Mizoram Council of Minister thukhawmin MR chungchang ngaihtuah; Medical allowance 4% an hlawh-ah dawng tawh dawn

Aizawl | Feb 14, 2020:  Mizoram sawrkar department thenkhat atanga thu pawimawh ngaihtuah ngaite sawihova Chief Minister Zoramthanga hova vawiin a Council of Minister te thukhawm chuan Mizoram sawrkar hnuaia Muster Roll te chungchang sawiin, anmahni enkawl dan tur rawtna lut chu pawm a ni a. Hemi hnuaiah hian Muster Roll te chu Provisional Employee tia thlak an ni ang a. Minimum Wages Act hnuaia hlawh la thin kha pay structure hran neiin felfai takin an thlatin hlawh (renumeration) tur pawh siam a ni ang. An hlawh hi kumtin basic pay atangin 4% a tihpun (annual increment) a ni tawh ang. Hemi bakah hian Travelling Allowances/ Daily Allowance leh transfer TA an bill thei dawn bawk a ni.


Provisional Employee te hian Medical allowance 4% in an hlawh ah an dawng tel tawh dawn bawk a. Hmeichhe tan fa pahnih aia tamlo ah Maternity Leave kar 26 chhung an la thei ang a. Mipa tan Paternity Leave ni 7 chhung lak theih a ni dawn bawk. Provisional employees te hian department a Group "C" leh Group "D" hna awm sa te thawkin, an tan post hran siam sak a ni dawnlo a. Kum khatah (calendar year) Casual Leave ni 4 an nei tawh ang a, hemi bakah hian an ruaitute nena inremsiamna in thla tin ni khat chawlh (compulsory non-duty) an nei thei dawn bawk.

Provisional employee te enkawl dan tur kaihhruaina hi sawrkar in Cabinet thu a pass ang hian a notify thuai dawn a ni.

Vawiin Council of Minister thukhawm chuan sawrkar hnathawk zinga lirthei kawl thei chin tur Vehicle Entitlement siamthatna chu enhovin an pawm bawk a. Power & Electricity leh Public Health Engineering department te mipui rawngbawl hna tha zawka hna an thawh theihna tura hma la turin heng department pahnih ah hian Task Force din chu pawm a ni bawk.







Vawiin Council of Minister thukhawmin MR chungchang an ngaihtuah tur ngaichang hian National Trade Union of Mizoram (NTUM) member te chu CM Bangla bulah an pungkhawm a, ram hruaituten an chungchang an ngaihtuah lai hi an ngaichang reng a ni.

Post a Comment

1 Comments

He post chungchanga i ngaihdan lo sawi ve rawh: