Aizawl | Feb 24, 2020: PWD Highway Division 5, Thingdawl hnuaiah Kolasib District chhunga National Highway te chu siamṭhat mek a nih thu Er. Lalchhuana, EE PWD Highway Div. 5 chuan a sawi.
Er. Lalchhuana'n Kolasib a Doordarshan palai a hrilh danin, kawngpui siam mek zingah Lailapur leh Bilkhawthlir inkar kawng chu tunah hian Sunshine Overseas ten a chhe lai thawm ṭhat hna an thawk mek a, he kawngpui hi cheng vbc 18, nuai 8 senga siam niin, thla thar March ni 16-a zawh hman tura ruahman a ni.
Kolasib leh Kawnpui inkar kawng pawh SEDP sum cheng vbc 5 leh nuai 5 sengin a chhe lai siamṭhat hna department-in an thawk mek a. Kawng chhe zuallai hmun 9 chu concrete a siam tum a ni.
Kawnpui leh Khamrang inkar kawng chu retender leh mek a ni bawk a. Khamrang leh Buichali inkar chu cheng vbc 31, nuai 58 senga siam ṭhat hna thawh tur niin, kawng siam tur hian Ratna Infrastructure Pvt. Ltd. te chu thlan an ni a, Work Order ngaihchan mek a ni.
Zero point leh Bairabi inkar kawng pawh tunlai hian thawmṭhat hna thawh mek niin, kawng bal siam ṭha turin DPR siam vek tawh a ni a, central sawrkar ngaihchan mek a ni. Bairabi tawntirh a Bailey Bridge chu a thar, Bailey Bridge tho a siam tura buaipui mek niin, SEDP sum cheng nuai 125 hmanga thawh tur a ni.
- Doordarshan
Post a Comment
He post chungchanga i ngaihdan lo sawi ve rawh: