Hnam tenaute puala seat reservation nuaibo tumna Congress party-in dodal tum; Vanapa Hall Kawtah duh lohna lantir dawn

Aizawl | Feb 13, 2020: India rama Hnam tenau zawk te tana seat reservation awmsa nuaibo tumna awm mek chu Congress Party chuan tha an ti lova, dodal an tum.
Mizoram Pradesh Congress Committe chuan vawiin khan Aizawl Press Club-ah thuthar thehdarhtute kawmin he thu hi an sawi.


MPCC General secretary TT Zothansanga chuan, "Hnam tenau zawk te tana seat reservation awmsa nuaibo tumna awm mek hi Congress Party chuan tha lo a ti a, a dodal tlat dawn a ni. Tin, he thil hi Mizoram leh hnam tana thil pawi tak thlen thei a nih avangin Congress Party-in a dodalna hi min thlawp turin Mizoram mipui, Kohhrante leh NGO hrang hrangte kan sawma. February 14, 2020(zirtawpni) a Vanapa Hall kawta he thil duh lohna lantirna turah pawh a thei apiangin min tawiawm turin kan ngen a ni." a ti a.

He thilah hian sorkar lapui chu demin, TT Zothansanga chuan, "India sorkar laipui, BJP kaihhruai chuan India rama zima in leh sorkar hnathawktu lakna hrang hranga Scheduled Tribe, Scheduled Caste leh Other Backward Class-te tana seat reservation a siam thin chu nuaibo tumin hma a la mek a, Supreme Court hial thleng chhovin, heng reservation-te hi nuaibo mai theih dinhmunah a ding mek a ni." a ti a.


TT Zothansanga chuan,  Sorkar laipui hnuaia zima in leh sorkar hna Lakna reng rengah hetiang hian reservation siam a ni a- Scheduled Castes tan 15%, Scheduled Tribes tan 7.5% Ieh Other Backward Classes (OBC) tan27%. Heng hnam tenau leh rethei zawkte tana seat reserve hi 49.5% a ni a, a bak zawng chu India rama hnam tha ho, General ho quota a na nih thu leh
 India ramah hian hnam hnufual zawkte hi kan retheiin, zima lamah pawh hnam tha ho kan pha lo nasa hle a, hetiang a nih avang hian he seat reservation hi heng hnam hnufual ho tan hian a hlut thu a sawi a.

"Mizoram atanga LAS, IPS, IFS leh Central Service dang kan neihte, Doctor leh Engineer zir thei zawng zawng deuhthaw hi he Tribal Quota atanga lut hi kan ni deuh vek a. Tribal quota hi nei lo ila, Mizoram atang hian Enginecr leh Doctor zir pha kan la awm mang lo ang a, All India Service leh Central Service danga lut thei kan nei mumal bek lo ang.  Hei hi kan hnam a la naupan vangte, zima lama kan hnufual deuh vang leh zirna in kan neih that tawk loh vang a ni tlangpui bawk." a ti bawk.

MPCC general secretary chuan, "heng reservation-te hi nuaibo a nih chuan Mizote leh hnam tenau dangte hian India ramah hian hna tha leh hna sangte hi kan thawk ve thei tawh lo ang a, zirna lama hnam tha zawkte kan la thlauh em avangin zirna in thaah kan kal ve thei hek lo ang. Chuvangin, India rama hnam hrang hrangte intluktlang taka kan awm theih hma chuan heng reservation-te hi a awm ngei ngei a la ngai a ni," a ti a.

BJP-in  chu Hindu Lal ram din tum-ah puhin, chumi atan chan sakhaw dang betu hnam tenau zawkte hi dip ral vek an tum a, thenawm rama Hindu nawlpui awmte India rama lakluhna tur dan CAA an ti fel tawh a, kan sakhua leh hnam kalphung min thlaksak an tumna Uniform Civil Code (UCC) Parliament-ah pharh an tum mek a, Mizoram Kohhran ten fa nei tam tura kan infuih lai mekin fa 2 chauh neih policy kalpui tan an tum leh ta bawk. Tunah hian hnam tlem zawk te tana seat reservation nuaibo an tum leh ta a, hei hian Political rescrvation nuaibo thleng a hmalak an tum a ni tih a ti chiang hle a ni, a ti bawk.


Post a Comment

He post chungchanga i ngaihdan lo sawi ve rawh:

Previous Post Next Post