Social Welfare Minister in New Laty khuaa Airport tur en mek tlawh

Aizawl | Feb 6, 2020: Social Welfare Minister Dr K Beichhua chuan vawiin khan Siaha district New Laty khuaa Airport siamna tur Mizoram PWD ten survey an neih mek chu a hmunah a tlawh.'



Dr. K. Beichhua chuan kum 2015 khan Airport siam tura rawtna hi khatihlaia Chief Minister Pu Lal Thanhawla hnenah a lo thlen tawh a.Kum 2016 khan aerial survey leh preliminary survey neih tawh niin, tunah hian MPWD chuan final survey a kalpui mek a ni. 

Surveyor base camp-a New Laty khawtlang hruaituten vantlang inkhawm an buatsaihah Dr.K. Beichhua chuan thuchah sawiin, ram tana thil tha tih kawngah party thliar lova, mipui tanrual a pawimawh thu a sawi a, Airport chu lo siam theih pawh nise New Laty khawtlang mipui chu sorkar hmalakna an tawiawm that thin avanga lawmthu hrilhin,  compensation lak inchuha buai lo tur leh compensation beisei lova ram tana  an ram te phal taka hlan turin a ngen  nghal hlawm a ni.

Minister chuan politics-a kan inbeih nasat avangin mipuite kawng dik kawnghmuh kawngah Siaha politician te an la hnufual hle nia a hriat thu sawiin, hei vang hian politician te pawh hemi kawngah hmabak an la ngah hlea a hriat thu a sawi bawk. 

Siaha PWD, EE Er. Lal Thanzuala pawhin report pein, khawchhiat avanga final survey an neih chak theih loh thu a sawi a, airport atana a siam tlak ngei a beisei thu a sawi.

Social Welfare Minister Dr Beichhua chuan vawiin  vek khan Agriculture Technology and Management Agency (ATMA) Siaha district in District Agriculture Office complex-a District Level Exhibition-cum- Farmers Award 2020 an buatsaih chu a hawng nghal. 

Exhibition hawnna inkhawmah Dr K. Beichhua chuan Siaha district mipuite aiawhtu mah nise mi zawng zawng a tanpui theih loh thu sawiin, mitinte midang tana malsawmna ni thei turin mahni intodelh a pawimawh thu a sawi a, Pathianin sik leh sa, boruak tha tak min pekte hmang tangkaia tun aia nasa a thawk turin loneitute a fuih. 

Exibition-ah hian AH & Veterinary Department, Krishi Vigyan Kendra (KVK) Siaha, Fisheries Department, Agriculture Department, leh Horticulture Department thlai tharte pholan a, zawrh nghal a ni.

Minister hi Siaha DC Bhupesh Chaudhary,  MADC Executive Member i/c PWD K Chhuabei, MADC Executive Member i/c Sports Beirahmo Syhly, MDC te, official, MTP(H) hruaitute leh party mi thahnem takin an tawiawm a ni.

- DIPR

Post a Comment

0 Comments