Serchhip i lo kal chuan...

Chhak leh thlang, chhim leh hmar zawnga teh pawha khawpui laili ber, 58th KTP General Conference thlengtu tur, Serkhawpui hi kum 1774-a Mizo lal ropui, Lallula'n Thlanrâwn (Pawi) ho a râwt chimih hnua phuba lak hlaua a rawn thlang tlâkna hmun kha a ni a. Serchhip hmuna a awm laia a inhmun hi vawiin thlenga la humhalh a ni. I lo tlawh ve ngei dawn nia.

Tin, chhim lam hawiin i han tlân deuh ang a, Chhim leh Hmar Indo kha kan la hriat reng ka ring. Chuta chhim lam lal ropui, Lalpuithanga lalna tlâng Bâwngchawm tlâng (Tuifim tlâng) a lo inzar kham phei ûr ang a. Chu hmun chu Paragling World Cup an neihna hmun tur a ni tih theihngilh lo la. I duh phawt chuan Lalpuithanga lungdawh pawh thla i lakpui thei ang.

Tichuan, chhak lampangah i han tlânchho leh ang a, Kâwlri tlâng leh Êntlâng a lo ding cham lurh ang a. Chu tlângah chuan Chhim leh Hmar Indo laia Lalpuithanga ro phum rûkna hmun Rothai Pûk thla i han lakpui ngei bawk dawn nia.

Tin, Serchhip khawpui i rawn chuan a nih phawt chuan Mizo history-a dai tawh lo tur, Zofate ênna bul, Mary Winchester Zoluti an laklêt lehna hmun hi tlawh lovin i kir leh thiang tawh lo ang. Bengkhuaia pasaltha ten Alexandrapore-ah Sap naupang an man a, sal atan Serchhip ram chhung, a hunlaia Sailam ram chhung la ni, Kawlri hmunah hian an hâwn a. He Zoluti avang hian Mizoramah Chanchin Tha Meichher chhit ên a lo ni ta tih kha theihngilh suh ang che. He hmun hi KTP te chuan hmun thianghlimah kan puang a. An laklêt lehna hmunah ngei hian tawngtaiin inhlan thar ngei ang che.

I vahkualna lamah i thaw a sain i hah tawh pawh a ni maithei, mahse lungngai lo la. Hnung lam hawiin i inher hret ang a, kawng peng chho hmasa berah i tlan chho nghal ang a. Chutah chuan tlâng mawi em em, Mizorama tlâng sang lar zawng zawng lan kim theihna, khua a thian that lai phei chuan Phawngpui tlâng leh Aizawl hial pawh fiah leh chiang em ema a lan theihna, Chawngpuii lunglên tlâng a lo awm ang a. Chu hmun i thlen a, chhemdam thliin a chhem heuh heuh tawh hnuah zet chuan haw lehna chang hre tawh lovin riah bul sual hial i tum ta ve ang tih erawh ka hlau hlel lo ve. A hming tumtu, Chawngpuii  hi Chhim lam lal ropui, Rolura thlah kal zel, Lalpuithanga tunu a ni a. A hunlaia lal fanu hmeltha a ni tih ringhlel hauh suh ang che.

Aw le, khuai a tlai dawn ta a. Zanriah ei pawh a lo hun dawn ta. Ui em em chungin, Chawngpuii lunglên tlâng chu i hnungchhawn dawn ta a. Mahse, thui i chhuk thlâk hmain Park siamna tana itawm em em, Bengkhuaia Inhmun i thleng thla vat ang a. Mizoram sawrkar hian han ngaihsak deuh se, Park siam nan a van itawm tehlul em i ti ve chûl mai ang. Chu hmun vek chu a ni, Mizo zawlnei lar, Pastor Chhâwna lo tualchaina hmun chu! Pastor Chhâwna inlarna kan hre zing hle. He inlarna a hmuh zawng zawng deuh thaw hi Serchhipa a awm lai deuh veka thil thleng a ni a. Chu hmun chu Serchhip Heritage Society te chuan, Kohhran thlawpna hnuaiah Pastor Chhâwna Memmorial Prayer Cabin tiin tawngtaina In an sa a.  Pathian min hruaina leh awmpuina zawng zawng hre reng chungin inren hauh lovin tawngtai bawrh bawrh la, harhtharna i chang ngei bawk ang.

A chunga kan sawi te bakah khian he Serkhawpui hmunah hian tlawh tur leh fan tur tam tak a la awm a. Nimahsela, fan kim vek i tum chuan haw na chang i hre tawh lo ngei dawn si a, i nupui fanaute leh chhung leh khatte an hrilhhai dawn em mai, duhtawk rih phawt ang aw. 58th K.T.P. General Conference hlim taka hmang turin duhsakna ka hlan theuh a che u.

Chei chuan ngai loh, khuanu lêng siam,

Tuk ram par tin bawm hi;

Van hnuai mi hril, Sertlâng sâng lûr,

Leng zawng par ang vulna.

- K Remruatfela