqrs YMA hruaitute an tel tha hle a ni.



(A hnuaia fakna hi lo hmet ve rawh.)

Post a Comment

0 Comments