April 18, 2020 (Inrinni) tlai lam khan Mizoram leh Tripura inrinna, New Kawnpui, Thaidawr Road-a hrileng mek darh zel tur venga ramria duty, 5th IR Battalion mi pahnih - C/276 C. Lalhruaitluanga leh C/405 R. Zairemmawia te chu Takam/Chakma engemawzat border lehlama cheng ten an sawisak rawn a, Aizawl Civil Hospital-ah admit an ngai zui hial a nih kha.
Kan ram chhung ngeia Takam tlangval ten kan Police duty, uniform ha lai ngei kut an thlak ngam tak avang hian Mizote thlavang hauhin Mizo Zirlai Pawl (MZP) te rang takin a hmunah kalin an che chhuak a, an kal lam hi ramriah Tripura Police ten an lo dang a. Kal tlang ngei an duh avangin an zinga pakhat chuan a thiam tawp chhuahin an hotupa chu ‘CM Rank’ a nih thu a sawi ta hial a nih kha.
Mizoram chhungah Tripura Police in NGO an dang
Kan tlangvalte fak a hnekin an ṭawngkam hi fiamthu na’n kan hmang zui a, a pawimawh lai ber buaipui lovin a ho lai ber kan khel zui ta daih hi a mak ṭhin hle mai!!
Ni e, CM rank a ni lo tih chu mahni chawhmeh duh zawng sawi tha hlei thei lote pawhin kan hre vek. Amaherawhchu, Mizorama tlawmngai pawl hrang hrang kan neihte zingah hian tunge ram leh hnam humhalh kawngah MZP hmakhalh ta ngai le? Kan tlawmngai pawl ṭhenkhat ten pawndun sina tuemaw lo hmuah an ṭhulh leh lai leh, eng programme emaw ni boycott an tum an ṭhulh leh lai pawhin anni hi chuan thisen chhuak khawp hialin Assam Police an lo hmachhawn tawh asin.
Eng pawl hi nge kan ram leh hnam tana anni aia penchhuak nasa awm chuang le?
Ram leh hnam tana thlantui chu sawi loh, hnaptui tak ngial pawh la fartir phal ngai hlei lo ten kan unaute kan nuihzat hi chu tukharh kan ngai ta niin a lang.
Ram leh hnam hmangaihna zawn aṭanga thlir phei chuan kan CM te hi MZP President Rank an ni pha zawk meuh em le?
Dawt sawi hi a ṭha lo, mahse, a ṭul tawpkhawk hun a awm fo. 'Rinna pa' ti hiala koh Abrahama pawh khan an tihhlum a hlauh avangin a nupui Sari kha ‘ka farnu’ a ti a nih kha.
Kan pi leh pute ram sah zau sa ngei pawh luah kim ngam lova, Takam pawh Takam tingam lova Chakma kan tih dawih aw tâk hnu hian kan ram hmangaih dan te pawh a lo danglam ta a ni ang e. Mahni puzawnte ngei pawh ‘Ka pa’ tia koh lo, Makpa ni ngam lova, fa nihna vuah chawp duh hnam nih kan hnaih tial tialte pawh a ni mahna.
Ramri kana penchhuak ngamte fiamthu thawh na’na hmang ṭhintute hi pawnfen chu sawi loh, Hrenpereng kaiha Kharbari ina Corona hlauh avanga riakkhawm awm tawk lek kan ni mai lo maw?
Politian suak ten mahni ṭan loh lam sawisel hi ram leh hnam humhalhna emaw kan ti ta tlat te hi a vanduaithlak. Kan politics laimu hian ram leh hnam humhalh hi thleng ve tawh rawh se.
Heng mikhual chamrei te hi ‘mikhual chungah ṭhat an chhuah ngai e’ tiin duat takin kan enkawl a, khawvel khawi lai maha ram neilote hi kan ram zawl ṭhalai ber kan sahthlak a. Khawvel tukverha dak chhuaka an thlarau chhandam a nih theih na’n tiin Chanchin Tha leh thiamna kan pe a.
Mahse, anni erawh chuan an duh hunah dawtin min hek a, a chang leh kan beng pawtin kan biang an piai a, a chang leh min talh thul, a ni tawh zozai lo ve. Keinite chuan Chanchin Tha leh thiamna min rawn thlentu Sapho kan ngaisang a, kan do kan do zui hlei nem.
Min thlahtu ten thisena an lei Mizoram chhunga hmun pakhat Chakma Autonomous District Council huam chhung ngeia a ram neitute zawkin ram kan lei thei lo ringawt te pawh hi mut mawh hnar mawha neih a hun tawh a sin. Kan ram luah chin kan chhuahsan zel bawk si chuan engah nge midangin an rawn luah loh ang?
Kan ram ṭhalai zawng zawng deuh thaw an luah laiin keini lah sathar ang maiin kham karah kan inekbeng a, kan hmuhsit thingtlang mite thlai thar ringin lockdown laiin kan lo la nui lip ang duaih duaih a!! Kan ram chhung ngeia ram lak tur tamzia in hmuh duh chuan Tlabung leh Chawngte chhehvel ringawt pawh hi hrût ula in hrethiam ang.
Mahni leh mahni indo an tlu chhe țhin a, kan hnam leh hnam kan inbeih chuan kan ding chhuak lovang. Party leh kohhran avangin kan inṭhen hrang a ni thei e. Mahse, kan ram leh hnam hian ṭangruala hmachhawn ngai a nei, chumi hmachhawn tur chuan i ṭangrual thiam zawk teh ang u.
##Lawmkima Hmar
[A ziaktu biakpawhna mai tur kan hre lova, kan han dah rawih a ni e.]
Post a Comment
He post chungchanga i ngaihdan lo sawi ve rawh: