CBSE hnuaia Board class-ten subject pawimawh zual chauh exam tawh dawn; Board class ni lo pawl sawn tir vek dawn

Aizawl | April 1, 2020:  Union Human Resource Development Minister Ramesh Pokhriyal 'Nishank' thurawn angin Central Board of Secondary Education (CBSE)  hnuaia pawl 1 atanga pawl 8 thleng zirlaite chu pawl sawn tir vek an ni dawn a, pawl 10 leh 12 pawhin subject thlan bikah chauh exam an hmachhawn dawn.

Sawrkar thuchhuahin a tarlan danin, he thil hi Covid 19 hrileng vang tih niin, pawl khat zirlai chu pawl hnih-ah a thu ang a, pawl hnih chu pawl 3 ah, chutiang zelin pawl 8 zirlai chu pawl 9 ah sawn a ni dawn tihna a ni.

Pawl 9 leh pawl 11 zirlaite erawh school in assessment a siam zulzuiin pawl sawn tir an ni thung dawn a ni.

Pawl 10 leh 12 board exam la nei, an sawn takte pawh zirna sang zawng kai nana subject pawimawh zual 29 ah chauh exam an hmachhawn tawh dawn a, Exam hun tur erawh hriattirna la chhuah tur a ni. Pawl 12 bikah hian India ram hmun dang zawngah subject 12; Business Studies, Geography, Hindi (Elective), Hindi (Core), Home Science, Sociology, Computer Science (Old), Computer Science (New), Information Practice (Old), Information Practice (new), Information Technology leh  Bio-Technology subject neite chauhin exam an hmachhawn tawh dawn a, North east Delhi biala miten subject 11 zinga mi an la hmachhawn thung ang.

Pawl 10 zirlai exam tur la neite pawhin North East Delhi huam chhunga mi ten subject 6 an la exam ang a, India hmun dang zawnga mite tan subject exam a ngai tawh lovang.