INTERVIEW | Miss Mizoram 2020 Zirsangpuii

Miss Mizoram 2020 leh Miss Mizoram Khawzawl 2020 lallukhum khumtu Zirsangpuii hi i lo belchiang teh ang.

Designer - Buanga Chhangte

 

Ziri/sangpuii tia koh thin Zirsangpuii  hi C Lalthanpuii leh VL Beiseia te fa pathum zinga milai niin, an unau hi Mipa pahnih leh hmeichhe pakhat an ni. Zirsangpuii te hi Mara Syuhlo hnam an ni a, A nu leh pa fanu rangkachak Zirsangpuii  hi December 23, 1997 khan a lo piang a, Ft 5'5 a sang niin tunah hian B.A (education) a zo tawh.  Khawzawl khua a awm niin, Baptist Church of Mizoram (BCM) kohhran ah an lawi a, TKP Dinthar Unit Khawzawl-ah Finance secretary a ni mek.








A post shared by ~Zirsangpuii~ (@sangpuii_97) on



Zirsangpuii  hian kum 2013 khan Far East Experimental School, Khawzawl atangin HSLC Third division-ah a  pass a, 2015 khan Khawzawl Higher Secondary School, Khawzawl atangin HSSLC second division-ah a pass bawk.

B.A (education) hi Aizawl City College-ah a zir a, 2018 khan First division ah a zo.

Hobby - Reading novels

Miss Mizoram 2020 atana i hming puan a nih khan i rilru-ah engnge awm?
- Ka awih lo deuh a😅. Chutih rualin, chiang takin Pathian hi engkim ti theitu a ni tih hi ka rilru-ah a awm.

 
Miss Mizoram i nih hi i inring reng em?
- Miss Mizoram ka nih ka inring ngai lo.


Miss Mizoram 2020 a i tel dan?
- Ka tel dan han tih chuan a tira Khawzawl organising committee in min lo sawm chuan tling lo ka inti-in experience ka la neih loh vangin mahni ka sit a, ka tel duh lova. Mahse, tawngtaiin Pathian ka rawn a, Pathian remruat a lo nih vang a ni ang, ka chhungte leh ka thianten tel tura min duhpui avangin ka tel ta a ni. Tin, ka tawngtai chhanna a niin ka hria, a tir chuan ka hmu thiam lova, mahse,  ka'n tel tak-ah chuan ka tawngtai chhanna a ni tih ka hrechiang hle.


 

Miss Mizoram a tel chhan?
- Taksa pawnlam mawina ringawt hi mawina ni lovin chhunglam mawina leh thatna hi mawina tluantling leh daih rei zawk a nih zia tarlan ka duh a. Tin, Hmeichhia te eng ang taksa pawh nei ila, kan lo cher deuh emaw thau deuh emaw mahni nihna zahpui leh insit lova kan nihna ang ang  pawm thiam inzirtir ka duh vang leh khawtlang a faina leh thianghlimna kan kal puina-ah hian tun aia hmasawn zawka kalpui ka duh vangin. Hmeichhia zawng zawng te hi kan
mawiin kan nalh veka kan mawina kawng leh nalh dan a inang lo mai a ni.

Zofate inpumkhatna atan hian hmalak i tum em? Engtin nge?
- Zofate inpumkhatnan hian theih tawp a hmalak ka tum a. Theitawpin, social media leh khawtlang-ah Zofate inpumkhatna lam ka sawi uar anga, tin, tha  thawh a ngaih chang a awm pawhin keimah ngei penchhuah ka tum ve ang.


 
A duhzawng leh ngainat zawng hrang hrangte?
Lehkhabu duh: Hringnun Hrualhrui - Mafaa Hauhnar
Actor/Actress: Jennifer Aniston, Angelina Jolie leh Anne Hathaway
Zaithiam: Ray laMontagne, Lewis Capaldi, The Midnight (band), K Hminga leh TBC Zaithanpuia
Chawhmeh: Antam tlak, Parbawr leh Artui
Hla: Jolene (Ray laMontagne), Tiny dancer (Elton john), Ka inngahna (TBC Zaithanpuia) bakah K Hminga hla hrim hrim.
Hmun: Lungphunlian.
Ziaktu: Mafaa hauhnar
Model: Zozibini Tunsi, Ashley Graham leh Gigi Hadid


 

•• Website a Fakna lo lang i click apiang khan Explore Mizoram kal zelna atan tha i thawh ve a ni. ••

Relationship Status: Single

Kawppui atana duh zawng? 
-Pathian tih mi, ruihtheithil ti lo leh nuih duh😁😁🤣

 

Zawhna dang:::
1. A tel lova i awm theih loh: Ka chhungte

2. I nun kaihruaitu:
- Bible leh ka nu leh pa

3. Hringnuna i hlauh ber:
- Ka hmangaih-te chan ka hlau ber.

4. I tih ngai miah loh tur:
- Mahni inhloh khawpa  mi dang duhzawng anga awm.

5. Mizo Tualzal nuna ṭha i tih:
- Tlawmngaihna
 

6.  Quote i duh ber:
- In ngaihtlawm la,mahse in ngaihniam ngai Suh.
 ~Mafaa Hauhnar

7. Mizoram leh Mizo tualzal nuna Mizo hmeichhiate dinhmun:
Sakhaw dang leh ramdang ngaituah chuan Mizo Hmeichhe dinhmun hian hma a sawn tawh hle a, Chutihrualin hmasawnna tur tam tak erawh a la awm.


 
8. Hnam hmingṭhat leh hmingchhiat kawngah Hmeichhiate'n mawhphurhna:
- Hmeichhiate hian mipa te ang Chen tho in mawh Kan phur a, Kan hnam ziarang leh Kan sakhaw vawn nena inmil lo lutuk leh inhawisan lutuka kan awm hian hnam a lo hmingchhe hma hle a, chuvang chuan, Kan hnam leh sakhaw vawn mila nun Kan hman hi kan mawphurna niin ka hria.

9. Hnam ziarang chawinun kawnga Hmeichhiate mawhphurna:
- Hmeichhe nun dan zahawm leh incheina lama fimkhur leh mawhphurna ngaihpawimawh a, Mizo hmeichhia ten Mahni hnam tlangval ngei an neih hi Mizo hnam ziarang chawisang tu a ni bawk. Mizo thuam a tam thei ang bera inbel leh hnam lam naupang zawk te zirtir uar. Hnam lam mai bakah Mizo hnam ziarang, Mizo tih dan thin mitthi in kal leh Mizo thu leh hla te hlut zel inzirtir uar.


 

10. Mizote tan 'Fa neih tlem' inzirtir hi a ṭulin i hria em?
- Fa neih tlem inzirtir hi a tulin ka hre lem lo. Mahse, chhungkaw dinhmun a in ang lova, chhungkaw dinhmun emaw hriselna in a zir loh avanga fa nei tlem te erawh ka dem lo.

11. Mizo hnam ṭhanmawh bawk nia i hriat?
- Mizo hnam hrang hrang  te kan la inthurual lo hi kan thanmawh bawk niin ka hria.


 

12. Mizo hnam damna atana  kawng awm nia i hriatte?
- Hnam inpumkhatna leh Pathian tihna tak tak.

13. Hnam chhan nana Hmeichhiate ṭangkaina leh mawhphurna?
- Kan hnam hi tlemte kan ni a, hmeichhia-ten hnam chhan nana kan tih theih tha ber ni a ka hriat chu Mizo tlangval ngei pasal neih hi a ni. Tin, hei hi kan mawphurna ni bawkin ka hria.


  

14. Zirna, Khawtlang leh Kohhran hi?
- Zirna, Khawtlang leh Kohhran hi a kalkawp thei a, a inmamawh tawn vek niin ka hria.

15. Khawtlang, Kohhran leh nangmah:
- khawtlang leh kohhran hi ka tan an pawimawh in tun thlenga ka nun kaihruai tu pawimawh tak an ni.


 

16. Social Media leh Nangmah:
- Social media hi ka hmang ve nasa a, WhatsApp leh Instagram te, ka tan a tangkai hle a. Mahse, a chang chuan ka hun tam tak ka khawralna a ni ve bawk.

17. Mizoram ṭhalai tam tak tlakchham:
- Mahni Inrintawkna leh insumtheina.


 

18. Mizo ṭhalaite hian ngaihsan tur dik an ngaisangin i hria em?
- Aw hria e. Mahse, kan ngaihsan zawngte hi kan la chawimawi tawk lo niin ka hria.

19. Ngaihsan tur dik nia i hriat:
Thil dik ti mi, eng thil pawh tise an hnathawhna a rinawm tlat, chapo lova bei hram hram, mi itsik emaw er lova theihtawp chhuah tak meuh, Mahni thusawi ngei zawm/ti hlawhtling, eng ang mi pawh zah thiam leh a hun leh hmun hria. A tawi zawngin discipline nei mi, mi rinawm leh thutiam a dingnghet.



 

20. Hlawhtlinna tura pawimawh:
- Pathian tih, tumruh, dawhtheih, taimak.

21. hloh i hlauh ber:
- Keimah in hloh ka hlau ber, a chhan chu mahni kan inhloh tawh chuan engkim kan hloh.



Zo hnam inpumkhatna hi a thlen theih i ring em?
- Tunah rih chuan a la harsa mai thei. Kan nihna la hrechiang lo tam tak an la awm a, ngaihdan in per san tak tak awm khawm kan la ni a. Mahse, ṭanrualna hi kan auchhuahpuia theih tawp chhuah chung zela keini ṭhangthar te kan thawh zel chuan, hun la duh deuh dawn mahse engtik ni ah emaw chuan kan inpumkhat theih ka ring tlat a ni.



Explore Mizoram i hmuh dan:
- Explore Mizoram hi thalai te min ti bengvar tu atan platform tha tak a ni a, Explore Mizoram kaltlang hian thil thar kan hriat belh  zel  a. Chuvang chuan hmasawn zel turin duhsakna ka hlan a ni.❣❣💕🙏🏽



H Zate
Founder/Editor
Explore Mizoram

•• Post hi link nen i lo share ve zel dawn nia. ••


(A hnuaia fakna hi lo hmet ve rawh.)

Post a Comment

1 Comments

He post chungchanga i ngaihdan lo sawi ve rawh: