FEATURE STORY: Tlangval tlawmngai ka ngaihsan chu

- Lalnghinglova Hmar (Tetea Hmar)

Ruang bula ṭhut a ngai. Hmelhriat loh hnam dang pahnih bula kilometre 3,000 chuang ambulance-a chuan a ngai. Covid-19 hri lêng tamna hmunte paltlang a ngai - heng zawng zawng inhuam hian Mizo tlangval Raphael AVL Malchhanhima chuan Chennai aṭangin a ṭhianpa ruang zuiin Mizoram a rawn pan mek e.

 

Mi huaisen an awm. A then chu insual huai an ni a, a ṭhen chu thih hläu lo khawpa huaisen an ni. Thenkhat chu zan khaw thim hnuaia ramhnuaia sa hlauhawm ber ber pawh hmachhawn ngam an awm - he tlangval huaisen dan nen hian a inang lo - Rafael-a hi tlangval huaisen a ni.

 

Chennai atanga Aizawl hi National Highway 16 zawhin kilometer 3000 chuang niin Google chuan min hrilh. London leh Moscow hi  kilometer 2509 zet a ni a, a karah ram dang tam tak paltlang a ngai - ambulance-a ruang zuia an chuan thui tur zia kan hrethiam awm e.

A pa missionary, amah Mizo tlangval tlawmngai - Raphael AVL Malchhanhima zahna chibai ka bûk e.

  

Thihna nunrawng

April ni 23  zan khan Chennai khawlaiah Mizo tlangval ruang an chhar hlauh mai. Tunlai danah chuan Mizorama a ruang hi hawn ngaihna awm lo tur a ni.

 Covid-19 hripui avangin Mizorama mahni veng chhunga khawhar inah pawh kan kal hleihtheih loh laiin, Chennai Mizo Welfare Association hmalaknain (a rem hre deuh leh a nachang hre deuhte zar niin an sawi) a ruang hawn dan an hre tlat mai.

A nachang hriaten Mizoram thlenga ambulance-a ruang dah thei tur an zawng hmù. Nimahsela hei mai hi a tawk lo, 'Mizo pakhat a chuan ve a ngai' an ti tlat a ni awm e.

Chutah chuan he Mizo tlangval Raphael AVL Malchhanhima hian, "Kei ka awm e,"a ti - ka ngaisang takzet a ni.

Mizo tlawmngaihna fir

Rafael leh vanduai ta Vivian Lalremsanga (28) s/o Kenneth Lalthuamluaia, Model Veng, Aizawl hi Chennai-a inhria, hnathawh thuhmun avanga inkawm ṭhin pawh an ni.

Hetia a ṭhianpa a boral takah hian, mihring pangngai tana thil peihawm lo leh huphurhawm tak mai chu tih a ngai ta a ni.

Ṭhenkhat chuan "Mizo tlangval tihâwm reng a ni a, eng nge a ropui vakna?" an ti mai thei. Thil hi mahni tih turah a takin han dah chhin ila, kan zuam lo fo. Tuna mi phei hi chu thil namai a ni lo. He inpekna hi a thûk a, a huaisen a, a ropui em em a ni.

Rafael-a inpekna hi ngaihsanawm ka tih avang leh, a entawntlak em avangin biak pawh dan ka zawng ta a, vanneihthlak takin zanin (April 26) khan kan inbe fuh ta hlauh mai.

Hmawngbu tlangval Rafael chuan, "Kawngah lirthei a awm mang lo a, chak tak takin kan tlan. Châw eina kan hmuh fuh hlauh chuan kan ei a, a remchang ang ang ei tur kan pack bawk a, a tih ve theih mai e," a ti!

Kan inbiak lai hian West Bengal-a Siliguri an la lut lo deuh a, "Hei, kawng chhia kan thleng ṭan a nih hi," tiin a la nui hawk hawk thei.

Mizo tlangval a nih vangin mitthi ruang zui tura tlawmngai a ni a, amah chuan, "Tlawmngaia Aizawl thlenga ruang zui a ṭul thu an sawi khan, ka zui theih tur thu ka sawi a, chu chu a ni mai e... Amah hi ka ṭhian a ni bawk a, atana ka tih theih tawk a ni," tiin min hrilh.

 

Rafael-a pa hi A. Ralliansanga a ni a, Synod hnuaia missionary niin Tripura lamah an awm mek. Rafael chuan, "Hmawngbu hi ka pa hnathawhna vanga kan awmna ṭhin a ni a, tunah tak hi chuan Tripura lamah an awm a, address pawh a mumal vak thei lo missionary chhungkua hi chu," a ti.

 Tamil Nadu aṭanga ṭanin Andhra Pradesh, Odisha, West Bengal  an paltlang a ngai a, chutah Assam an lo lut dâwn a, Aizawl an thlen hun tur tak hriat a la harsa deuh.

Rafael chuan, "Kei chu Aizawl ka lo thleng ang a, dan angin ni 14 min quarantine phawt ka ring..." a ti!

Thui thama lirthei chuan hahthlak leh hrehawm thu chu lo dah ṭha ta ila, hnam dang driver pahnih bula ruang zui a, hripui tâwn hi thil namai a ni lo - hei hi a ni tlawmngaihna 'hlu' chu.

 Ka chawi ang che, sakhming hluanin,

‘Zonun par mawi’ ka ti ang che;

I mawina rimtui leng velin,

Ram tin kil tin a fang del del