- K Remruatfela
Zàn boruak chu a thiang vawng vawng a. Arkaiden zân tih takah hmuh theih chin zawng zawng chu a êng no ngulh vek mai. Râlkhat ramngaw atanga nungcha hrâm ri chiah chiah te chuan hmangaihna tuipui zauva pil mêk, Garth Brooks-a chu a âwi muhil siai siai a. Nimahsela, thawklehkhata ramsa lo hûk ri phut chuan Garth Brooks muhil tui lâi tak chu a thawng tho ta zawk a. Harh chiang mang lo, mit vài deuh nuaih chung chuan a kianga a Lalngoi tui ti taka a muhil siai siai lai chu lungchim tak hian a thlîr ta heuh heuh ringawt a. Chutia, mit tla lêk lova a thlir reng lai chuan a rilruah he zawhna hi a lo lût ta a – “If tomorrow never comes, will she know how much I loved her?”. Chu zawhna ringawt chuan a thinlung chhungril ber chu a luah khat ta tlat a, duh tâwk chim lêm a nei thei ta lo. A rilruah zawhna dang lo lût lehin “Is the love I gave her in the past, Gonna be enough to last; If tomorrow never comes” ti chhunzawmin chu zân khawhar tak chu rilrua zawhna thûk tak pai ru reng chung chuan a suartluan ta zak a.
Kan Pathian Lehkha Thu chuan mihring nun hi, “Chhûm rei lo tê lo langa, thâmral leh mai thin ang hi a ni” a lo ti a. Nia, a ni tak asin! He lei hringfate hi saruak maia lo piang kan niin saruak vêkin he kan khualzinna ram hi kan la chhuahsan leh theuh dâwn a. Tumah hi he khawvelah hian kumhlun tur rêng kan awm lo! Thenkhat chu he khawvelah hian mikhual châmbâng satliah mai kan ni tih hi kan in theihngilh fo thin a. Kumhlun lo kan ni tih inhre lo lêkin damchhung khawsak ngaihtuahnain an rilru a luahkhat zo a. An thawhrim rah an ei ve dâwn chauh tiin, mihring chaknaa hneh rual loh, thihna kut vâwtin a man thuai a, chutianga ho taka mual liam ta ringawt mi tam tak an awm asin! Bible-in, “Mi â, zaninah hian I thlarau an an lâksak dâwn che a ni, I thil dehchhuahte kha tu ta nge ni ta ang le?” a tih ang dinhmuna ding, thawhrim rah ei hman lova mual liam ta te hi an va khawngaihthlak tehlul em! Tumah hi kan hmalam huna thil thleng tur sawilâwk leh hril dik famkim thei rêng kan awm si lova. Fakna hla phuahtu in “Naktukah eng nge thleng dawn, a chin hria tu nge awm le?” a lo tih ang mai khân, vawiin te pawh hi kan khawvel tâwp ni tur pawh a lo ni thei, tuman kan hre lâwk si lo. Naktuk tih tur hi awm tawh ngai dâwn lo ta se, vawiin, tun hun leh hun kal tawha kan thil tih zawng zawngte khân lungawina famkim min thlen hlawm ang em le?
Heti taka derdêp taka siam, a lemlamah thil tihtheihna nasa taka thuam ni lawi si kan nih avang hian he kan damchhung hun tâwi tê hi kan dimdawi thiam a, kan hman tangkai thiam hi a pawimawh em em a ni. Naktuk hi lo thleng tawh ngai dâwn lo ta se, vawiina kan thil tih zawng zawngte hi kan lungawipui zo meuh ang em? “Se bo hnua se kawngkhar” an sawi ang maia, a sawhsawhlâwt tawh loh hnua inchhira kan vâi leh ruai lohna turin tun hun tha kan neih lai hi Pathian, kan nu leh pa, kan chhungkua leh kan thenrual kan hmangaihzia lanchhuahna hun tha ber chu a ni mai dâwn lawm lovem ni? Naktuk hi thleng tawh ngai dâwn lovin, vawiina kan thil tih engkim hi a tâwpna leh a hnuhnung ber vek tur lo ni ta zêl se, bâng lova tapa inchhir ngawih ngawih tur hi kan lo awm nuk mai ang tih a van hlauhawm em! Heti taka derdêp taka nung kan nih vang hian Krista zara ka unau pui duh tak te u, in hriat loh ka hlauh em em chu, he khawvel hi a lo ho takzet a, kan hausakna, thiamna leh finna, hmelthatna leh taksa mawina zawng zawngte hi engmah lo mai a lo ni a, Pathianah chauh lo chuan innghahna tlâk hi thil dang engmah a lo awm rêng rêng lo! Chuvangin, he kan damchhûng reilotê hi in huaa, in itsîk tawna, inhêktawnna mai mai tur atan chuan a va pamhmai tehlul em!
Sap hla phuah thiam Bob Dylan chuan, a hmangaihtak, a enchim loh, a Lalngoi hnenah chuan, “Van ruah sûr ten i sakhmel mawina te hliah tuma an rawn nuai châng che chuan chu ruah sûr chuan a nan tawp lo ang che; Kei, i kiangah ka ding reng dawn si a. Zân si-ar êng tan i lung an tilênga an velh tah dâwn che leh tumah i mittui hrûk hul sak tu i neih dawn loh chuan i kiangah ka lo hnai ang a; kumkhuaa thlah leh ngai tawh lo turin ka lo kuah tlat ang che. Ka hmangaihzia che i hriat theih nan” tiin hmangaihna thu thlum tak a lo kiu pui vawng vawng a. Hetianga hmangaihna thûk leh duhawm tak hi kan Lalngoi te chauh ni lovin kan mihringpuite chungah pawh kan lan tir ve thei dâwn em le? Tirhkoh Paul-a chuan, “Mihring tawngte leh Vantirhkoh tawng tein thu sawi mah ila, hmangaihna ka neih si loh chuan dâr, ri mai mai emaw, Dârbenthek ri mai mai emaw ang chauh ka lo ni ang” a lo ti a. Ni e, a ni tak asin! Hmangaihna hi hringfate nuna ropui ber a lo ni.
Pathian thuin mahni kan inhmangaih anga kan vêngte pawh hmangaih ve tura min chah lawm lawm ang hian tun atang chuan itsikna leh vertherna ni lovin hmangaihnain kan nitin nunah ro lo rel thin tawh zâwk se la. Naktukah eng nge lo thleng dâwn tih hre lâwk tu mah kan awm si lova. Chuvangin, tun hun hi Pathian thupekte kan zawm a, kan mihringpuite chunga hmangaihna kan lantir mawlh mawlhna hun tha ber a ni tih hi i hai lui lul lo ang u...
If tomorrow never comes;
Will she know how much I loved her?
If the love I gave her in the past,
Gonna be enough to last;
If tomorrow never comes?.
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: