A reilo thei ang berin exam conduct chhunzawm leh kan tum dawn - Education minister

Aizawl | April 1, 2020: School Education minister Lalchhandama Ralte chuan vawiin khan pawl 12 exam hmabak la neite chu chawlh chhung hian inthlahdah lova zir chhunzawm turin a chah a. Hun remchang-ah a reilo thei ang berin exam buatsaih chhunzawm a nih tur thu a sawi bawk.




Minister chuan, online class chungchang sawiin, zirlaite chu session thar tar tur leh admission pawh la ti lo an nih avangin India ram hmun dang nen a inan loh thu a sawi a. Internet Facility rampum a kan neih dante en in heng hi chu kan hmachhawn ve thei chiahlo, a ti bawk.

School education minister thuchah:
Zoram mipuite hnenah sawi duh pawimawh point pahnih pathum ka neih a awm a. Pakhatna ah chuan vawiin hi kum 2020 leh 2021 Academic Session kan tan ni School Calendar kan hman tan hun tura sorkarin kan ruahman kha ani a. Kan hriat angin kan beisei loh ang takin Covid-19 avangin khawvel, India sorkar leh Mizoram sorkar kan buai ta a. Hetiang rum rum kan nih tak avangin vawiin ah sikul kan tan thei ta lova. Covid-19 harsatna kan tawh tan tirhah School Education thuneitute kan thukhawm a, kan Chief Minister be rawn in engtik hunah nge School Session hi kan tan theih dawn tihte kan thlir a. Amaherawhchu he hri hian engtikah nge min kiam san dawn tih a sawi mai theihloh avangin Zoram mipuite sikul kan luh tan hun tur hi kan sawi lawk mai theilo ani tih min hriatpui kan duh a. Naupang ho te an chawlh lai, awllen lai ani nachungin zirlaibu zir tur nei chiahlo mah se, he hunawl remchangah lehkhabu tangkai an chhiarna tur atanah te hun tha ani ah kan ngai a, chutiang tur chuan a hmasa in kan chah duh a ni.

Tin, a Pahnihna ah chuan pawl 12 exam, class XII exam kan kallai mek a kha subject tlemte ni thum chhung exam vel, ni 23, ni 26 leh ni 30 ah khan exam la nei tur kan ni a, ni 23 atangin lockdown kan tan tak si avangin exam kan chhunzawm thei ta silo a, heng kan exam lai han sukuk ta, zawh ve chak tak, tuna rilru thaw ipik taka awm mekte sorkarin a khawngaih em em a, amaherawhchu he Covid-19 boruakte a zawh fel hunah a reilo thei ang berin exam hi conduct chhunzawm leh kan tum dawn a, he kan chawlh hun chhungah hian rilru inthlahdah lova, zirna hun tha kan nei ani tih hria a an zirlaite taima taka hmabak an neihte lo zir chhunzawm turin kan beisei a. Pawl 12 hi candidate 12,609 kan nei a, an zingah a tam zawk hmun thuma thena hmun hnih vel hian exam an zo tawh a, mi sangli leh tlem hi exam hmabak la nei kan ni a, anni ho dinhmun hi an ngaihtuahawm rualin an hmabakah inbuatsaihna hun tha an nei ani tih zawnga he harsatna hi an lo hmachhawn thiam kan duh a ni. 

A dawt lehah chuan han sawi leh kan duh chu social media hrang hrangah te mi thenkhat thahnemngai ten hetianga chawlh kan hmang a, session kan tan theilo anih pawhin, State dang Delhi sorkar te pawhin online in class te an kaltir a an ti a, mahse Mizo mipuite min hriatpui kan duh chu anni chu Academic Session kal lai la zo lo, an final semester an beih laite a ni a, an lo tih pawh a awm e. Keini hi chu School vacation kan neih lai, kan chawlh lai ani a, class, pawl sawn thar turte admission pawh la ti lo, zirlai pawh la zir tanlo kan nih avangin helaiah hian kan naute hnenah online class kan lo pe lo anih pawhin kan session inan loh vangte, tin hetiang hun thleng pawh nise Internet Facility rampum a kan neih dante en in heng hi chu kan hmachhawn ve thei chiahlo mai thei a ni. Helaiah hian Mizoram sorkar ina heng online class kan tih ve loh chhante pawh hi kan vacation avangte leh chung harsatna chu kan nei ani tihte kha ka'n sawi leh duh a ni.

Post a Comment

0 Comments