MZP -in Rawna ral; MZU Southern Campus din tur lawmawm ti

Aizawl | Jan 18, 2020: MZP General Headquarters chuan  Bungtlang South tlangval, mi kut tuar a boral ta; A. Lalrawnliana chu vawiin khan ralin, he hunah hian MZP general headquarters general secretary Lalnunmawia Pautu leh Finance secretary Chinkhanmanga Thomte, bakah hruaitu dangte an kal.

MZP general secretary Lalnunmawia Pautu chuan, "Tv. A. Lalrawnliana hnamdang kut tuara a boral hi MZP chuan na kan tiin, pawi kan ti takzet a. Mizoram chhung ngeiah Mizote'n hnam dang kut kan tuar fo leh nunna hial kan chan thin hi a hrethiam lo takzet a. He thil thleng hi a tawpna ni tawh se kan duh a, he pawi khawihna rapthlak tak a mawhphurtute chungah hian dan angin an phu tawk hremna na thei ang ber pek nise MZP chuan a duhin a phut a. Thuneitute hmalak dan pawh MZP chuan a en zui zel dawn a ni. Mizoram chhunga hnam dang dan lova lo lutte leh kawhmawhbawla zofate pawi khawihtute chu Mizoram chhunga khawsa tawh lo turin MZP chuan a duh a ni," a ti.

MZP chuan kan ram leh hnam himna hi a ngaih pawimawh berte zinga mi a ni a. A tawp thlenga ke pen turin a inhuam reng a, a tlanchhe ngai dawn lo a ni.

MZP Hruaitute  chuan ralna hun an hman zawhah Tv. A. Lalrawnliana ruang hmuhna leh a tual thihna hmun Vaseikai (Nghalimlui) chu an tlawh nghal a, he hmunah hian khawtlang mipuite koh khawm niin, inngeih taka khawsa ho turin sawm anni a, hetiang thil hi a thleng nawn leh a nih chuan Mizo thalai tam zawk kalin, kan tih tur kan ti ve tawh ang tiin an sawi a ni.

MZP hruaitute hi Pu Daniel Sailo,  Bungtlang South BDO leh Pu HT. Lalrozika, YLA Bungtlang South President-te chuan lo dawng sawngin an lo tawiawm a ni.

MZP chuan, MZU Southern Campus din a nih theih nan kum 2009-ah UGC chancellor hnena MZP hminga rawtna an thlen tawh, tih hlawhtlin a ni ta chu lawmawm a ti takzet a. MZU Southern Campus din a nih theih nan chak taka hmalatu Mizoram Higher & Technical Education Minister Dr R Lalthangliana leh a thawhpuite bakah, NGO hrang hrang leh hemi atana tha thawhtu zawng zawng  chungah MZP chuan lawmthu a sawi.