Police Headquarters Building thar Chief minister in hawng; A bul tanna chauh a la ni - CM

Aizawl | Jan 28, 2020: Chief Minister Pu Zoramthanga chuan vawiin khan Khatla ah Police Headquarters building thar chu khuallian niin a hawng. Building thar hawnnaah hian Home Minister Pu Lalchamliana chu khualzahawm a ni a. Deputy Speaker Er. Lalrinawma, Deputy Govt. Chief Whip Pu Lalrintluanga Sailo leh MLA te an tel a ni.

Chief Minister chuan Mizoram Police in Headquarter building thar tha tak an nei chu a lawmpui thu a sawi a. A bul tanna chauh a la nih thu sawiin, district ah te, sub division ah te, outpost ah te police hmunhma thuamthat ngai a awm tamzia a hriatpui thu a sawi a. Police infrastructure development chungchang chu sarkar laipuiah Minister bulah pawh thlen tawhin, project te siam a thehluh a nih tawh thu a sawi. Police tichangtlung turin thawktu indiahlohnaah emaw, uniform emaw, ralthuam tha zawk a ni emaw, theih tawpa hmalak sak an nih tur thu a sawi a. Chief Minister chuan ruihhlo leh zu ah buai tawk kan tam a, hemi hi kan tan chonaah lain fihlim tura hma kan lak a pawimawh a ni, tiin Mizoram Police te chu theihtawp chhuah zel turin a fuih.

Chief Minister Pu Zoramthanga chuan Mizoram chu state lian lo tak, a chhunga cheng mihring pawh tlemte awmna ni mahse kawng thenkhatah hmahruaitu nih theihna a neih thu a sawi a. Chung zingah chuan hun rei tak rambuai lo ni tawh thin, tuna state ralmuang ber pakhat kan nihna hian thenawm ramah leh hmarchhak state te zinga remna palai a tang thei dinhmunah min dah in, chu remna siam hna thawk tur chuan sawmna pawh kan hmu reng a ni, a ti a. Harsatna lianpui anga langte chu rinna nen hmachhawn zel a, kan theihna leh thiamna te hmang tangkai chunga tumruhna nen kan kal phawt chuan danglamna kan thlen thei dawn a ni a ti.

Home Minister Pu Lalchamliana chuan PHQ building thar puitlin a nih theih nan a hma lo la tu te zawng zawng chungah lawmthu a sawi a. Mizoram Police chu India rama police tha berte zinga chhiar theih an nia a hriat thu sawiin, zirchianna thenkhat statistics hmuh theihah India ram pum huapa police case chinfel (conviction rate) aiin Mizoram police conviction rate chu a let dawna a san zawk thu a sawi a. Chu chuan inkaihhruaina tha leh a taka mipui tan thawk thin an nihna a lantir nia ahriat thu a sawi. Chutihrual chuan duhtawk mai lovin mahni hmaa tih tur te tha tak leh fel taka thawk thei tura rilru pu chhunzawm zel turin police kalkhawmte chu a chah a. Hotute mitmei ven vang chauha nilova mahni inthunun theihna chu vawn reng a pawimawh thu a sawi bawk.

Home Minister chuan police hmalakna pawimawh thenkhat tarlangin, district thar pathum a mi tur leh post awl hrim hrim awmte chu hnawhkhat tura hmalak a nih thu te, Zokhawthar leh Dungtlang outpost siamtha tura sawrkarin phalna pek tawh thu te leh outpost awmlohna hmun pathum ah siam phalna pek a nih tawh thu te a sawi a. Police te hmanrua tha zawk an neih theih nan hmalak a nih thu te sawiin, misual sulhnuchhui nan ui fing squad siam in training neih mek a nih thu a sawi bawk.

Chief Secretary Pu Lalnunmawia Chuaungo chuan Aizawl hmun laili taka police building thar tha tak an nei chu a lawmpui thu sawiin, thawktu te pawh an mawhphurhna tha taka an hlenchhuah chhoh zel a rin thu a sawi a. Chutihrual chuan hmasawnna hi building tha ah te, hmanrua tha ah te teh awl tin viau thin mahse mihring thiamna leh theihna, a ngaihtuahna leh a hnathawh dan phungin hma a sawn hian a hlawkthlak ber thin a ni, a ti. Chief Secretary chuan Mizoram Police chu kawng hrang hranga tha taka thawk thin, state tan pawha chhuanawm an nih thu a sawi.

Pu SBK Singh, DGP Mizoram chuan thu sawi bawkin, Mizoram Police chu Indai rama police force tha ber ni turin theihna an neih thu leh hmasawn tura hmalakna hrang hrang lo awm tawh te a sawi a. Police zinga zu leh ruihhlo in a tihbuai awm te chu an ngawlveina laka chhanchhuak a, police mai nilo mipui vantlang zinga he hri thalo in harsatna a thlen chu tirem turin project te siam a, hmalakna hrang hrang siam a lo nih tawh thu a sawi a. Chumi bakah chuan venhimna kawnga hma thar la in, mobile phone app te siam a, harsatna tawk ten police tanpuina awlsam zawka an koh theihna tur remchanna te, khualzin mite tan a him zawkna tura hmalakna te leh a dangte a sawi a ni.

He building thar hawnna puala inkhawm hi Pu John Neihlaia, IGP chuan kaihruaiin Pu L.H. Shanliana, IGP (L&O) chuan lawmthu sawiin hun a khar a ni. PHQ building thar hi DoNER Ministry atanga sum hmuh hmanga sak niin, sanctioned amount chu Rs. 1555.79 lakhs a ni a. North East Consultancy Services (NECS) in an a design leh sak hna hi an thawk a ni. July 2015 khan sa tanin, December 2019 kha peih fel a ni. He building hi chhawng nga awmin, block hnih a then a ni a. Heng block pahnih te hi double level bridge a kalpawh theih a ni. A vaiin officer room 18, staff room 20, store leh service room 13, toilet block 8 awmin, choka leh canteen, multipurpose hall, conference hall leh library te a awm bawk.

- DIPR