Mizoram Baptist Kohhran Hmeichhia-in Kristian Chhungkaw beihpui neih an rel; Fate enkawl thiam theih nan Zirtawpni zan apiang tawngtai dawn

Aizawl | March 3, 2020: Mizoram Baptist Kohhran Hmeichhe Pawl (MBKHP) Rorel vawi 70-na chu February 27, 2020 (Ningani) khan  Mizoram Baptist Kohhran Biak In, Bethlehem, Thenzawl-ah neiin, Kristian Chhungkaw beihpui neih an rel. Nilai zan dar 7:00 ah palai lawmna inkhawm neiin Pi V Biaklawmi, MBKHP Executive Commt member in a kaihruai a, MBKHP Organiser Nl.Lalhmingmawii Chongthu-in thuchah a sawi.

Chawhma dar 9:30 khan Rorel Inkhawm neih a ni a. Rorel hi Pi F. Lalrochami, President, MBKHP-in a kaihruai a,  Pathian hnena inkawltirna hun a hman zawhah Palai te chibaibukna neiin MBKHP member nikum rorel leh kum in rorel inkara kal tate sunna hun hman a ni. MBKHP organiser Nl. Lalhmingmawii Chongthu-in kum 2019-2020 chhunga BKHP rawngbawlna hrang hrang report a pe bawk. He Rorel Inkhawm hi BCM General Secretary Rev. F. Ramdinmawia, FOD Director ni bawk leh Rev. R. Lalbiakliana, AGS Service ten an telpui a ni.

MBKHP Executive Committee atanga thu lut atangin hetiang hian pawm a ni

BKHP Thutiam en that chungchang te, North East India Christian Council –Woman Assembly (NEICC-WA) Biennial Assembly vawi 14-na dawltu tanpui nan unit tinah vawi khat fehchhuah ni se tih te, Bial Secretary leh Treasurers’ Meet buatsaih ni se tih te chu pawm a ni a, Kum 2020-2021 atan  Budget cheng Nuai 13  (13,00,000/) hmanna tur ruahmanna leh Kum 2020-2021 chhunga MBKHP hmalakna tur duansa(Plan) te pawm a ni bawk.

Tin,  Bial hrang hrang atanga thu lut zingah hengte hi pawm a ni bawk

Tu leh fate tana tawngtai Zirtawpzanah ”Fate enkawl kan thiam theih nan” tih chu standing Item-ah dah ni se tih te, MBKHP ten Ram tana, Ruihhlo ngaite tan leh Missionary te pualin Tawngtai Khaidiat neih rawtna te, HIV/AIDS kan rama lo hluar zel hi a darh zau zel loh nan MBKHP anga hma lak ni se tih te,

Kristian Chhungkaw beihpui neih ni se tih te, Baptist Church Orphanage(BCO) leh Christian Hospital, Lawngtlai te theih ang anga tanpui ni se tih te, BKHP Inkhawm zanah Ruihhlo ngaite, Jail tang te leh Cancer natna veite tan tawngtai thin chu chhunzawm zel ni se tih te, BCM Thurin inzirtir thar leh nan MBKHP-in hma lak rawtna te pawm a ni a, Subject hrang hrang hmanga Chawnghei Tawngtai neih thin chu chhun zawm leh ni se tih a ni bawk.

BKHP Organiser report-in a tarlan danin Pastor bial 85-ah BKHP unit 452 an awm a, member 31,435 an awm mek bawk.  Kum 2019-2020 chhunga an sum hmuh zawng zawng hi Nuai 122,  Sing 2, za 909 niin, hei bakah hian MBKHP sum bawm-a lut lo, BCM Assembly-in BKHP tih tura a ruat sak, Buhfaitham an lakkhawm atangin cheng nuai 706, leh 03,755/- (Rs.7,06,03,755/-) hmuh a ni a, Unit leh Bial hrang hrang ten Missionary Support atan an chhun luh chu tlingkhawm chu cheng nuai 23, leh Sing 42,120/- (Rs. 23,42,120/- ) a ni.

Kum 2021 MBKHP Inkhawmpui leh Rorel chu  S.Vanlaiphai-ah neih a ni ang.

- Mizobaptist.org